2 KORINTNA 5 - Boy Lonana

¹ Aygi wi anaba zira aygi ka kagi huruɗ wanda, ni di ana mbalatay ta hu ndaŋgara wanda, ɓalak ki lay ni Lona miniygi zina ha kolo ni zi ma nam minim u tambana kak din din ka daɓ kiɗi.

² Cecemi aygi ka wi hawra, saa maygira kay juɓuygi ziiygi ma kolo huulona kaygina.

³ Hu li ma aygi cukum taygi wa ɗaŋi taygi hin ka li sili oloɗi.

⁴ Ni aygi day day ka kaki hu mbutluɓ ma kaŋga duk ndaŋgara namma, aygi ka wi hawra ko nekka kaygi na. Ka ana ami min ɓorow ki u mbalatamira kay ndaŋgara wanda naɗi, ami min a cuk mbalata mayra kolora egemiya, ma miɗna mba loɗ ki u ma iirina.

⁵ Lona u tamba ŋga ki ana aygi mba wi mbuɗ mayra ndaɗta ni namu, nam ɦaygi Musuk mamba ko vama nam ŋgaygin ki fok jew maygina na.

⁶ Ami tew tew ka u ɦiŋga hurumiya. Ami wi ana hu li ma ami kaki hu mbalatami ndaɗta tuna, ni ami ki day eg li kakka vi Bu Suuna tuwa.

⁷ Ami ka tuɗ fokomi u vira bay wi u irimi tuwa.

⁸ Ami ka u ɦiŋga hurumiya, min a hin mbalatamira ndaɗta kiyo, tuɗ kak eg Bu Suuna.

⁹ Lini ami ka hu mbalatamira wanda lay, lini ami hiniɗ ki lay, ni ami li ki irim jivi jew tuwa.

¹⁰ Aygi halaŋ hin mba ŋgaygi taygira hu ɓakŋa fok Kristu, kay gegelay mba fi va ma nam lamma, hu li ma nam ay hu mbalatam tuna, lini jiviya lini coo.

Taɓaygi dukuygi u Lona ni Kristu

¹¹ Aygi waygi dla mayra di ana li ndaa Bu Suunara, ni ay hal a vi suuna. Lona waygi ki ɗal ɗal an saa ana u hurugi lay, agi tagira wanni na lay.

¹² Ami ka hoŋ a gijaŋŋa a ŋga tami fokogi na ɗowɗi, ami min ɦagi voɗta kay agi ŋga tagi kamiya, ni agi ndak a hoŋ dira maŋ suu kaki buru ɦawana, ka kay va ka hurusinaɗi.

¹³ Lini yal ka irimiɗi ni kay Lona, lini yal mamina kaa ni kagi agi may.

¹⁴ Minda vi Kristu ɦeɓemiya, ami suu wi ki gasi ana sana dew miɗ kay suuna halaŋ, gegelay mba fi miɗ mamma u namma.

¹⁵ Nam miɗ kay suuna halaŋ kay suu ka iirina mba kak iiri kay tasi oloɗi, kakŋi kay sa ma miɗna, hin paɗ ki kolo iiri kasina.

¹⁶ Ni ami ka golomi suuna ko suu warna na oloɗi. Lini ami gol Kristu ay jew ko sa warna na lay, cemi ami ka golom na oloɗi.

¹⁷ Lini sana ka hu Kristu ni nam mbuɗ ni sa ma wilina, tlesuu basina daɓ ki wa, suu wilina ka ni asiya.

¹⁸ Dla ndaɗta halaŋ mbay ni ko Lona, nam Kristu taɓaygi duk ɦoŋoygi u namu, ɦay sunda a mbaa suuna a taɓ duk ɦoŋga u nam may.

¹⁹ Lona min taɓ duk ɦoŋ suuna halaŋ u namu u Kristu, kay ndaɗta nam ka ndumusi dlaasira coraɗi. Nnam cukumi a di boy dla sunda taɓ duk ɦoŋga.

²⁰ Ami varak balam Kristu a di boyna ko Lona u tamba yagi funumira na. Ami cenegi u sem Kristu hinigi taɓ duk hoŋogi u Lona.

²¹ Kristu coomba kaɗi Lona mbuɗum ki sa ma li dlara cora kay cooygira kay aygi mbuɗ ki suu ɗegeena fokom nam Lona.