2 KORINTNA 4 - Boy Lonana

Begena vi Musukka hu doy luɓuna

¹ Lona u jivi mamba ɦami sunda ni namu, ni kay ndaɗta ami ka mbuɗ maŋiɗi.

² Ami hin ŋgayra zolona kiyo, ami ka lami u hu ma conaɗi, ami ka tlumumi ii Boy Lonanaɗi. Ami takami ni gasira vi Lonara na ɗow, ami gaɗami suuna kay wiisira hurusira halaŋ fok Lona.

³ Lini Boy ma Ayra ma ami ka damma ki kiɗiki, ni nam ii suu ba kina ni ndufun lay.

⁴ Asi ka ndak a viɗi kay lo ma co ma hu ndaŋgara tanina kuluɓusi yal masina ki wa. Lo namma doorosi kay a wi kiɗikka vi Boy ma Ayra ma tak ki kay bibiŋilla vi Kristura, ma tli tam u Lonna.

⁵ Ami ka ɓak boyna ni kay tamira gawɗi, ami di boyna ni kay Yesu Kristu Bu Suuna, ami di kay tami ana ami ni suu sun masira kay sem Yesu.

⁶ Lona di ana kiɗikka weleɗ duk ndufunda nammi sa ma hin kiɗik mamba weleɗ huruygina, kay ɦaygi bibiŋilla vi Lonara u kiɗik maɗta weleɗ fok Kristu.

⁷ Ami suu ka u begena vi Musukka komina, ami ni ko doy luɓuna na, kay sana wi ki ana saɓak mami ma mbuɗ mbuɗta namma col ay ni ko Lona ka komi amiɗi.

⁸ Njaf lassa fami zeɗ zeɗ ŋgolo ni cami kaɗi, ami mbuɗ ndaa ŋgol lay ni hoŋ ka ki daganɗi.

⁹ Asi lasami lay ni Lona hinimi ka kiɗi, gami kaŋga gog gog lay ni cami ka kiɗi.

¹⁰ Ami tlami miɗna vi Yesu kami tew tew, kay iiri mamba tak ki egemi lay.

¹¹ Hu iiri mamira ni ami tew tew laki fun miɗna kay sem Yesu kay iirira vi Yesura mba tak ki eg mbalatamira miɗira.

¹² Ni ndaɗta miɗna li egemi may, iirira li egegi agi may.

¹³ Magaara di ana, «An viya ni an ɓakŋi kay ndaɗta,» ami halaŋ taɓi hu ŋgussa vi vira ndaɗta, ami viya ni ami ɓakŋi kay ndaɗta.

¹⁴ Ami wi ana Lona paɗ Bu Suuna Yesu ki kolo iiriya, nam hin paɗami ki kolo iiri ko tami u Yesu may, aygi hin taɓi ko taygi dew fokom namu.

¹⁵ Tlesuu asina halaŋ li na ni magi agiya, ni kay ndaɗta oora vi Lona ndak ki kay suuna bolowo, vay u dlara ki halaŋ hu cenda fok Lona u bibiŋil mamba.

Kak Iiri hu vira

¹⁶ Ni kay ndaɗta ami ka mbuɗ maŋiɗi. Lini mbalatami ka ɓalak ki hu buuna tew tew lay, mbalatamira ŋgussa ka mbuɗ wili hu buuna tew tew may.

¹⁷ Wihawra feɗta ka tuɗ kami cecem lay li kami ni bibiŋilla ŋgolla ka daɓ kiɗi, ndaɗ ŋgol saɓak su wihawra ndaɗta.

¹⁸ Ami tin hurumi ni ka kay va sa wam u irimbi, ni kay va ma sa ka wam u irimbina. Va ma sana wam u irimma ka kak ŋgolɗi, va sa ka wam u irimbina kak din din ni namu.