DI BOLLA 3 - Boy Lonana

Megelay ni buurum kaa

¹ Megelay hu duliyara ni buurum ma ay ŋgaayna kaa.

² Buu ma vuɗta ni dew, buu ma miɗna ni dew may. Buu ma zaa tlena gana ni dew, buu ma feɗta ni dew may.

³ Buu ma ci kina ni dew, buu ma garaɗta ni dew may. Buu ma to zina kina ni dew, buu ma minda ni dew may.

⁴ Buu ma tiina dew may, buu ma sanda ni dew may. Buu ma yoo tara ni dew, buu ma luu njoŋŋa ni dew may.

⁵ Buu ma gik gogoyra ni dew, buu ma vaa gogoyra ayna ni dew may. Buu ma furi mbokŋana ni dew, buu ma ka min mbokgina ni dew may.

⁶ Buu dew a hal ayra, buu dew a ba ha kira may. Buu dew a ɗokka, buu dew a ba kira may.

⁷ Buu dew a haa kira, buu dew a ɗeera may. Buu dew ma seŋ tara, buu dew ma ɓakŋa may.

⁸ Buu dew ma minda, buu dew ni ma gonokka may. Buu dew ma duuna, buu dew ma heɓpa may.

⁹ Sa ma yalna loɓ tam a min tlena, va ma nam a fam huna ni mege?

¹⁰ An wi sunda Lona ɦaɗ ka kay goryoŋ Adamma a asi laɗta.

¹¹ Sana li tlesuu jivina ni hu liisiya liisiya. Nam ɦasi saara wi buurusi ma ha fokŋa hurusi lay. May asi ka wi ŋga buu nammaɗi, kay sa warna ka ndak a wi dlara Lona laɗta col ay hu tin ura day ta ta daɓpara ki belɗi.

¹² An wi ki ana sa warna vaam kaɗi. Nammi kay a li ayra may, furi hu buurum ma nam ka iiri nde wannara may.

¹³ Hu li ma sana ka ti may, ci may, furi kay loɓom ma nam lamma, halaŋ ca ni ɦalla vi Lonara.

¹⁴ An wi ki ana va ma Lona lamma kakŋi na din din. Sa ka cuk va ma daŋ kambi lay, ka yow kiɗi lay. Lona li dla ndaɗta na ni kay a sa warna mba lam ndaaramu.

¹⁵ Va ma ka li cemina ni va ma li ay ki fok jewna. Va ma hin li ha fokŋa ni ma li ay ki fok jew dayna. Lona hoŋ va ma li ay ki fok jew day dayna aya.

Kaɓakŋa u warakŋa

¹⁶ An wi dlara ka li hu duliyara wandara olo ni, li ma jivira u ɗegeera a li huna, hin li ki hu ni cora hu bay ɗegeera.

¹⁷ An ɓak tan hurun ana, Lona hin kaɓakŋa kay sa ma cona u sa ma ɗegeena halaŋ kay buu namma hin mbaa, ni kay tlena u sunda halaŋ.

¹⁸ An ɓak tan hurun kay sa warna ana, Lona a tukumi tukiya, kay a sana wi ki kam ana nammi ko yoorina na may.

¹⁹ Kay dlara li sa warna li yoorina ni na lay, hani fun taɗ na dew. Sa warna miɗ may, yoona miɗ ni na may. Asi halaŋŋi u musukka hurusiya. Ŋgolla vi sa warna kay yoorinara ni ɦawaa. Halaŋ ca ni ŋga tara.

²⁰ Kay halaŋ tuɗ ni hu li ma dewna. Halaŋ col ay ni duk ndaŋgara, halaŋ hin hoŋŋi ga duk ndaŋgara.

²¹ Sa ma wi ana musuk sa warna tuɗ ni kolo may, musuk yoorina hoŋŋi ga mayna ni gege?

²² An wi ki ana va ma jivi kay sa warna su yoorina kaɗi, ka nam furi kay sun mamba ana ndaɗ ni ta jivira hol naɗi. Sa ma wi dlara hin li ka ŋgorom daganda ni gege?