2 KORINTNA 1 - Boy Lonana

Gi deɓpa

¹ Ni an Pol sa vovoɗta vi Yesu Kristu u minda vi Lona, u wayayna Timote. Eg suu vi Kristuna, suu vi Lonna hu Korint u suu hin tasi ko Lona suu ka hu Gresna bel bel.

² Lona Buya u Bu Suuna Yesu Kristu ɦagi oora u heɓpa.

Pol gi deɓ Lona

³ Ŋgaaygi Lona, Bu Bu Suuna maygina, Yesu Kristu, Buy ma hurum jivina, Lona ma njun u suuna u tlena halaŋŋa.

⁴ Nam njun uygi hu wihaw maygira bel, kay agi mba njun u suu agi fasi hu wihawra halaŋ, kay a takasi njun mayra aygi faɗ ay ko Lona ndaɗta.

⁵ Ni aygi fi wihawra ŋgolo u Kristu, aygi hin mba wi njunda u Kristu ŋgol may.

⁶ Lini ami fi wihawra aya ni kay ana agi mba fi njunda u suɗta. Lini ami fi njunda aya, ni kay ndaɗ mba li ki egegi may kay agi mba fi saɓakŋa, a siɓ wi dlara u wihawra ami faɗ ayra u ɗigilla.

⁷ Juɓ mamira egegira u eŋga kay ami wi ana agi ka taɓ hu lassa, ni agi mba taɓ u ami hu njunda may.

⁸ Gorsenna ami min ana agi wi ki kay wihawra fami ay hu mbassa Azira, wihaw ndaɗta ay kami nek cocoo ka ndak a ziiɗi, hurumi mbuɗ zeɗ zeɗ kay iiri mamira.

⁹ Hu li namma ami saa ana miɗna fami ni namu, kay ndaɗta ami ka saa kay iiri mamira kay tamiɗi. Saa mamira ni kay Lona ma paɗ suu miɗina ki kolo iirina dew daŋ.

¹⁰ Nammi sa ma suɗumi ay ki fun miɗna ko dlara, ni hin suɗumi kini nam olo, ni ami hin juɓmi komu nam hin suɗi olo.

¹¹ Agi mba njun umi u cenda ni agiya, ni Lona hin hoŋ dira maŋ suuna ŋgolo kay cenda agi cen kamira, nam hin li jivi ndaɗta egemiya, suuna ŋgolo hin mba gam deɓpa kamiya.

Pol mbuɗ boyna vi koy mamba zeɗ

¹² Gola ni va ma ami ŋga tami kamma, wiimira fokomira takami ana ami poyomi hu ndaŋgara tani dukugi ni u gasira u ɗegeera vi Lona u oora vi Lona ka u nera vi saɗi.

¹³ Ami ɓiirigi magaara ha ni ka kay boy ma daŋgi, ni va agi ndumumu humumu. An ka u juɓpa ana agi ndumumu humum gasi.

¹⁴ Cecemi ni agi humi ɦiw ɦiw. Hu buuna vi Bu Suuna Yesu wanni agi hin li furi kamiya, ko ami furi kagira na may.

¹⁵ An tin hurun ay ana an hin tuɗ ha egegiya, kay agi hin mba fagi oora.

¹⁶ An a tuɗ Masedoin wanni, an tli ha varagiya, hu hoŋ manda an hin tli ay varagi lay. Hu koy manda Yudera agi ndak a njun un huwa.

¹⁷ A saa kay koy manda ni an li ha ni u hurun ma ɓorowina ɦawana li su? An kak a ŋga lina ni an ŋgaami u minda vi sa warna ɦawa su? An hin gin tok a di ana, «Nina nina,» ɗowba, «Kaɗi,» na su?

¹⁸ Lona nam ɗegee dlara an dagira hin ki ɦawa ɗowba kaɗira oloɗi.

¹⁹ Yesu Kristu, Goŋ Lonna ma Silas dagi kamma, ami ha Timote mbani kay «Ҥaara» u «Kaɗiraɗi.» Maŋ Lona kini na ɗow ana «Ҥaa.»

²⁰ Kay a li u va ma Lona damma halaŋŋi ana ɦaa. Aygi tagi «Amin» maygira ni u Yesu Kristu kay a ɦal ŋgolla maŋ Lona.

²¹ Namma taɓaygi u agi lay iiri hu Kristu tiniygi kay taygi zeɗ zeɗ ni namu.

²² Nammi sa ma ɓiiriygi u semma, vo Musuk mamba huruygiya kay tak ki jivira nam ka ŋgomoɗ kaygira.

²³ An yi Lona a sa di ki kana, lini an kaboyo ni nam baan iiri manda kiyo. An ka tuɗ ha Korint tuɗi, kay an min lagi u ɗigilla.

²⁴ Ami ka hal a ɦeɓegi kay vira ɦeɓiɗi, kay agi ka hu vira saɓaki, ami min li sunda u agi kay jivi maygira.