2 DLAŊ MULINARA 20 - Boy Lonana

Suu Moabma ndug Mulla Yudara, Cenda Josafat cen Lonara

¹ Ŋgoo dagan suu Moabma u suu Amonna, suu Meunna soosi usi ay a mba duu u Josafat.

² Asi mba jok boy namma maŋ mulna dam ana, «Suuna ɓak ana suu duuna ay ka bolow coco a duu u aŋu. Asi yow ay ni ŋgoo mbo lum ma galakŋa day. Ay ni hu mbassa Edomba. Asi cemi ay ka laki ni hu Hassason Tamar, ni hu En-Gedi.»

³ Josafat mbuɗ ki ndaa cocoo. Nam gijaŋ joɓ Yawe, tin dlara kay suu hu mulla Yudara halaŋ ana li laara sa ti vaɗi.

⁴ Suu Yudana ay hu ɦoŋzina zeɗ zeɗ halaŋ tok ay a cen Lona.

⁵ Suu hu ɦoŋzi ma Yerusalemma u suu col ay hu ɦoŋzi ma daŋŋa zeɗ zeɗna halaŋ ka ŋguy kay Josafat. Asi mol huu taraŋga wilira fun Ziŋ Lonara na mol.

⁶ Asi cen Lona ana, «Yawe, Lo ma vi somoyomi suu jew dayna, aŋ ti mulla ay kolo huulona ni aŋu. Aŋ ti mulla kay njaf suu warna halaŋŋi aŋ lay. Saɓakŋa u garaaŋga halaŋ ay ni koŋu. Sa ma ndak a col fokoŋ kaɗi.

⁷ Lona, aŋ dik suu hu mbassa wanda ki hu li ma suu maŋ suu Israelna mba na ni ka aŋgi su? Aŋ ɦal mbas ndaɗta ki a fafaɗta maŋ banaŋŋa Abrahammi ka aŋgi su?

⁸ Asi hin cuk huwa, hin min li ma li ɓivunna. Asi hin di ana,

⁹ Lini dlara hahaw mba kami wa, gaɗta, duuna, mbogomma u may ŋgolla ni ami hin mba ni fun zi ndaɗta, ni ana mba ni fokoŋ aŋu. Kay aŋ tak taŋ ki wa. Hu yoo mamira ami yaŋ, aŋ mbay njunumiya. Aŋ may ni hin humumiya, hin suɗumi kiyo.

¹⁰ Na ɗaŋ cemi ni aŋ gola suu Amonna u suu Moabma u suu Edomma mba ndugumiya. Hu li ma somoyomi yow ay ki hu mbassa Egiptera ni aŋ hinisi ka a tli hu mbassa vi suu asinaɗi. Somoyomi gun ay ki keŋesi, casi ka kiɗi.

¹¹ Asi may ni warakami u jivi mamira mbay karam a dikimi ki hu mbassa aŋ ɦamirara.

¹² Yawe, Loomina, aŋ ka hin a kaasi ɓakŋa kasi gaɗasi u ɗegee maŋgaɗi su? Ami may ni saɓakami ka fok suu duu suu bolow coco asinaɗi. Ami ka wi dlara ami laɗ ni naraɗi lay. Kay ndaɗta ami pereɗ irimi ceneŋŋi aŋ dew.»

¹³ Suu hu mbassa Yudara halaŋ boyogina u kemba lay, coli u sesi fun Ziŋ Lonara bel bel.

Yawe ɦal saɓak ma su kay suu duuna maŋ suu Yudana

¹⁴ Duk suuna hu tokka na gaw ni, Musuk Yawera mba kay Yaziyel ma Levina, goŋ Zakarina, goŋ ŋgolo Benayana, nam tamba goŋ Yeyelna, goŋ ŋgolo Mataniyana ni hu deera vi Azaffa.

¹⁵ Yaziyel oo um kolo di ana, «Humugi ha jiviya, agi halaŋ agi suu Yerusalemma, suu Yudana, aŋ taŋga mulna Josafatta may. Gola ni dlara Yawe dagirara, lagi ndaaɗi, lagi ndaa ko suu duu suu bolow asinaɗi. Duu namma ni ka magi agiɗi, ni man an Loogina.

¹⁶ Vin ni agi tuɗ irigi ha kay suu babali magisina na gay. Asi ka ful ay ni kay mbura yaɗ ana Ҥinira Ɓora. Agi hin tuɗ ŋgafasi ni a cuk ay gi ga fun mbura may, vok taɗ u ŋgoo bagira Yeruella.

¹⁷ Agi ka tuɗ duu ni agiɗi. Tuɗ takagi ni tagi ɦawaa. Tuɗ cologi na ca. Agi hin wi saɓak ma vi Yawena a su kasira. Yuda, Yerusalem, lagi ndaaɗi. Ɓik vun dikigiɗi. Vin agi cukugi ki ŋgafasiya. Yawe hin tuɗ u agiya.»

¹⁸ Josafat goɓ kaŋga u vogomu. Suu Yudana u suu Yerusalemma halaŋ goɓ kaŋga fok Yawe a cenemba.

¹⁹ Suu Levina suu toki u deera vi Kehatta u suu toki u deera vi Koreta halaŋ yow kolo a ŋga Yawe, Lo ma vi suu Israelnana, kolo u delesira eŋga.

²⁰ Suuna halaŋ yow kolo maɗii feɗet a tuɗ hu ŋgoo bagira Tekoara. Hu tuɗta asi ka jakka ni Josafat col kolo di ana, «Agi suu Yudana u suu Yerusalemma humugi haa, tinigi hurugi kay Yawe, Loogina, ni sa ma hin a su kagi kaɗi. Vagi vun suu mam suu jokom vunumma ni agi hin ti suuna.»

²¹ Nam gi gagara u suuna kay a yow suu may suu hin cuk ha fok suu duuna a geleɗ Yawe, ŋgaam teteɗ mamba ŋgollara di ana, «Ŋgaagi Yawe kay ɗegee mamba ha ni na gak gak.»

²² Hu li ma asi gijaŋŋa a ŋga Yawera may ni, Yawe cuk suu may suu a cuk ŋgeŋŋa duk suu Amonna u suu Moabma u suu ay kay ɦinira Seirra, mbay ki hu Yuda. Asi gijaŋ ci tasi duk tasi ni na gaw.

²³ Suu Amonna u suu Moabma gijaŋ duuna u suu ay kolo kay ɦinira Seirra a casi kira, daɓasi ki ndeŋ ndeŋ. Hu li ma asi daɓ suu ay kay ɦinira Seirra kina ni asi tuɗ fok u cira ci tasira gak.

²⁴ Hu li ma suu Yudana mba tew hu li ma yara fun li ma fulla ŋgoo bagira may ni asi wi suu duu suu babali masisina ni cuki kaŋga ni maɗasi sak sak, sa ma suɗ ka na dewɗi.

²⁵ Josafat u suu mamsina mbay ɦurumusi tlegeyesiya. Asi fi yoorina ŋgol cocoo, begera cocoo, barawina u tlesuu gus loɓ cocona lay. Asi ɦurum tlena cocoo. Tle asina ka ndak a zii kosiɗi lay. Asi li buuna hindi u ɦurumba ɦurum tlena kay tlena ki oy ŋgol cocoo.

²⁶ Hu buu ma fiɗina ni asi tok tasi hu ɦuɗugumba Paɗ Vunna kay asi gi deɓ maŋ Yawe ni hu li namma. Asi hin tin sem li namma ana «ɦuɗugumba Paɗvunna» ta ta cemi.

²⁷ Suu Yudana u suu Yerusalemma u Josafat sa ma fokosina hoŋ ay vo Yerusalem u furira kay Yawe mbuɗusi furira fok suu babali masisina.

²⁸ Asi cuk vo Yerusalemmi u bura bu diŋŋa, bu tokolomma gak gak tuɗ tew ki fun Ziŋ Lonara.

²⁹ Ndaa Lona hin ki kay mulla hu mbas ndaɗta zeɗ zeɗta halaŋ halaŋ. Hu li ma asi hum ana Yawe duu kay suu Israelna u suu babali masisina ni namuna.

³⁰ Mulla vi Josafatta ti ni u heɓpa. Loomma ɦam koɗ tara ni keŋ lina zeɗ zeɗ bel.

Mul Josafatta daɓmi na

³¹ Josafat kak a mulna fok suu Yudana na ni basaɗam ki ni dok-hindi yam vadl. Nam ti mulla hu Yerusalemmi basara dok-mba' yam vadl may. Sem sum ana Azuba. Ndaɗ ni goŋ Silira.

³² Nam tuɗ ni hu voɗta ɗegeera ko ndal bum Aza lira na may. Li ni dlara ii Yawe jivira.

³³ Vam na lay ni li ma mbuy kolona bulum ka ki tuɗi. Suuna tok hurusi ka ki na dew u Lo ma vi somoyosinaɗi.

³⁴ U dlara vi Josafat ta ay hu gijaŋŋa day ta ta hu daɓpa ni ka ɓiiri hu magaara Sunda vi Yehu, ma goŋ Hananina. Boy namma ka ɓiiri hu magaara vi muli suu Israelna.

³⁵ Ŋgoo dagan Josafat, mul ma Yudana, hin taɓ ko tam u Akaziyas, mul ma Israelna, ma poy mamba cona.

³⁶ Asi vi vunusi ana asi min lum kawi ma tuɗ gus tlena ha ki hu mbassa dayra. Asi min lum kawi namma ni vun voo ma Esiyon-Geberna.

³⁷ May Eliyezer, sa ma jok vun Lona, goŋ Dodava ma Marasena, di boyna kay Josafat ana, «Aŋ taɓ ko taŋ u Akaziyas, jiviya Yawe hin ɓalak va ma agi minim namma kiyo.» Gasi may, lum kawi namma tew ka a tuɗ hu mbassa dayraɗi, sii ki kaŋga duk mbona ni na gaw.