2 KORINTNA 9 - Boy Lonana

Njunda maŋ suu vina

¹ Kay ka jivi coco a an ɓiirigi magaara ha kay a njun u suu vina vi Lona hu Yuderaɗi.

² An wagi min magira, kay ndaɗta an ŋgaagi fok suu Masedoinna ana gorsegi suu Gresna tasi mini a ɦal njunda ki gasam day. Tagira feɗta kay sunda ɦal eŋga maŋ suu hiŋŋa.

³ An sunugi gorsegi suu ha wana kay va ma ami ŋgaagi ki kamma mba li ki ɦawaɗi, an min ana agi li gasi ko va ma an di kagina na.

⁴ Lini suu Masedoinna mbay un wa fagi tagi ka miniɗi ni, ami hin mbuɗ zolona kay dlara ami di kagi jewra zolo namma ka mamina oloɗi, mbuɗ ni magina.

⁵ An cuk gorsenna ha ni egegiya, agi min tagi ha ki fokon jew kay va ma agi di kam a ɦamma. Ni dla ndaɗta hin li zak hu li ma an mbana hin wi ana agi ɦal ni u huu ma jivina ka u ɦeɓpaɗi.

⁶ Humugi gagi kay boy ma di anaba, sa ma zaa ka ŋgolɗina hin feɗ ni ew may, sa ma zaa ŋgolna hin feɗ ni ŋgol may.

⁷ Sana ɦal ni u va ma nam saa hurum a ɦamma, ka va ma sa yoo tam kambi, ka ko ɦeɓpa naɗi lay. Lona min sa ma ɦal u furira.

⁸ Lona ndaki kay a ɦaŋ tlena zeɗ zeɗ su lay kay agi mba fi tlesuu agi minisina halaŋ, usi mba hin kogi a ndakagi kay sunda jivira bel lay.

⁹ Ko magaara dira naa, «Nam ɦal maŋ suu wihawra, jivi mamba ka daɓ kiɗira.»

¹⁰ Lona ma ɦal njaf tlena maŋ suu horokŋa, ɦasi funa kay tiisina, nam hin ɦagi njaf tlesuu agi minsina halaŋ, wulusiya, nam hin zulugi u ɗegee magira fok ŋgolo.

¹¹ Nam hin mba ɦizigi ki u tlen hu lina halaŋ, kay agi mba tak ki ɦiz magira, ni suuna ŋgolo hin gi deɓ Lona kay ɦala agi ɦamira a ami ɦasirara.

¹² Sunda agi laɗta ka ndak daɓ minda vi suu vina vi Lona doy holɗi, mba li ki a gi deɓpa vi suuna bolow fok Lona.

¹³ Sun mayra agi laɗ ndaɗta tak ki kay tagira, suuna ŋgolo mba geleɗ Lona kay hum vun magina ma tak viigira u Boy ma Ayra vi Kristu, asi mba geleɗemu kay ɦiz magira agi ɓorow tlegeyegi ki u asira, u suu daŋŋa halaŋ lay.

¹⁴ Asi hin cen kagiya kay min magira ŋgolla, kay oora vi Lona ta mbuɗ mbuɗta nam laɗ kagira.

¹⁵ Geleɗ Lona kay ɦal mamba ŋgolla bay ŋgara.