2 PIYER 2 - Boy LonanaSuu co suu haɗ haɗta cora ( Jud 4-13 ) 1 Buu ma dew ni suu haɗ haɗta cora mba duk suuna, suu haɗ haɗta co ndaɗta hin mba dukugi na may. Asi hin mba tin gaɗta cora ɓeŋ suuna kira, sa ma suɗusi kina asi hin noyom kiyo, asi cuk tasi hu bara ba kira zak ni kay tasiya. 2 Suuna ŋgolo hin tuɗ usi hu dlaasira cora u dlaasira asi laɗta suuna hin ŋgul voɗta gasira. 3 Saa masira ni kay a fi gursura, suu haɗ haɗta co asina hin taɗagi usi u dlara ka gasiɗira. Sa ma kaɓakŋa kasina kaki day day ka buu senɗi, ɓeŋ masira ka juɓ ta taɗi lay. 4 Lona hin suu sunda huulona suu li cora kaɗi cukusi duk kura njunusi kaŋga duk li ndufunna kay juɓ buu ma kaɓakŋa. 5 Lona hin ndaŋgara basira kaɗi, nam tli yo ma ŋgolna ki kay ndaŋgara ci suu cona kiyo. Nam hin suɗ ki ni Nowa ma di boy ma jivina kina doy hol u suu daŋŋa kiɗisiya may. 6 Lona kaɓakŋa kay ɦoŋzi ma Sodomma u Gomorna ŋgalasi ki u kura, nam tak suu li cora ana hin li fok u asi ni na may. 7 Lot, sa ma ɗegeena, nam suɗum kiyo nam fi yoora ŋgolo ko dla co mayra suu nam kaki dukusina laɗta. 8 Nam sa ma ɗegeena kaki dukusi wi lay, hum lay, hu buuna tew tew hurum ɓeŋ ki cocoo kay sun masira cora. 9 Bu Suuna wi dlara suɗ suu ɗegeena ki duk dla cora, nam wi a vaa suu cona cukusi daŋgayna hu buu ma kaɓakŋa. 10 Suu li dlara njenjera u minda vi mbalatasina ŋgul ŋgolla vi Lonara ni nam hin cukusi daŋgayna. Suu haɗ haɗta cora an dagi kasina, ni suu ŋga tasina, suu li tlena zak, bay saara, asi ka ɦal ŋgara maŋ suu ŋgolo suu huulonaɗi, ŋgulusi ŋguliya. 11 Suu sunda huulona suu garaŋŋa u saɓakŋa su kay suu haɗ haɗta cora asi ka ŋgul suu ŋgolna suu huulona fok Bu Suunaɗi. 12 Na may saa masira ni ko mburi suu cona na, asi vuɗ ni kay suuna hin vasiya, casi kiyo, asi ŋgul dlara asi ka waɗɗira. Hu dlaasira cora asi hin ba kini ko mburina na may. 13 Asi hin fi warakŋa u lassa kay coosira asi laɗta. Hurusi li ayra kay luu masi ma cona li dlara dawira ii suuna. Taɓpa asi taɓ u agi a ti funara ni va ma daɓ semma u va ma zolona kay asi li dlara ganyamba dukugiya. 14 Irisi hal ni dlara zoŋga, cora ka ndakasi liraɗi, asi ganyam suu maŋina, hurusi oyra u kurufuk begera, givun ma vi Lonna ka kasiya. 15 Asi hin voɗta ɗegeera ki tani asi viɗ ki wa, asi tli voɗta Balaam, goŋ Bosorna, tlaɗta, nam min a fi begera u dlara laɗ cora. 16 Nam fi gaɗta kay ŋgel vun mamma korra ndumura ɓakam ko ndal sa warna na, doo sa jok vun Lona namma kay dlaamba uɗ kaɗira. 17 Suu asina ni ko mbo goloŋ ma ki sooyna na asi ni ko ɗugulla semeɗna valawaɗ kira na. Lona min lina ha kasi hu zulla ŋgolla duk ndufunda. 18 Asi ɓakŋi dlara ŋga tasira u boy ma bay umma, asi li sunda u min masira hu tliwna a ganyam suu hal a suɗ tasi ki duk suu hu dla corana. 19 Asi dasi ana, asi hin buɗusi ki hu mbaɓura, na may asi kay tasira ni mborɓii suu a bagina, gegelay ni mbaɓuna vi va ma nam su kamma. 20 Lini suuna suɗ tasi ki ko dla cora hu duliyara wa ni kay asi wi Bu Suuna Sa Suɗta Yesu Kristu, asi hoŋ yasi kaŋga hu dlaasira cora hin dlaasi ndaɗta su kasiya daɓ masira hin mbuɗni co sura jewra. 21 Asi wi voɗta ɗegeera ka ginɗi ni mariyaɗ su mayra asi waɗ ki wi ni hin hoŋ ki dagan noy gaɗta teteɗta kira. 22 Dlara li egesira ni ko vun ŋgolna di ana, «Dina hoŋ ti va ma nam vinim kina, kosoŋ ma mbus tam kina hoŋ bulum duk doroɓma olo.» |
Bible Moussey © Bible Society of Chad, 2002.
Bible Society of Chad