2 DLAŊ MULINARA 31 - Boy Lonana

Ezekiyas gi ii sunda hu Ziŋ Lonara kiyo

¹ Hu li ma luuna daɓ kina ni suu Israel suu toki huna halaŋ njay kosi ki hu mbassa Yudara to ɦinira coli kolora kiyo, ka gu ma vi Aserna kiyo, hawaɗ givin ma togolla ma suuna minim a cen loogi suu ɦawana ki may u givin ma togolla masi bel bel. Asi li dla ndaɗta ki ni hu mbassa Yudara halaŋ ki vi dee suu vi Benjamin, Efrayim u Manasena lay. Ŋgoo dagan gegelay ni hoŋ vo hu ɦoŋzi ma nam col ay huna.

² Ezekiyas ka ii muli suu li ɓivunna ki hu liisi na cuɓ cuɓ u dee suu vi Levina lay, gegelay ni u sun mamba kom hu ii liimma liimma, kurufu hu Ziŋ Lonara, muli suu li ɓivunna u dee suu vi Levina, sun masira ni kay a li ɓivunna bel, ɗowba a li ɓivun ma taɓ duk ɦoŋga, ɗowba li sun mayra gol tokka ni kay a geleɗ Yawe, ŋgaamu, ɦam ŋgolla may.

³ Mulna ho keŋ bege mamba ki a warak kay ɓivun ma ŋgol ma lam maɗii may, fiɗigi mayna u ma lam hu buu ma vi Lonna may, hu buu ma jewna hu tilna may, u luu ma daŋ ma zeɗ zeɗna lay.

⁴ Mulna ɦal voɗta maŋ suu hu Yerusalemma a asi ɦal tlesuu gaɗta di kasi a ɦasi maŋ suu vi Levina u muli suu li ɓivunnana ki jiviya kay a asi ndak ɦal tasi ki kay sunda ɦasira kosira ko gaɗta vi Yawera dira na may.

⁵ Hu li ma suuna hum di ndaɗta kina may ni, suu Israelna tok yam wa ble masi ma ne ki fokŋa ay ki bolow cocoo, sum veŋŋa u mbulna, mbul yumma u tlesuu daŋŋa zeɗ zeɗ cocoo u keŋ ma doogona vi tlesuu asi feɗesi ay ki vona halaŋ halaŋ.

⁶ Suu may suu hu ɦoŋzi ŋgolo ma hu Yudana, Israel suu mbayawna u suu Yudana halaŋ mbaa keŋ ma doogona vi yoori masisina ay lay, mbutlugina u timigiina u ɦalla ɦaɗ hawa maŋ Yawe, Loosinara. Ii tlege suu zeɗ zeɗ asina tok ŋgol cocoo.

⁷ Asi gijaŋŋa a tok tlena ay ni hu til ma hindina, tuɗ daɓ ki ni hu til ma kiɗisiyana.

⁸ Hu li ma Ezekiyas u suu ŋgolo mamsina wi tle asina molira na ni, asi gi deɓ Yawe u suu mam suu Israelna cocoo.

⁹ Mulna joɓ muli suu li ɓivunna u dee suu vi Levina kay tlesuu taari asina.

¹⁰ Mul ŋgol ma li ɓivunna, Azariya, ma hu deera vi Sadokŋa, hoŋom dira ana, «Hu li ma suuna gijaŋŋa a taa tlena ayra day ni, ami ka ti ki jivi u mayami lay, ami fi tlesuu daŋŋa su ki kami coco lay. Kay Yawe paɗ vunum ki kay suu mamsina, tlesuu moli cana ni suu hin ki komina.»

¹¹ Mulna Ezekiyas ɦal voɗta ana cuk u tlesuu hinna kalafi hu Ziŋ Lonara hu li ma agi fasina gaw gaw.

¹² Asi hin mbaa yam tlegeyesi ay ni na gak gak yam gi wana u ɦalla daŋga zeɗ zeɗta halaŋ. Konaniya ma hu deera vi Levira tlam ki ni a sa ma gol tle asina. Wayamma Simey ni a sa ma funumma gaw may.

¹³ U gaɗta vi mulna Ezekiyas, Konaniya u wayamma Simey yow suu sunda fokosiya ni Yehiyel, Azaziya, Nahat, Azael, Yerimot, Yozabad, Eliyel, Ismakiya, Mahat u Benaya.

¹⁴ Kore ma goŋ Yimma ma Levina, sa ma juɓ vun grek ma ii u maɗiinana, asi ɦam sunda nam tok ɦalla ɦaɗ ay ɦawa maŋ Lona u mindara kom u may. Ɓorow ii ɦalla teteɗta ki u ɦalla saɓaki teteɗta.

¹⁵ Nam tin suu ŋgolona hu ɦoŋzi ŋgolo ma li ɓivunna a ɓorow tlena maŋ gorsesina bay ka iira, ni gi Eden, Maniyamin, Yekua, Semaya Amariya u Sekaniya. Asi ɓorow tina ni maŋ kemba u suu ŋgolona halaŋ.

¹⁶ Asi ɓorow tina ni ka maŋ suu ŋgolo suu sesi ɓiiri kosina doy holɗi, ɦal maŋ gor njufii suu basaɗasi tew ki hindina lay, hin ɦal maŋ suu col ay u deeresi zeɗ zeɗ a li sunda ŋgom tokka hu Ziŋ Lonarana lay.

¹⁷ Muli suu li ɓivunna ndumusi ni u ziisi hu dee masira, may njaf suu vi Levina col ha kay basara dok-mba' ndumusi ni u sun masira u dee masira kaay vora may.

¹⁸ Ndumusi ni u suu masi suu vo hu zinana halaŋ, boyogina gor njufiina u gorɓiina u suu ŋguyusi suu ndaki a ti tlesuu ɓivun ma teteɗna bel bel.

¹⁹ Muli suu li ɓivunna suu hu njaf Aaron suu ha ki cuki keŋ hu ɦoŋzi ma daŋŋa ka hu zi ma vi suu li ɓivunnaɗina, yow suuna ha ki hu ɦoŋzi ŋgolona zeɗ zeɗ a ɓorowosi tinara u njaf suu vi Levi suu sesi ɓiiri kaŋgana may.

²⁰ Hu li ma nam gi ii dlara ki ko ndaɗta nana, Ezekiyas li ni dlara jivi ɗegee ii Yawe, Loommara, nam minim cocoo.

²¹ Hu li ma nam gijaŋŋa a min Ziŋ Lonara kira ni, nam hum u gaɗta vi Lonara u neemba halaŋ, nam so tam a wi minda vi Lonara. Nam li dla ndaɗta na ni u hurum halaŋ. Lona njun um hu dlaamba bel may.