2 MULINA 22 - Boy Lonana

Josiyas, mul ma Yudana

¹ Josiyas kak a mulna ni basaɗammi kalavandi. Nam ti mulla hu Yerusalemmi basara dok-hindi yam dew. Sem sum ana Yedida, ni goora Adayara hu ɦoŋzi ma Boskatna.

² Josiyas li dlara ɗegee ii Yawera tli kommi voɗta vi bum ŋgolo Davidta na ɗegee, ka tuɗ irim bik njufu bik guluɗi lay.

Mul ŋgol ma li ɓivunna fi gaɗta vi Lonara

³ Fali taa dew mulna Josiyas hu basaɗamba doogo yam kalavandi ta nam basa hu mullara ni nam sun saam ma ɓiira, Safan, ma goŋ Azaliyana, goŋ Mesulamma, ha hu Ziŋ Yawera dam ana,

⁴ «Tuɗ kolo eg mul ŋgol ma li ɓivunna, Hilkiya. Nam ndum gursu ma suuna taaram ha hu Ziŋ Yawera kiyo, ma suu juɓ vun zina tokom ay ko suunana halaŋ.

⁵ Asi ɦal gursu namma maŋ suu li sunda, maŋ suu ŋgolo suu ka fok suuna hu Ziŋ Yawerana a asi gus tlesuu hu Ziŋ Yawera suu ki ɓalakina, minisi kiyo.

⁶ Suu ceɗ guna, suu minda u suu wi dla min ziginina halaŋ, asi gus mbal ma ŋgolona u ɦini mayra ceɗira kay a min Ziŋ Yawera kiyo.

⁷ Ka sa golosi u gursu namma kosiɗi kay asi li sunda ni ɗegee u hurusi halaŋ.»

⁸ Mul ŋgol ma li ɓivunna di Safan sa ma ɓii dlara kaŋgana ana, «An fi magaara gaɗta ɓiiri hurawa ay gi hu Ziŋ Yawera.» Hilkiya ɦal magaa ndaɗta maŋ Safan. Nam ndumuɗu.

⁹ Sa ma ɓii dlara kaŋgana mbay eg mulna, cuɗum boy namma dam ana, «Suu sun maŋsina cuk gursu ma asi famma ha hu Ziŋ Yawerawa, ɦam ha ko suu li sun ndaɗta, maŋ suu ŋgolo suu hu Ziŋ Yawerana.»

¹⁰ Ŋgoo dagan sa ma ɓii dlara kaŋgana, Safan, hin di mulna ana, «Mul ŋgol ma li ɓivunna, Hilkiya, ɦan magaa taa ay dew.» Safan hin ndum magaa ndaɗta ki fok mulna.

Josiyas joɓ cara jok vun Lona Hulda

¹¹ Hu li ma mulna hum boy ma ndum ay hu magaara gaɗtana na ni, nam haa barawi mam suu cuki tamma kiyo.

¹² Ŋgoo dagan nam ɦal voɗta maŋ mul ma li ɓivunna, Hilkiya, maŋ Ahikam ma goŋ Safanna, maŋ Akbor ma goŋ Mikayana, maŋ sa ma ɓii dlara kaŋgana, Safan, u Azaya sa ma li sunda vi mulnana dasi ana,

¹³ «Tuɗugi joɓogi Yawe ay kanu, kay suuna halaŋ, kay mbassa Yudara lay, kay boy ma di hu magaara gaɗta wannana. Boy namma ni ŋgol cocoo. Yawe hurum ki ni ɓeŋi egeygiya, kay somoyoygi hum ay ka u gaɗ ndaɗtaɗi. Asi li ka u dlara ɓiiri hu gaɗtaraɗi lay.»

¹⁴ Mul ma li ɓivunna Hilkiya, Ahikam, Akbor, Safan u Azaya tuɗ fi cara jok vun Lona, Hulda. Ni caŋ sa ma juɓ u barawina, Sallum ma goŋ Tikwana, goŋ ŋgolo Harhasna. Ndaɗ cuki ni hu Yerusalem hu ɦoŋzi ma wilina, hu li ma asi daɓ ɓak ma cuɗuɗnana may ni,

¹⁵ ndaɗ dasi ana, «Gola, Yawe, Lona vi suu Israelna, di ana, Tuɗ dagi sa ma sunugi ay egenna ana,

¹⁶ Yawe di ana, An hin mbaa yoora kay li namma, kay suu cuki hu li nammana lay. Li dla mayra hu magaara gaɗta ta mul ma Yudana ndumuɗ wanda ki halaŋ.

¹⁷ Kay ana asi noyon kiyo. Asi ŋgal mbitla his jivira ni maŋ loogi suu daŋŋa. Asi ɓalakan hurun ki u sun masira asi laɗ u bik kosira. Yaanda tli kura eg li nammawa, ndaɗ ka tew oloɗi.

¹⁸ Na may agi tuɗ di mul ma Yuda ma sunugi ay a joɓ Yawena ana, Gola, Yawe, Lona vi suu Israelna, di ana, Aŋ hum boy namma ki jiviya,

¹⁹ kayra aŋ hum boy namma, nam ŋgeneŋ huruŋ cocoo, aŋ hoŋ yaŋ kaŋga fok Yawe hu li ma aŋ hum dlara an daɗ kay li namma u suu ɦurummara ana li namma hin mbuɗ ki ni li ma ɦawana, li ma gam vunna kina. Kayra aŋ haa barawi maŋsina kira, aŋ tii coco fokon lay, jiviya an may ni an hum wa. Yawe di ko ndaɗta na.

²⁰ Kay ndaɗta aŋ hin tuɗ kaŋga eg somoyoŋŋi u jivira, aŋ hin nda fasi ni u heɓpa. Iriŋ ka hin a wi hahawra an hin a mbaaraɗ kay li nammaraɗi.» Suu sunusi ha asina mbaa hoŋ dira ki maŋ mulna may.