2 TESALONIKŊA 2 - Boy Lonana

Sa ma cona

¹ Kay hoŋga Bu Suuna Yesu Kristu hin hoŋ ayra, ay hin moli egem lay, gorsenna ami cenegiya kay tokka ay hin tok egemba,

² mbuɗugi ndaa zakgi, mbuɗugi ŋgusugi dlagagi ko buu ma vi Bu Suuna mba kiwa naɗi. Sa ma jok vun Lona kala, sa ma di boyna kala, ma dagiwa ana ami ɓii boy namma ay hu magara.

³ Hin tagi a sa ganagi yagiɗi. Kay buu namma ka mba ki jew bay sa ma cona tak tam ki jew duu ma daɓ dagannaɗi. Ɓakŋa ay ki kaay kam paŋ.

⁴ Nam hin duu u tlesuu suuna goɓ kaŋga fokosina u tlesuu suuna golosi ko lona nana halaŋ, nam kal hu Ziŋ Lonara, mbuɗ tam ki a Lona lay.

⁵ Humugi ka gagi kay boy manna an dagina mayra an ha varagiraɗi su?

⁶ Na may va ma dew ka doo dla ndaɗta a lira cecemi tuwa, agi ka wi dla ndaɗta. Sa ma Cona hin mba ni hu buu ma ŋgaayna tuwa.

⁷ Saɓak ma ŋgayna vi Sa ma Cona ka li sunda cecemi. Sa ma dooromma kal kiwa ni, dla ndaɗta hin li ni na tuwa.

⁸ Hu li namma Sa ma Cona kal ay ki wanni Bu Suuna Yesu hin cam ki u musuk ma funumma lay, bulumum ki u bibiŋil mamba nam mbara.

⁹ Sa ma Co ma hin mba na u saɓakŋa vi Satanna, hin li dlara mbuɗ mbuɗta zet zet, li takka, ura ndandalla kaboyna.

¹⁰ Nam hin li njaf cora halaŋ halaŋ a gan yam suuna a baasi kira. Asi hin ba kiyo kay asi vi gasira kaɗi lay, min gasira ndak a suɗusi kira kaɗi lay.

¹¹ Ni kay ndaɗta Lona gasi irisi hu saɓak ma viɗisi kina, kay asi vi u dlara kaboyna.

¹² Kay ndaɗta suu ka vi u gasiraɗina halaŋ, furi ni kay dla mayra cora. Ɓakŋa vasiwa.

Lona managi a suɗugi kiyo

¹³ Gorsenna, ami gideɓ Lona kagi tew tew agi suu Bu Suuna minigina. Lona managiya kay agi mba suɗ ki fok jew u saɓakŋa vi Musuk Lonara ta mbuɗugi maŋ Lona kay tin hurugi kay gasira.

¹⁴ Lona yagi ay ni u Boy ma Ayra ma ami dagina na. Nam yagi a fi ɓorow magira hu ŋgolla vi Bu Suuna Yesu Kristu.

¹⁵ Gorsenna kakagi saɓaki vagi u boy ma ami haɗagina na, u ma ami ɓiirim hu magara na.

¹⁶ Ko Bu Suuna Yesu Kristu u tamba u Lona Buy ma miniygina u jivi mamba ɦaygi so huu ma din dina u juɓpa lalamba.

¹⁷ Nam oyogi hurugi u soo huna, ɦagi saɓakŋa a li u dla mayra jivira, u sunda, u boyna lay.