2 DLAŊ MULINARA 5 - Boy Lonana

¹ Hu li ma Salomon daɓ sun Ziŋ Yawera ki daɓmi, nam hin mbaa tlesuu bum tinisi ka ki maŋ Yawena ay kiyo. Doonora, lorra u tlesuu daŋŋa zeɗ zeɗ. Nam mba cukusi ki hu zira gol begera hu Ziŋ Lonara.

Zandukka Galamba tiniɗ ki hu Ziŋ Lonara

² Salomon tok suu ŋgolona ay egem halaŋ, muli suu fok dee suu Israelna halaŋ, goryoŋ muli suu basi suu Israelna halaŋ kay a tli Zandukka Galamba vi Yawe ay ki hu Ҥoŋzi Davidna ma asi yam ana Siyonna.

³ Suu Israelna halaŋ tok ay eg mulna hu buu ma luuna halaŋŋi hu til ma kiɗisiyana.

⁴ Hu li ma suu ŋgolo suu Israelna tok ki halaŋŋa ni, njaf suu vi Levina tli Zandukka ni asiya.

⁵ Asi tli Zandukka ay ki u mbutluɓ ma asi tok huna u tlesuu teteɗ suu ay cuki hu mbutluɓmana. Muli suu li ɓivunna u dee suu vi Levina yow tle asina ay ki ni asiya.

⁶ Mulna Salomon u suu Israelna halaŋ tok ay egem eg Zandukka Galamba. Asi ŋgaɗ tlesuu li ɓivunna yoori suu gorina u suu ŋgolona ka ndumbi.

⁷ Muli suu li ɓivunna tuɗ Zandukka Galamba vi Yawera kalafi hu liiɗu. Hu zi mayra teteɗta kalafi hu Ziŋ Lonara, hu Li ma ki Saɓaki Teteɗna. Tiniɗ kaŋga u garaŋ Serubimma.

⁸ Serubimma veɗ garaŋam kolo kay Zandukka Galamba, baraɗ yaɗ ki u garaŋam u yam kawi ma tli Zandukka u namma lay.

⁹ Kawi ma tli Zandukka u namma fiyeki coco lay ni, aŋ wam vunum ki ni hu li ma aŋ ka coli fun goŋga hu li ma kal ha kalafi u Zandukkana tuwa. Ndaɗ ka hu ta ta cemi.

¹⁰ Zandukka Galamba va ka huɗi. Cuki hu ni ɦini mayra ceɗi mba' ta ɦaɗ ay maŋ Moiz kolo kay ɦinira Horebpa doy hol. Ni hu li ma Yawe vi galamba ay u suu Israelna hu li ma asi cuk ay ki hu mbassa Egipterana.

¹¹ Muli suu li ɓivunna cuk ay ki hu Ziŋ Lonara. Asi halaŋŋi li tasi ki teteɗ, ma ŋgol lay, ma goo lay.

¹² Suu deera vi Levi suu gi soolla ni Azaf, Heman, Yudutum u goryosi lay u suu daŋ suu hu dee masirana lay, cuk tasi ni baraw dlemba dereŋga. Asi ka njaari u diŋŋa, diffa u diŋ ma zewem bolowna, njaari ii u maɗiina keŋ givin ma togolla na. Muli suu li ɓivunna ka njaari egesi hu na tok. Asi ni kis duk dok-mba'. Asi ni suu wi yal bu tokolomma may.

¹³ Suu bu tokolomma u suu gi soolla li ni ko tasi na dew. Asi hum tasi cocoo, taɓi ni ko tasi na dew a geleɗ Yawe, ŋgaam may. Hu li ma tokolomma u diŋŋa u dadarina gijaŋ bura wa ni, asi geleɗ Yawe di ana, «Kay nam jiviya, ɗegee mamba ha ni na gak gak.» Huu Ziŋ Lonara oy ki u ɗugulla.

¹⁴ Muli suu li ɓivunna ka ndak a col hu a li sun masira oloɗi ko ɗugul ndaɗta. Kay bibiŋil Yawera oy huu Ziŋ Lonara kiyo.