DLAŊ LEVIRA 13 - Boy Lonana

Gaɗta kay tuguɗi busuna

¹ Yawe di gi Moiz u Aaron ana,

² «Lini sana tam ndali duk ɗowba mbilna kaay egemu, ɗowba huɗukka mbuɗ egem tuguɗira wa ko busuna na ni asi tuɗum eg mul ma li ɓivunna, Aaron, ɗowba eg gorom maari.

³ Mul ma li ɓivunna golom tuguɗira eg bakam ndaɗta, lini li ma mbilna huna tlimiɗta dukka mbuɗ ay ki haɓpa, mbilna mbuɗ ha ga zuzulla may ni, tak ki ana ni tuguɗi busuna. Mul ma li ɓivunna gol sa namma ndak di ana nam ki ni njenjee.

⁴ Na may lini li ma mbilna huna ki haɓpa ɦawaa, mbilna ka ga zuzulɗi, tlimiɗta mbuɗ ka ki haɓbi lay ni, mul ma li ɓivunna ɓorow duk sa namma ki u suu mamsina ta ta buuna kiɗisiya.

⁵ Hu buu ma kiɗisiyana ni mul ma li ɓivunna hoŋ golom olo. Lini mbil ma egem namma jok um kaɗi, ka u tamba jewra ni, nam hoŋom ha ki kay tam ii buu kiɗisiya olo.

⁶ Hu buu ma kiɗisiyana ni mul ma li ɓivunna hoŋ golom a mbara. Lini ii mbilna so kiyo, ka tuɗ fokgi ni mul ma li ɓivunna ndak di ki kam ana, nammi teteɗ. Sa namma ndak mbus barawi mamsina kiyo, ni nam mbuɗ ki ni teteɗ.

⁷ Na may lini mbilna hoŋ la ki ŋgoo golla mul ma li ɓivunna golomba ni, hin di ana nam ki teteɗta ni, nam hoŋ golom tam hu olo.

⁸ Mul ma li ɓivunna hoŋ golom olo kay ana tuguɗira la ki egemu, nam ndak a di ki kam ana nam ki njenjee, lammi tuguɗi busuna.

⁹ «Lini sana tuguɗi busuna vam wa ko ndaɗta na ni tuɗum eg mul ma li ɓivunna.

¹⁰ Mul ma li ɓivunna golom tamu, fam tam ki ndalira haɓpa mbilna ha paari ga zuzulla may, ni tuguɗira cora.

¹¹ Ni busu ma eg bakkana, lammi namu, mul ma li ɓivunna ndak di ana nam mbuɗ ki ni njenjee. Nam ka loɓ tam a kakam ay ki kay tam day oloɗi, kay nam ki ni njenje da.

¹² Na may lini tuguɗi busuna mbuɗ ki eg sana ŋgol cocoo, col ha kay sem day ta ta kay yamu a mul ma li ɓivunna wam kiyo ni,

¹³ sa namma ndak golom olo, kay ana busuna cuki egemmi halaŋ, mul ma li ɓivunna di ki kay sa namma ana nam ki ni teteɗ, kay tam mbuɗ ki halaŋ halaŋŋi teteɗ.

¹⁴ May hu buu ma asi wam tam duk ndali wa ni nam hoŋ ki ni njenje olo.

¹⁵ Mul ma li ɓivunna hoŋ golom olo, di ki kam ana nam mbuɗ ki njenjee, tamba mbuɗ duk ndalira ni njenjee, ni lammi tuguɗi busuna.

¹⁶ Ɗowba lini mbilim gijaŋ cila wa, irim mbuɗ ki haɓi ni nam tuɗ eg mul ma li ɓivunna.

¹⁷ Lini mbilim sal ki wa ni nam mbuɗ teteɗ, mul ma li ɓivunna ndak di ki kam ana nam teteɗ.

¹⁸ «Lini sana kolla lamu, hin cil ki wa,

¹⁹ may balam huɗuk ndaɗta ki haɓpa, li namma gol ki na zeɗe ni, nam tuɗ eg mul ma li ɓivunna, nam golomu.

²⁰ Mul ma li ɓivunna golom olo, lini huɗukka ha ga zuzulla, tlimiɗta hura ki haɓ may ni, nam ndak di ki kam ana sa namma ki ni njenjee, kay tuguɗi busuna gi taɗ hu ni ndaɗu.

²¹ Hu li ma mul ma li ɓivunna golom wa lini tlimiɗta hu li nammara mbuɗ ka haɓbi lay, huɗukka ha ka ga zuzulɗi lay ni, nam ɓorowom dukum ki u suuna ii buu kiɗisiya.

²² Lini ii mbilna ɦuɗ ha fok wa ni, mul ma li ɓivunna ndak di ki kam ana nam ki ni njenjee, kay lammi busuna gasi.

²³ Lini ii mbilna ɦuɗ ka fokgi, huɗukka jok kaɗi lay ni, mul ma li ɓivunna ndak di ki kay sa namma ana nam ki ni teteɗ.

²⁴ «Lini sa njufna ɗowba cara kura ŋgalamu, balam kura cil ay ki haɓpa weleɗ ki na zeɗ.

²⁵ Mul ma li ɓivunna ndak golomu. Lini tlimiɗta hu li huɗukkara ki haɓi, li namma ha ga zuzulla may ni tuguɗi busuna gi tam hu balam kura ni namu. Mul ma li ɓivunna ndak di ki kay sa namma ana nam ki ni njenjee.

²⁶ Lini mul ma li ɓivunna golom wa, tlimiɗta hu li nammara ka haɓbi, ii huɗukka ka ga zuzulɗi lay ni, mul ma li ɓivunna ndak ɓorowom ki u suuna kay buu kiɗisiya tu wa.

²⁷ Hu buu ma kiɗisiyana, mul ma li ɓivunna hoŋ golom olo, lini ii huɗukka ka la ha kiyo ni mul ma li ɓivunna ndak di ki kam ana nam ki ni njenjee, kay tuguɗi busuna gam jaŋŋa ni ndaɗu.

²⁸ Na may lini li ma ndali ii huɗukka namma ka jok umbi, ni huɗuk ŋgalla ɦawaa ni, mul ma li ɓivunna ndak di ki kam ana nam ki ni teteɗ, kay li ki ni huɗuk ŋgalla ɦawaa.

²⁹ «Lini sa njufna ɗowba cara tuguɗira ndal kay yam ɗowba udumumu,

³⁰ Mul ma li ɓivunna gol li ma taŋ namma lini li namma ha huɓi ga zuzulla, tlimiɗta hura ki tlatlawra may ni, mul ma li ɓivunna ndak di ki kay sa namma ana nam ki ni njenjee, kay lammi busu ma kay yambana, ɗowba ma udummana.

³¹ Hu li ma mul ŋgol ma li ɓivunna gol sana wa, lini nam fam li namma ka ga zuzul cocoɗi, tlimiɗta ka vaɗ warɗi lay ni, mul ma li ɓivunna ɓorow duk sa ma tuguɗira ki u suuna buu kiɗisiya.

³² Hu buu ma kiɗisiyana ni mul ma li ɓivunna hoŋ golom olo, lini tuguɗira ɦuɗ ka fokgi, tlimiɗta hu li namma li ka ki tlatlaw oloɗi ni,

³³ sa ma tuguɗi namma kaa yam kiyo, may hin li ma tuguɗira duk bay wella, mul ma li ɓivunna hoŋ kakam ha ki kay tam ii buu kiɗisiya olo.

³⁴ Hu buu ma kiɗisiyana ni mul ma li ɓivunna hoŋ golom olo. Lini tuguɗi ndaɗta ɦuɗ ka fokgi, jok uɗ ka ki hu li ma daŋgi lay ni, mul ma li ɓivunna ndak di ki kam ana nam ki ni teteɗ. Hu li ma nam mbus barawi mamsina ki wa ni nam mbuɗ ki ni teteɗ.

³⁵ Na may lini tuguɗira ɦuɗ koɗ egem dagan hu li ma di ki kam ana nam ki teteɗna ni,

³⁶ mul ma li ɓivunna hoŋ golom olo, kay ana tuguɗira hoŋ ki egemu, nam ka hal dlara golom tlimiɗ yam day oloɗi, di ni na gaw ana sa namma ki ni njenjee.

³⁷ Na may lini wi li ma tuguɗira ki kiɗik jiviya, tlimiɗta hu li nammara mbuɗ ki wara wara lay ni tak ki ana sana garaɗ ki wa nam mbuɗ ki ni teteɗ, mul ma li ɓivunna ndak di ki kam ana nam mbuɗ ki ni teteɗ.

³⁸ «Lini sa njufna ɗowba cara tuguɗira ndal ki egem wa na nduɓuku ni,

³⁹ mul ma li ɓivunna golomu, lini ndalla ndali egem ndaɗta gol ki haɓ haɓbi, tuguɗi ndaɗta li ka eŋ cocoɗi ni, sa namma ni teteɗ.

⁴⁰ «Lini sana tlimiɗ yam kaɗi, yam koo ki wa ni, nam ki ni teteɗ.

⁴¹ Lini yam koo ha ki ni vogom na, vogom hin ki ɦawa bay tlimiɗta ni, nam ki ni teteɗ.

⁴² Na may lini mbilna ka vogom hu li koorina ɗowba duk yamu, gol ki tlaw tlawi ni lammi busuna, ka mbilna hu li ma koorina ni namu.

⁴³ Mul ma li ɓivunna gol sa namma, lini mbil ma hu li nammana gol haɓ haɓ may, tlaw may ni,

⁴⁴ nam ki ni njenjee, lammi busuna. Mul ma li ɓivunna ndak di ki kam ana busuna cuki kammi namu.

⁴⁵ «Sa namma cuk baraw ma harina egemu, hin yam ki ɦawaa, baa jeɓerem kiyo, nam tuɗ kolo sawalla ha ana, Njenjera! Njenjera!

⁴⁶ Hu li ma tuguɗi ndaɗta egemma nam ki ni njenje gak gak nam cuk ziim ha ki ni doŋ kaana.»

Gaɗta kay baraw ma gufurina

⁴⁷ «Lini barawna tam gufuu ki wani, ni baraw ma cili u tlimiɗ timigiina ɗowba baraw dlemba,

⁴⁸ cilim u baraw dlemba ɗowba u tlimiɗ timigiina ni, tle may suu cili u dikka tlawra halaŋ.

⁴⁹ Lini baraw namma tam ndal ki duk wara ɗowba tlaw tlawi, eg baraw ma cilina ɗowba eg ɗik ma coori tlawna ni tak ki ana ni tuguɗi gufuura, tuɗ va namma mul ma li ɓivunna golomu.

⁵⁰ Mul ma li ɓivunna gol zoɗta tini eg va nammara. Ŋgoo dagan cuk va namma ta ta buuna kiɗisiya golom tu wa.

⁵¹ Hu buu ma kiɗisiyana ni nam hoŋ gol va namma olo. Lini zozoɗ ndaɗta ɦuɗ ha fok na ɗow ɗow lini eg barawna ɗowba eg ɗik ma coorina ni tak ki ana ni tuguɗi gufuura. Va namma ki ni njenjee.

⁵² Va namma li ni baraw ma cili u tlimiɗ timigiina ɗowba baraw dlemba ɗowba ɗikŋa ni ŋgal va namma kiyo. Tlesuu tasi ndal ki asina halaŋ ŋgalasi kiyo kay ana ni tuguɗi gufuura.

⁵³ Lini mul ma li ɓivunna fi ana zozoɗ ndaɗta ɦuɗ ka fok eg baraw nammaɗi ni,

⁵⁴ mul ma li ɓivunna ɦal voɗta ana mbus va namma kiyo, hin cukum kolo ta ta buuna kiɗisiya olo.

⁵⁵ Ŋgoo dagan mul ma li ɓivunna hoŋ gol va ma mbusum ki namma. Lini ndal ndaɗta ɦuɗ ka fokgi ni va namma ki ni njenjee. Aŋ ndak ŋgalam kiyo, kala keŋem ta ay ka ki cimi hu kurufu wa.

⁵⁶ Hu li ma mul ma li ɓivunna wi li ma ki cimi namma wa ni nam ndak haram li namma kiyo.

⁵⁷ Lini zozoɗ ta daŋga kal ay ki eg baraw namma ɗowba ɗikŋa ni gufuura gijaŋŋa egemmi namu, aŋ ŋgal va namma kiyo.

⁵⁸ Lini barawna, ɗowba ɗikŋa u tlesuu cili u bakka halaŋ suu aŋ mbususi zozoɗ ndaɗta hin ka hu oloɗina, aŋ hoŋ mbususi a mbara ni asi mbuɗ ki ni teteɗ.»

⁵⁹ Gola ni gaɗta kay tuguɗi gufuura ta eg barawinana u tlesuu cili u tlimiɗ timigiinana u barawi suu cili u baraw dlembana halaŋ. Ni haɗta kay a wi ki ana va namma ni teteɗ ɗowba njenje sura may.