DLAŊ LEVIRA 2 - Boy Lonana

Ɓivun ma lam u wanana

¹ «Hu li ma sana min a li puura maŋ Yawe u njaf wana ni, nam yow fuɗta nde, vooɗ mbulna kaɗu, cuk mbitla his jivira duk may.

² Mbaa tle asina ay maŋ muli suu li ɓivunna, goryoŋ Aaronna. Yow fuɗ ndaɗta ni oy duk koŋ dew. Fuɗta may, mbulna may, u mbitla his jivira may. Mul ma li ɓivunna ŋgal tle asina kay givin ma togolla, ni ɓivun ma gi humba. Ni tlesuu ɦasi maŋ Lona a ŋgalasi kina, his ma jivi ii Yawena.

³ U tlesuu hinna ni maŋ Aaron u goryomu, kay ni tlesuu ki mbuɗi teteɗna, kay asi ni duk tlesuu ŋgalasi ki maŋ Yawena.

⁴ «Lini aŋ a li puura maŋ Lona u njaf wana ni, lini u komnjoɗina u fuɗ mayra ki yarasi u mbulnara, komnjoɗina tam ki jivi walaŋ walaŋ u mbulna may.

⁵ Lini a li puura ni u komnjoɗii ma hawam hawina ni, aŋ lammi yaras fuɗta ki u mbulna.

⁶ Aŋ hawam ay ki wa ni, hin voom mbulna kamu ni ɓivun ma njaf wana maŋ Lonana.

⁷ Lini aŋ a li ni puura u njaf wa ma zalam ki zalina ni aŋ yaras fuɗta ki ni u mbulna lay.

⁸ Aŋ mbaa puura njaf wana ha ni fok Yawe, tuɗ ɦam maŋ mul ma li ɓivunna, nam tuɗum ha tok eg givin ma togolla.

⁹ Duk tle asina mul ma li ɓivunna yow ɦiw ni ŋgal kay givin ma togolla a gi humba. Ni puura ŋgalaɗ ki ŋgalira, his ma jivi ii Yawena.

¹⁰ U tlesuu hinna ni maŋ gi Aaron u goryomu, kay ni u tlesuu ki mbuɗi teteɗna, kay asi ay ni duk tlesuu ŋgalasi ki maŋ Yawena.

¹¹ «Puura u njaf wa ma agi tinim fok Yawena halaŋ ka lasi u kuf dukgi, lini nanagelay agi ka ŋgal ɓivun u kuffa ɗowba mbul yummaɗi lay, puura laɗ maŋ Yawera ka li u tle asinaɗi.

¹² Kay wana, agi mbaa yam wa ma ne ki fok jewna halaŋ fok Yawe may tle asina ka tuɗusi hu givin ma togollaɗi kama.

¹³ «Kay puura u njaf wa ma aŋ mbaaramma ni aŋ cuk vuvuna kayami, tlesuu li puura halaŋ ka hin bay vuvu dukgi, ni galamba aŋ vaɗ u Looŋŋara kay tlegeyeŋ suu puura halaŋ megelay ni aŋ cuk vuvuna dukumu.

¹⁴ «Lini agi li puura u njaf wa ma ne ki jewna maŋ Yawe, agi gijaŋŋa ni haw yam wana, hin luɗ fuɗ wa namma ay ki jew a aŋ mbaaram fok Yawera.

¹⁵ Aŋ vo mbulna duku cuk mbitla his jivira duk may, ni tlesuu puura njaf wana.

¹⁶ Ŋgoo dagan, mul ma li ɓivunna hin ŋgal tle asina kay gi humba, yow wa ma hawina nde may, mbulna nde may u mbitla his jivira may. Ni puura ŋgalaɗ ki ŋgali maŋ Yawera.»