2 KORINTNA 12 - Boy Lonana

Dlara ŋgayra Lona takaɗ ki ii Polla

¹ Lini nanagelay ni an ŋga tanu ŋga tara ka maɗ jiviɗi lay ni an min ɓak cecemi kay va ma tak tam irinu u dlara ŋgayra ta Bu Suuna takandara.

² An wi sa ma vina dew basara ki ca ni doogo yam fiɗi, tlam ha kolo huulona ma hindina, ni u tamba kala hu ŋgussa kala, ni an wiɗi, Lona dew wi ni namu.

³ An wi kan gasi ana sa namma tlam ha kolo ni u tamba kala lini ŋgusum kala, an wiɗi Lona dew wi ni namu.

⁴ Sa namma tlam kolo hu Paradis ni nam hum boy ma sa ndak ka a dam kiɗina, boy namma voɗta ka a sa dam kiɗi.

⁵ An ŋga tan ni kay sa namma lini kay tanda ni an ka a ŋga tanɗi, li ay halaŋi tak ki ni maŋi manda ɦawaa.

⁶ Lini an min a ŋga tan lay an ka hin li a sa ma laɓaɗi kay mege an dini gasira ni an hin ŋga tara kiyo, an ka min a sa saa kan ŋgol su dla mayra nam wan an laɗta u mayra nam hum an diraɗi.

⁷ Va ma dooron ana an a ŋga tanɗina a wi dlara mbuɗ mbuɗta ni nam kusun wayara duk tliwinu, mba egenni ko sunda vi Satan na kay waɗanu a dooron kay ŋga tara.

⁸ An joɓ Bu Suuna yan hindi a nam buɗun ki ko las ndaɗta.

⁹ Nam hoŋon dira ana, «Oo manda ndakaŋu u tlesuu aŋ minisina halaŋ saɓak manna tak ki hu maŋira.» Hu li ma an ka maŋina an hurun min a ŋga tan u maŋi manda kay saɓak ma vi Kristuna mba njun kanu.

¹⁰ Ni kay ndaɗta an li furira kay maŋira, ŋgulla, wihawra, lassa, u yoora halaŋi an fasi ni kay sem Kristu kay hu li ma an maŋiya doyɗi ni anni saɓaki.

Pol li ndaana ko dlara vi suu Korintna

¹¹ An ɓak ko an mbuɗ ki sa ma laɓana na agi ɦeɓenni agiya, lini nanagelay agi a njun kanni agiya lini an ni ɦawa lay an ka kaɗaki hu va duk suu magi suu vovoɗta suu ŋgolonaɗi.

¹² Sunda tak ana an ni sa vovoɗta gasi, tak ay ki dukugi ɗal ɗal asi takagi dlara sana ka waɗ uɗ ɗira u dlara mbuɗ mbuɗta.

¹³ Va ma an lagina ka egegi ko suu vi suu hiŋŋa naɗina ni mege. Ni kay an loɓogi tagi ay kaɗira ɗowba? Lini na ni heɓegi hurugi ay ki egenu kay coon ndaɗta.

¹⁴ An hin tok a tuɗ ha varagi a yanda hindira an hin ka a loɓogi tagiɗi, an minigi ni tagira ka ni gursu maginaɗi, kemba ka tok gursura maŋ somoyosi ni asi na ɗowɗi, somoyosi tokosi gursura ni asina na ɗow.

¹⁵ Lini anu ni an bas tlegeyen ki halaŋ min bas tanda ki fun lay kay a njun ugiya, lini an minigi ŋgol ko ndaɗta na min magira agi mininda hoŋ ki dagan su?

¹⁶ Wagi ki anaba dlara nek ay ka kon a tinigi kagiɗi, sa ma hin di ana an mbaɗagi vunugi ay ni a vagi u kaboyna ɦawaa.

¹⁷ An hal a mbaɗagi vun va ay kogi u suu an cukusi ha egegina su?

¹⁸ An joɓ Tit ana nam tuɗ varagiya an sun wayaygi ma agi wamma ha um may naɗaŋi Tit vagi va ay kogi su? Nam may an may dlaamira ni fun tami dewɗi su? Poy mamira ni fun taɗ dewɗi su?

¹⁹ Ɗowba agi saa ana ami halni dlara doo tami fokogira ɦawa su? Ami ɓakŋi ko Kristu minda na fok Lona banayanna ami dagi dla ndaɗta halaŋŋi kay a wulugi kolo hu vira.

²⁰ An li ndaana kay an hin tuɗ ha varagini fi dla mayra an miniɗɗira, agi hin fi egenni dlara agi ka miniɗɗira may, an li ndaana ko ɗeɗna, honira, yara, gonokka, ŋgulla, dadagamba, li dla cora, ŋga tara, cuk suuna kay tasiya, an li ndaana kay tlena wanni halaŋ mba li dukugiɗi.

²¹ An hin tuɗ ha a gologi wani an li ndaana kay Lona hinin an a hoŋ yan kaŋga fokogiɗi, an tii ni tiiriya kay suu li cora ŋgolo bay hoŋ homba kay coosira tuwa, boy zoŋga u cora asi haɗi laɗ tew tewra.