DLAŊ LEVIRA 12 - Boy Lonana

Lira cara li taɗ ki teteɗ dagan vuɗta ndaɗ vuɗta

¹ Yawe di Moiz ana,

² «Aŋ di suu Israelna ana, Lini cara vi wiina vuɗ go njufna wa ni, ndaɗ ki mbuɗi njenjera ta ta buuna kiɗisiya ko ndaɗ li ay njenjera hu buu ma ndaɗ fi busuna ayra na may.

³ Hu buu ma kalavandina ni asi caw ɗiw goona kiyo.

⁴ Ŋgoo dagan cara juɓ ta ta buuna dok-hindi yam hindi a li taɗ ki teteɗ kay busuuɗ ma vo kina may, ndaɗ ka ŋgen koɗ eg va ma teteɗɗi ka tuɗ hu Zira Tokkaɗi lay, ta ta juɓ buu maɗ ma li taɗ ki teteɗna.

⁵ Lini cara vuɗ ni go tamara ni, ndaɗ mbuɗ ki njenjera ta ta buuna doogo yam fiɗi. Ndaɗ ki njenjera ni ko buu ma ndaɗ fi busuna ayna na may. Ŋgoo dagan ndaɗ juɓ ta ta buuna dok karkiya yam karkiya a li taɗ ki teteɗ kay busuuɗ ma vo kina may.

⁶ Hu li ma buu maɗ ma li taɗ ki teteɗna ndak wa ni, kay go njufna ɗowba go tamara, ndaɗ ŋgaf mul ma li ɓivunna fun Mbutluɓ ma Tokka. Ndad mbaaram ay timii ma basaɗam dewna a li ɓivun ma ŋgalam ki ŋgalina, u gugukka dew may a li ɓivun ma bulum cora kina.

⁷ Mul ma li ɓivunna takasi fok Yawe, hu li ma nam li dlara ɓivun ma bulum cora kira kayam wani ndaɗ mbuɗ ki teteɗ kay busuuɗ ma vo kina wa.» Gola ni haɗta kay cara vuɗta, lini go njuf ɗowba go tama lay.

⁸ «Lini cara ka ndak a fi timiinaɗi ni, ndaɗ yow gugukka ay mba', taa dew a li ɓivun ma ŋgalam kina may, ta hiŋga a li ɓivun ma bulum cora kina may, hu li ma mul ma li ɓivunna li dlara ɓivun ma bulum cora kira kaɗ wa ni, ndaɗ ki ni mbuɗi teteɗ kay busuuɗ ma vo kina.»