DLAŊ LEVIRA 15 - Boy Lonana

Tlesuu eg sana suu mbuɗ sana ki njenjena

¹ Yawe di Moiz u Aaron ana,

² «Dagi suu Israelna, Agi tuɗ dasi ana, lini sana fi tuguɗira tlena cuɗ ay ki fun ɗiwimu, tlesuu cuɗ asina mbuɗum ki njenjee.

³ Njenje ndaɗta hin li ni ko wanda na hu li ma tlena ɓaɗ ay ki egemma, asi cuɗ ay ki egem gak gak ɗowba ɗiwim bala ni nam ki njenjera ni ko wandara na.

⁴ «Lay ma nam buu kamma ma tlena ɓaɗ kamma mbuɗ ki ni njenjee, tlesuu nam kak kasina halaŋ ki ni njenjee.

⁵ «Sa ma ŋgen kom eg lay mammana mbuɗ ki ni njenjee, nam mba mbus barawi mamsina kiyo, mbus tam ki may, nam mbuɗ ki njenjera ta ta fiɗigiya.

⁶ «Sa ma kak kay va ma sa tuguɗira ay kaki kamma mba mbus barawi mamsina kiyo, mbus tam ki may. Nam ki ni njenje ta ta fiɗigiya.

⁷ «Sa ma tin kom eg sa ma tuguɗi nammana mba mbus barawi mamsina kiyo, mbus tam ki may. Nam ki ni njenje ta ta fiɗigiya.

⁸ «Lini sa ma tuguɗi namma tof yoyona eg sa wa ni, sa namma mbus barawi mamsina kiyo, mbus tam ki may, nam ki ni njenje ta ta fiɗigiya.

⁹ «Caŋara sa ma tuguɗira tuɗ koyra ful ha kaɗta mbuɗ ki ni njenjee.

¹⁰ «Gegelay ma ŋgen kom eg va ma vi sa ma tuguɗi nammana ki ni njenje ta ta fiɗigiya. Sa ma tlam vaam namma ay kamma mbus barawi mamsina kiyo, mbus tam ki may, nam ki ni njenje ta ta fiɗigiya.

¹¹ «Gegelay ma sa tuguɗira tin kom egem bay mbus kom kina, mba mbus barawi mamsina kiyo, mbus tam ki may, nam ki ni njenje ta ta fiɗigiya.

¹² «Sa ma tuguɗi namma tin kom eg doyna wa ni to doy namma kiyo, va ma nam tin kom egemma lini ŋgot guwa ni mbus ŋgot namma kiyo.

¹³ «Hu li ma sa namma garaɗ ki wa ni nam li buuna kiɗisiya a gijaŋ mbuɗ tam ki teteɗta. Nam mbus barawi mamsina kiyo, mbus tam ki may, ni nam mbuɗ ki ni teteɗ.

¹⁴ Hu buu ma kalavandina ni nam yow guguk gaɓiina ɗowba gukka ɦawara mba', tuɗ fok Yawe fun Mbutluɓ ma Tokka tuɗ ɦasi maŋ mul ma li ɓivunna.

¹⁵ Nam vi taa dew a li ɓivun ma bulum cora kina, ta hiŋga ni a li ɓivun ma ŋgalam ki ŋgalina may. Mul ma li ɓivunna lam ɓivun ma bulum cora kina kam fok Yawe kay tuguɗi mamba cuɗ ki egem ndaɗta.

¹⁶ «Lini sana doyra dam wa tam mba ki wa ni nam mbus tam ki u yona halaŋ, nam ki mbuɗi njenje ta ta fiɗigiya.

¹⁷ Barawi suu tam li ki egesina halaŋ mbususi kiyo, lini ɗikka lay, asi ki mbuɗi njenje ta ta fiɗigiya.

¹⁸ «Lini sa njufna u cara buu tasi wa ni asi mbus tasi kiyo, asi ki mbuɗi njenje ta ta fiɗigiya.»

Tlesuu eg cara suu mbuɗ cara ki njenjena

¹⁹ «Lini cara fi busuna wa, nam li ka ɓaɗ uɗu ni ndaɗ ki mbuɗi njenje ta ta buuna kiɗisiya. Sa ma tin kom egeɗ tana ki mbuɗi njenje ta ta fiɗigiya.

²⁰ «Hu buu ma busuna egeɗna, lay ma ndaɗ buu kamma ki ni njenjee, tlesuu ndaɗ kak kasina halaŋ ki ni njenjee.

²¹ «Sa ma ŋgen kom eg lay maɗnana mbus barawi mamsina kiyo, mbus tam ki lay, nam ki njenje ta ta fiɗigiya.

²² «Sa ma ŋgen kom eg tlesuu ndaɗ kak kasina mbus barawi mamsina kiyo, mbus tam ki may. Nam ki ni njenje ta ta fiɗigiya.

²³ «Lini vana gii kay lay maɗna, ɗowba kay tlesuu ndaɗ kak kasina, aŋ ŋgen koŋ egem wa ni, aŋ ki ni njenje ta ta fiɗigiya.

²⁴ «Lini sana buu u ndaɗ bay busuna daɓ ki egeɗ tuwa ni, njenje maɗta jok ki kam wa, nam ki ni njenje ta ta buuna kiɗisiya, lay ma nam buu kamma lay ni ki ni njenjee.

²⁵ «Lini cara busuna ɓaɗ egeɗ na gak gak buuna bolow su ma faɗ kaadayna ɗowba busuna laɗ hu buu ma daŋŋa lay, ni ndaɗ ki njenje gak gak hu li ma busuna ka ɓaɗ egeɗ tuna may, ndaɗ ki ni njenje ko buu ma ndaɗ kaaday lam hu li ma ndaɗ fi busunara na may.

²⁶ «Hu li ma busuna ka ɓaɗ egeɗna ni lay maɗ ma buuna ki ni njenje ko tiliɗ ma ndaɗ fi busuna kaadayna na may. Tlesuu ndaɗ kak kasina halaŋ ki ni njenje ko ndal tiliɗ ma ndaɗ fi busuna na may.

²⁷ «Sa ma ŋgen kom eg tlegeyeɗ asina ki ni njenjee, nam mba mbus barawi mamsina kiyo, mbus tam ki may, nam ki ni njenje ta ta fiɗigiya.

²⁸ «Lini busu namma ka egeɗ wa ni ndaɗ ndum buuna dagan kiɗisiya ni ndaɗ ki ni mbuɗi teteɗ.

²⁹ Hu buu ma kalavandina ndaɗ yow guk gaɓiina mba' ɗowba gukka ɦawara, mbaaraɗ ay maŋ mul ma li ɓivunna fun Mbutluɓ ma Tokka.

³⁰ Nam vi taa dew a li ɓivun ma bulum cora kina, ta hiŋga ni a li ɓivun ma ŋgalam ki ŋgalina may. Mul ma li ɓivunna laɗ ɓivun ma bulum cora kina kaɗ fok Yawe kay busu ma ɓaɗ ki egeɗ namma.

³¹ «Agi Moiz u Aaron dagi suu Israelna hu li ma asi ki njenjena ni, asi ɦuɗ tasi ha ki na day mbay eg Mbutluɓ ma Tokkaɗi, kay asi miɗ kiɗi. Lini asi a mbuɗun li ma an kak huna ki njenjee ni asi miɗa.»

³² «Gola ni gaɗta kay sa ma busuna ɓaɗ egemma ɗowba sa ma doy buuna dam mbuɗum ki njenjena.

³³ Cara busuna faɗ u tilnara, ɗowba cara u sa njuf ma tlena ɓaɗ egemma, u sa ma buu u cara busuna ɓaɗ egeɗta may.»