2 TESALONIKŊA 1 - Boy Lonana

Gideɓpa

¹ Ni an Paul, Silas u Timote ɓii maŋ suu vi Kristuna hu Tesalonikŋa, suu vi Lona Buna u Bu Suuna Yesu Kristu.

² Ko Lona Buy ɦagi oora u heɓpa u Bu Suuna Yesu Kristu.

Kristu hin mba a kaɓakŋa kay suuna

³ Gorsenna, ami gideɓ Lona tew tew kagiya. Dla ndaɗta jivira na ni kay viigira ka wul fok cocoo, ko minda agi min tagira tuɗ ha fok na din din.

⁴ Ni kay ndaɗta ami ŋgaami tami kagiya kay suu vina vi Lona ni kay ɦiŋ magira u viigira agi ka siɓ lassa u wihawra.

⁵ Ni tak ki ɗegeera kay kaɓakŋa vi Lona, a agi li suu ndaki kay mulla vi Londa ta agi ka wihawra kaɗta.

⁶ Kay Lona u ɗegee mamba hin cuk wihaw magira kay suu ka lasagina.

⁷ Nam hin ɦagi koɗ tara magi agi suu ka wihawrana u ami lay. Ni hu li ma Bu Suuna Yesu kal ay ki huulona u suu sunda hu lona suu saɓakŋa umu.

⁸ Nam hin mbay ki duk sin kura ŋgolla a kaɓakŋa kay suu ka wi Lonaɗina, ka vi Boy ma Ayra vi Bu Suuna Yesuɗina.

⁹ Kaɓak masina ni ɓalakka a fafatta, ha ki day eg Bu Suuna u saɓak mamma bibiŋilna.

¹⁰ Ni hu buu ma nam hin mbana, suu mamma hin geleɗemu, kay suu tin hurusi kamma halaŋ hin goɓ kaŋga fokomu. Agi hin li ni duk suu asina lay kay agi vi u boy ma ami damma.

¹¹ Ni kay ndaɗta ami cen Lona kagi tew tew a Looyna mba mbuɗugi ndaki kay iirira nam yagi kaɗta. Ami cen Lona kay nam li u saɓak mamma kay dlara nam ŋgaaɗta halaŋ, u jivi mamba u sun magira agi laɗ u vira.

¹² Kay ndaɗta a sem Bu Suuna Yesu mba fi geleɗta ugiya. Agi fi geleɗta u Yesu may. Ni oora fi Looyna u Bu Suuna Yesu Kristu hin lini na.