2 MULINA 2 - Boy Lonana

Lona tli Eli kolo iiriya

¹ Gola ni dla mayra li hu li ma Yawe a tli Eli kolo duk mbirwinda ŋgollana. Eli u Elize yow ay ko tasi ay hu Gilgal.

² Eli di Elize ana, «An ceneŋŋi ceniya kak ka tani, kay Yawe sununni hu Betel day.» Elize hoŋom dira ana, «U sem Yawe ma ka iiri din dinna, u seŋ aŋ taŋga, an ka ɓorow ki u aŋgi.» Asi mba tew kaŋga hu Betel.

³ Suu jok vun Lona suu ka hu Betelna ɦuɗ tasi ay eg Elize dam ana, «Aŋ wi ki ana Yawe hin tlaŋ karam sa ŋgol maŋŋa kolo duk semeɗnara su?» Nam hoŋosi dira ana, «An lay ni wiya, seŋegi vunugi haa.»

⁴ Eli di Elize ana, «An ceneŋŋi ceniya kak ka tani, kay Yawe sununni hu Yeriko day.» Nam hoŋom dira ana, «U sem Yawe ma ka iiri din dinna, u seŋ aŋ taŋga, an ka ɓorow ki u aŋgi.» Asi mba' tew ki hu Yeriko.

⁵ Suu jok vun Lona suu ka hu Yerikona ɦuɗ tasi ay eg Elize dam ana, «Aŋ wi ki ana Yawe hin tlaŋ karam sa ŋgol maŋŋa kolo duk semeɗnara su?» Nam hoŋosi dira ana, «An lay ni wiya. Seŋegi vunugi haa.»

⁶ Eli di Elize ana, «An ceneŋŋi ceniya kak ka tani, kay Yawe sununni hu lum ma Yurdanna.» Nam hoŋom dira ana, «U sem Yawe ma ka iiri din dinna, u seŋ aŋ taŋga, an ka ɓorow ki u aŋgi.» Asi hin tuɗ ni u tasi jak.

⁷ Suu jok vun Lona na dok-vadl tuɗ col ha ki fun lum ma Yurdanna ha ki eg gi Eli u Elize na ɦuɗ, asi gi Elize tuɗ col fun lumma na tok may.

⁸ Eli fok baraw mam ma tamma, ɗuɗum ɗuɗ ni waɗ mbona u namu. Mbona ɓorow ki duk na mba'. Asi calaɗ ha ki ii hiniŋŋa ni sesi ki ni sooy ɦawa na.

⁹ Hu li ma asi jak ha ki na ni, Eli di Elize ana, «Joɓ va ma aŋ min a an laŋŋana ki jew bay an tli ki kolo egeŋ day tu gaw.» Elize hoŋom dira ana, «An minni ana ŋgus maŋga jok vun Lona mba ka kan seɗ na mba'.»

¹⁰ Eli dam ana, «Aŋ joɓmi va ma loɓ coco lini aŋ wan an tuɗ ha ki kolo egeŋ wa na day ni, ndaɗ hin li ni na tuwa, li ka naɗi ni ka liɗi.»

¹¹ Hu li ma asi ka tuɗ ha ɓak tasi na may ni, gola ni pus pus ma kura, u kulumi suu kura mbay ɓorowosi dukusi ki ni na gaw. Eli tuɗ kolo huulona duk mbirwinda.

¹² Elize wi na ni, sawalla ha kolo ana, «Bunu, Bunu, pus pusna u kulumin suu Israelna.» Hu li ma nam ka wam oloɗi ni nam haa ii baraw mamma ki duk mba'.

¹³ Baraw ma ay waɗi kel Elina cuk ay ki kaŋgaa. Nam yowom kom yow ni, hoŋ ay fun lum ma Yurdanna, mba col fun voona.

¹⁴ Nam fok baraw ma cuk ay ki kaŋga pel bik Elina waɗ mbona u nam di ana, «Yawe, Lo ma vi Elina, ni arage?» Nam waɗ mbona may, mbona ɓorow ki duk mba', Elize hin calaɗ ay ki may.

¹⁵ Suu jok vun Lona suu hu Yeriko suu wam hana di ana, «Ŋgussa vi Elira jok ay kay Elize wa.» Asi ŋgafam ay goɓ kaŋga fokomu.

¹⁶ Asi dam ana, «Suu sun maŋsina asgaari suu wi duuna ka usi na dok-vadl ni aŋ ndak a ɦami voɗta a ami sunusi asi tuɗ hal sa ŋgol maŋŋa, kala ŋgussa vi Yawera tlam ta ni gam ka ki kolo kay ɦini taa kala, kaŋga hu ɦuɗugum taa kala nige?» Nam hoŋosi dira ana, «Sunugi saɗi.»

¹⁷ Na may asi dogom vunum cocoo, tam kaw kaw ni dasi ana, «Sunugisina ɗaŋgi su.» Asi sun suu dok-vadl asina, asi hal Eli ta ta buuna hindi ni fam kaɗi.

¹⁸ Asi hoŋ ay eg Elize hu Yeriko. Nam dasi ana, «An dagi kaɗi su? Dagi ni ana sun saɗi naɗi su?»

Elize mbuɗ yo goloŋga hu Yerikora ki jiviya

¹⁹ Suu hu Yerikona di Elize ana, «Sa ŋgolna ni ko ndal aŋ wi wandara na, kak ma hu ɦoŋzi ma ta ni na jivi cocoo, na may yo ma cira ki coo, mbassa ki himii lay.»

²⁰ Nam di ana, «Ҥangi tassa ma wili maa ay na dew, cukungi vuvuna ay hurum may.» Asi ɦamma ay may.

²¹ Nam kal ay ki tuɗ hu li ma mbona law ay huna, cuk vuvuna hu duk, di ana, «Yawe di ana, mbuɗ mbo namma ki jiviya. Nam ka ci sa oloɗi lay, himii ka oloɗi lay.»

²² Mbona mbuɗ ki jivi ta ta cemi, ko ndal Elize dira na may.

Lona cuk kem suu pan Elizena daŋgayna

²³ Nam tuɗ ha kolo hu Betel, hu li ma nam taɓa ha kolo hu voɗta na ni, gorkemba sel ay ki hu ɦoŋzina panam di ana, «Tuɗa, sa ma yam korina, tuɗ ɗow sa ma yam korina.»

²⁴ Nam pereɗ irim golosi ha na ni gasi vunna u sem Yawe. Na gaw ni bosokona cuk ay ki duk gura na mba', kom ki u gor kem asira na dok-fiɗi yam mba'.

²⁵ Nam hin tuɗ kolo kay ɦinira Karmella, ay hu ni nam hin hoŋ ay ki Samari.