2 KORINTNA 6 - Boy Lonana

¹ Ami suu li sunda u Lona ami joɓogiya, hinigi oora vi Lona ta agi famba komba ba kiɗi.

² Lona di hu magaa mamba ana, «An humuŋ vunuŋ hu li ma jivi manda tak kina. An njunuŋ hu buu ma suɗta.» Cecemi lina ndak wa kay fi jivira vi Lonara, karamba ni buu ma sana ndak suɗ kina.

³ Ami saa ana sa ndak ka a ŋgulumi sun mamiraɗi, ni ami ka hal a ganyam saɗi lini hu megelay.

⁴ Ni na ɗow lini hu megelay ni ami tak ana ami ni suu sunda vi Lona. Wihawra li fami lay ni ami siɓimi u lalamba, lini hu haɗ huna lini hu yoora lay.

⁵ Asi waɗamiya cukumi daŋgayna, duumi delemi a halami u boyna, cukumi hu sunda loɓma, ami ka buu senɗi, fi tiɗi lay.

⁶ Ami takami ni sunda vi Lona u ɗegee mamira, hu viimira hu lalam mamira, hu jivi mamira u Musukka vi Lona, u min mamira gasira.

⁷ A gasira vi boy ma ami damma, u saɓak Lonna, u va ma ami lam komi ko ɓagina u mbarina nana ni ɗegeera, a li sa u ndaɗ lay a doo kay tami lay.

⁸ Asi geleɗemi mbaarami zolona kami lay, di cora kamiya di jivira kami lay. Asi golomi ko suu kaboyna na ni ami di ni gasira.

⁹ Ko sa ka wamiɗina doli suuna wami halaŋ, ko suu miɗina na doli ami iiriya, agi lay ni wi boy namma u irigiya. Asi lasamiya cami ka ki maɗɗi.

¹⁰ Asi lami dlara yoora egemi ŋgolo ni ami ka furi tew tew, golomi ko suu hawra na ni ami ɦizi u suuna, ami gol ko ka fi vaɗina ni a gasira tlena ka komi halaŋ.

¹¹ Ami tin vunumi kaɗi dagi kina was was agi banayami suu Korintna, ami mal hurumi ki egegiya.

¹² Ami hurumi ka egegi dugiɗi, agi ni suu dug hurugi egemina.

¹³ An dagi ha ni agiya ko agi ni goryon na, lagi hurugi ki egemi jivi ko ami hurumi egegira na may, malagi hurugi ki egemiya.

Gologi tagi jivi ko dlara vi suu bay vina

¹⁴ Taɓagi u suu bay vinaɗi. Asi ni ka ndarayagi suu dlaagira taɓi dewnaɗi, va ma ɗegeena hin taɓ ko tam u va ma cona ni nanage? Kiɗikka ndak taɓ ko tasi u ndufunda ni nanage?

¹⁵ Kristu ndak taɓ ko tam u Satanna ni nanage? Sa ma vina ndak taɓ ko tam u sa bay vina ni nanage?

¹⁶ Ziŋi Lonara ndak taɓ ko taɗ u fulina vi suu bay vina nanage? Ami ni Ziŋ Lona ma iirina ko Lona u tamba dira na, «An min kak dukusiya, poy u asi lay. An hin li a Loosina asi hin li a suu manna may.»

¹⁷ Ni kay ndaɗta Bu Suuna di ana, «Agi hinisiya taɓagi u asiɗi, taɓagi u tliw ma njenjenaɗi, an tanda may ni hin vagi egenu.

¹⁸ An hin li ni a bugiya, agi hin lini a goryon u gorɓii mansina, Bu Suuna ma Saɓakŋa Kom Belna di boy namma ni namu.»