2 KORINTNA 10 - Boy Lonana

Pol di ki kay sun mamba

¹ An Pol cenegi u lalamba u jivira vi Kristu hu li ma an ay dukugiya ko di ana ɗilla an ay ɗili coco an ka dukugiɗi lay ni an ka u ɦiŋga an cenegi u lalamba u jivira vi Kristu.

² Hu li ma an mba varagi wa ni agi ɦeɓen kay li u min manda u lalambaɗi, an wi kan ana an mba wa ni an hin tuk suu golomi ko ami li ni ko hu sa warna nana.

³ Aygi ka kagi cemi hu mbalatara sa warna, aygi ka duu taygi ko hu sa warna naɗi.

⁴ Kawi ma aygi ka duu taygi, u namma ka ko ma vi suu duk ndaŋgarana naɗi, ni kawi ma saɓakŋa vi Lona ndak kay a to gulumunna ki kaŋgaa, ay to tlesuu ka u voɗosiɗina ki ni u kawi namma.

⁵ Ami toomi tlesuu sana colosi a ŋga tamma kay wira vi Lona ki kaŋga halaŋ ami njun saara daŋga kaŋga halaŋ kay a hum u Kristu.

⁶ Ami tami mini kay a kaɓakŋa kay suu ka hum vunɗina halaŋ, hu li ma agi tak hum vun magi ma gasina ki wa.

⁷ Agi ŋgaagi tlena ni kay wira agi ka wasi u irigira lini sana vi kam wa ana nammi vi Kristu ni, saa kay boy namma may ami lay ni maŋ Kristu ko ndaɗta na.

⁸ Lini an ŋga tan kay saɓak ma Bu Suuna ɦamina a wulugi kolona ni ka kay a hoŋogi kaŋgaɗi ni an ka mbuɗ zoloɗi.

⁹ An ka a hal a mbuɗugi ndaa u magaa manda ɦawaɗi.

¹⁰ Gola va ma suuna ka damma ana, «Magara vi Polla eŋ cocoo loɓ ɦay lini nam mba dukuygi u tamba wa ni nam maŋiya, boy mamma damma hahaw ŋgolo.»

¹¹ Sa ma di boy namma nana hum ki jiviya, boy ma ami ɓiirim hu magaa mamira hu li ma ami kaɗina ka ɓorowi zeɗ hu li ma ami ka dukuginaɗi.

¹² Ami ka ŋga tami ko suu ɦiw ŋga tasi kay tasira naɗi, asi ni suu giniŋŋa asi hal dlara ŋga tasi u tasira asi li tasi na ni ko neesira kaɗira.

¹³ Ko ami na ni ami min a ŋga tami kay tamiɗi ni na ɗow ami ŋga ni ii li ma Lona ɦamina komina a tuɗ gak gak tewegira.

¹⁴ Ami ka jak ki kay ii liiminaɗi hin lini ko ami tew kagi varagiɗira na ni, ami tew ki gak gak varagiya mbaaragi Boy ma Ayra vi Kristu.

¹⁵ Ami ka jak ki kay ii hakara ŋgaayraɗi, ami ka ŋga tami kay sunda vi suu daŋŋaɗi, ami ka juɓmi u jivira kay viigira mba wul kolo na ɗow. Ni ami hin ndak a li sunda ŋgolo jivi dukugi may ni tew tew hu li ma Lona ŋgaamina komi ŋgana.

¹⁶ Ni ami ndak a tuɗ fok u Boy ma Ayra hu li ma daŋŋa ha fokogiya ka a kal a ŋga tami hu li ma suu daŋŋa li sunda ki hunaɗi.

¹⁷ Ko magaara dira na, «Sa ma min a ŋga tamma ŋga tam kay va ma Bu Suuna lamma.»

¹⁸ Sa ma ŋga tam kay tamma ka fi jiviraɗi, ni sa ma Bu Suuna ŋgaamma.