2 KORINTNA 13 - Boy Lonana

Gaɗta daɓ daganda u gi deɓpa

¹ An tuɗ ha varagiya ni a yanda hindira, boy ma sana mbaaram kay ndarammana suu dikina li mba' kala hinda kala ko magara dira na.

² An min di yam suu li cora ay ki jewna u suu daŋŋa halaŋ lay, an dagi ki jew hu li ma an ay varagi a yanda mbara cecemi an ha ka dukugiɗi hin ha fokka an tuɗ ha varagi wa ni an ka wi hahaw sa oloɗi.

³ Agi hal ni tuk mayra Kristu ɓakanda hurunda ni agi hin faɗ may. Kristu ka maŋi kagi agiɗi nam tak saɓak namma ki dukugiya.

⁴ Nam ay ki ɓali kolo hu gu ma garakŋa ni kay maŋi mamba, nam ka iiri u saɓakŋa vi Lona. Hu taɓpa u namba ami ni maŋi may, u lira ami ka li u agira ni ami kak iiri u nam hu saɓakŋa vi Lona.

⁵ Gologi tagi u tagira kay wi anaba agi ka kaki ni hu vira su? Agi wi tagi ana Yesu Kristu ka hurugiya naɗi su? Agi gol tagi a tukka mba hoŋ kagiɗi.

⁶ An saa ana agi wi kagi ana ndaɗ ka hoŋ kami na ɗowɗi.

⁷ Ami cen Lona ana agi li va coɗi, ami hal a tak saɓak maminaɗi. Halni ana agi lagi jivira, lini ami ka saɓakgi lay.

⁸ Kay ami ka ndak a ɓeŋ gasira vi Lonara kiɗi, ami ka ndak a laɗɗi ni li na ɗow.

⁹ Hu li ma ami maŋina ni ami furi ni furiya na ɗow, doli ni agi saɓak may kay hu cen mamira ni ami ka joɓ kagi ana agi mbuɗ ki ɗegee.

¹⁰ Kay ndaɗta an ɓiirigi magaara ko wani na kay an ki egegi day ni kay hu li ma an mba ha dukugi wani an ka hin lagi co kay ŋgolla suuna ɦandaraɗi ŋgol ndaɗta ni kay a wulugi kolo hu vira ka a ɓeŋegi ɓeŋi na ɗowɗi.

¹¹ Gorsenna lakagi u ayra, lagi ɗegee gaɗagi tagiya tagiya, minigi tagiya, lakagi u heɓpa Lona mala minda mba li u agiya.

¹² Gagi deɓpa furira duk tagiya tagiya, suu vina vi Lona halaŋ gagi deɓpa!

¹³ Ko oora vi Bu Suuna Yesu Kristu, minda vi Lona, u taɓpa vi Musuk Lonara mba kak u agi halaŋ.