2 TESALONIKŊA 3 - Boy Lonana

Cenegi kamiya

¹ Gorsenna, cenegi Lona kamiya kay boyna vi Bu Suuna zul ha ki foko a suuna ŋgaamu ko nam varagi wanda na may.

² Kay ami mba buɗ ki ko suu co suu ka ŋgaf u saɗina. Kay suuna halaŋ ka suu vina belɗi.

³ Na may Bu Suuna ɗegee, njun ugiya, ɦagi saɓakŋa, gologi ko Sa ma Cona.

⁴ Bu Suuna ɦami huu ma jivina egegiya, Lona njun umiya a wi ana agi ka li u boy ma ami daginana a agi hin li na gak gak.

⁵ Ko Bu Suuna njun ugiya agi min Lona u juɓpa lalamba u Kristu.

Jivi sunda

⁶ Gorsenna ami gaɗagi fok Bu Suuna Yesu Kristu, taɓagi u gorsegi suu zolombaɗi, asi ka min hum u haɗta ami haɗasiraɗi.

⁷ Agi kay tagira wi ana agi ndak li ko ami lira na may. Ami ay varagi nani lami zolom kaɗi.

⁸ Ami hin tami ay ka a ti funa vi suuna ɦawaɗi. Ni na ɗow ami li sunda coco, koɗta mami kaɗi, ami li sunda fali lay njeŋge lay, ka hin tami kay sa ɦawaɗi.

⁹ Ami ndak gin a agi ɦami vaa, ami li ka naɗi kay ana agi li ko ami lira na may.

¹⁰ Hu li ma ami ay varagi nani ami dagi anaba, «Sa ma ka min a li sunɗina ni nam ti vaɗi may.»

¹¹ Ami ɓakagi nani kay ami hum ana suu daŋŋa ka dukugiya zolomo. Ka li vaɗi lay, kal tasi duk dlara vi suu daŋŋa.

¹² Su asina ami min dasi u sem Bu Suuna Yesu Kristu ana, asi li sunda tew tew a fi tiisina kay tasiya.

¹³ Agi tagira may ni gorsenna hinigi jivi mayra agi laɗta kiɗi.

¹⁴ Lini sa ma ka min hum u gaɗta ami ɓiirigira ha hu magara wandaɗini hinimu, taɓagi u nambi, nam mbuɗ ki zolona tuwa.

¹⁵ Ni ka ana agi golom ko sa ma gonokka naɗi, a agi neem ko wayagina na.

Paɗ vunna u gideɓpa

¹⁶ Ko Bu Suuna ma ɦal heɓpa ɦagira u tamba tew tew, hu lina halaŋ. Ko Bu Suuna li u agi halaŋ.

¹⁷ An ɓiirigi magara u kon tanda Paulla, gagi deɓpa. Ni na an ɓii sen hu maga manda halaŋ halaŋŋi ko wanda ni na.

¹⁸ Ko oora vi Bu Suuna mayna, Yesu Kristu, kak u agi halaŋ.