DLAŊ LEVIRA 11 - Boy Lonana

GA ƊTA KAY A KAK TETE ƊTA Gaɗta kay mburi suu komba u suu ka kombina

¹ Yawe di gi Moiz u Aaron ana,

² «Dagi suu Israelna, Duk mburina halaŋ gola ni suu agi komosina.

³ Yoori suu sesi garakina u suu hoɗ haɗna asina ni agi komosiya.

⁴ Na may suu may suu hoɗ haɗna hol u suu may suu sesi garaki holna, agi komosiɗi ko jamballa, vetta, u vet gamjokina,

⁵ agi komosi kaɗi

⁶ asi hoɗ haɗna sesi ka garakiɗi. Asi irigi ni njenjee.

⁷ Kosoŋŋa agi komombi. Sem garaki may nam ka hoɗ haɗɗi. Nam irigi ni njenjee.

⁸ Tle asina agi komosiɗi, ŋgen kogi eg maɗasiɗi lay kay asi halaŋ irigi ni njenjee.

⁹ «Gola ni tlesuu duk mbona suu agi komosina, kuluf ma u jirim huna, ma ɓolokŋa egemma agi komomu.

¹⁰ Na may ma jirim kaɗi ma tam keleɗna, tlesuu duk mbona nana ni agi komosiɗi, ŋgenesiɗi lay.

¹¹ Asina ha ki doori ni a fafaɗta agi ka komosi tliwisiɗi, ŋgenesi ɦaarasi kogiɗi lay.

¹² Tlesuu duk mbona suu tasi keleɗna u suu ɓolok ka egesiɗina halaŋ agi tasiɗi.

¹³ «Duk layagina gola ni suu agi ka komosiɗina, layagi asina ki doori ni a fafaɗta, bakŋa, ɓarawna, kokolona.

¹⁴ Lay ma ciw goloŋiina, njaf kokolora zeɗ zeɗ halaŋ,

¹⁵ Njaf gagawna zeɗ zeɗ halaŋ,

¹⁶ tewketta, wiliwili kura, yerakka u layagi suu tli tasi u ndaɗna halaŋ.

¹⁷ Hikŋa, lay ma ciwna, hik cerewra,

¹⁸ Hurumma, zalyamba, kolo kolo duhulna,

¹⁹ Zilimma, njaf garamma zeɗ zeɗ halaŋ, njeɗ ma gorɓiina u jujugumma.

²⁰ «U gor tlesuu tuɗ ga sesi fiɗi fiɗina halaŋ agi komosiɗi.

²¹ Gola tlesuu garaŋga suu sesi fiɗi fiɗi suu agi komosina, ni suu may suu ndak a weɗ kay ndaŋgara eŋga kay tasina ni suu agi komosina.

²² Gola ni suu agi komosina, agi kom barina, dladlakŋa, jeena u njaf bari suu daŋŋa zeɗ zeɗ.

²³ Na may tlesuu daŋ suu garaŋga suu sesi fiɗi fiɗi doy holna agi komosiɗi.»

Tlesuu mbuɗ sana njenjena

²⁴ «Kay ana tle asina mbuɗugi ki njenjee. Sa ma ŋgen kom ay eg ɦaa tle asinana mbuɗ ki njenje ta ta fiɗigiya.

²⁵ Sa ma vi maɗ tle asina komma mbus barawi mamsina kiyo, nam ki ni njenje ta ta fiɗigiya.

²⁶ Yoori suu sesi ka wakiɗi lay, ka hoɗ hatɗi layna, asina irigi ni njenjee, sa ma ŋgen kom egesina ki ni njenje lay.

²⁷ May yoori suu tuɗ kolo kay sesi fiɗi fiɗi suu sesi ka wakiɗina halaŋ ki ni njenjee. Sa ma tin kom eg ɦaarasina ki njenje ta ta fiɗigiya.

²⁸ Sa ma tlasi maɗasi komma mbus barawi mamsina kiyo, nam ki ni njenje ta ta fiɗigiya kay asi irigi halaŋ ki ni njenjee.

²⁹ «Tlege suu ɦaram ga duk ndaŋgara gola ni suu ki irigi njenjena, kolom palatta, kolomba vora, zinna u gi buuruna,

³⁰ Peerera, sisilira, markasira hooloŋŋa u ŋgalira.

³¹ Tle asina halaŋŋi agi golosi ki njenjee. Sa ma ŋgen kom eg maɗasi ma gii gana, mbuɗ ki njenjera ta ta fiɗigiya.

³² Lini tle asina maa miɗ hu va ma li sun wa ni va namma mbuɗ ki ni njenje lay, lini ŋgutta kala, baraw kala, bak ɗowba mbumbuwa, lini va ma li sunda ni megelay, va namma agi mbusum kiyo, nam mbuɗ ki njenjera ta ta fiɗigiya. Ŋgoo dagan nam mbuɗ ki balamam teteɗ.

³³ Lini va namma miɗ ni hu doyo ni tlesuu huna halaŋ mbuɗ ki njenjee, agi to doy namma kiyo.

³⁴ Lini vo yo namma kay va ma ti wa ni va namma mbuɗ ki ni njenjee, lini va ci ma jivina lay, ni va namma mbuɗ ki ni njenjee. Va namma li ay ki mam teteɗ ko menagelay ni mbuɗ ki ni njenjee.

³⁵ Lini ɦaa va miɗi namma ndi kay tlesuu li sunda, va ma li sun namma mbuɗ ki ni njenjee, li ma gi mappana ɗowba, givinna, ni agi hawaɗ givin namma kiyo, kay asi mbuɗ ki ni njenjee, agi golom ki ni njenje may.

³⁶ Na may lini nam ndi ni duk mbona hu goloŋga ɗowba hu goloŋ ma mbussa ni mbo namma tew tew ni teteɗ, na may sa ma tli ɦaa va namma ay ki duk mbonana mbuɗ ki njenjee.

³⁷ Lini ɦaa va namma ndi duk njaf tlesuu zaara wa ni, njaf tle asina tew tew ni teteɗ.

³⁸ Lini ɦaana ndi duk wa ma sa vo yona ki kamma, wa namma mbuɗ ki ni njenjee.

³⁹ «Lini yoo maŋ ma vona miɗ wa ni, sa ma tin kom eg yoo ma miɗi namma ki ni njenje ta ta fiɗigiya.

⁴⁰ Sa ma kom tliw va nammana mba mbus barawi mamsina kiyo, nam mbuɗ ki ni njenje ta ta fiɗigiya. Sa ma tli maɗ va namma ha kina mba mbus barawi mamsina kiyo, nam ki ni njenje ta ta fiɗigiya.

⁴¹ «Gor tlesuu gori suu tuɗ kay ndaŋgara halaŋ agi komosiɗi, tle asina ki ni dooriya sa komosiɗi.

⁴² Gor tlesuu ɦaram kaŋga asina u suu tuɗ u sesi fiɗi fiɗina halaŋ, agi komosiɗi, kay asi ki ni dooriya.

⁴³ Mbuɗ tagi ki njenje u komba kom tlege asinaraɗi, ka agi ɓeŋ tagi ki u asiɗi, ka mbuɗ tagi ki njenje u tle asinaɗi.

⁴⁴ Kay anni Yawe, Loogina, agi lagi tagi ki teteɗ a mbuɗ tagi ki teteɗta kay an tanda ki ni teteɗ. Agi mbuɗ tagi ki njenje u tlege suu asinaɗi.

⁴⁵ Kay ni an, Yawe, ma cukugi ay ki hu mbassa Egipterana kay a agi wi ki ana anni Lona, agi mba li tagi ki teteɗ, kay an ki ni teteɗ.»

⁴⁶ Gola ni gaɗta kay yoorina, layagina u tlesuu iirina halaŋ suu duk mbonana u suu kolo kay ndaŋgarana lay.

⁴⁷ Asi ni a ɓorow duk tlesuu njenjena ki u tlesuu teteɗna, yoori suu komba u yoori suu ka kombina.