1 TESALONIKŊA 5 - Boy Lonana

¹ Gorsenna kay buu ma ha fokŋa u li ma hin mbana sa ka ɓiirigina ɓiiri oloɗi.

² Kay agi kay tagira lay wi ki ana Buu ma vi Bu Suunana hin mbaa ni ko sa ma kulna na.

³ Hu li ma suuna mbuɗ di ana heɓpa kaa, ya ka oloɗina ni, buu ma ɓalakka hin mba kasina, ni ko ndal cara huruɗ taɗ a vuɗta na li ma asi suɗ ki hurum kaɗi.

⁴ Gorsenna, agi ka hu ndufundaɗi, a buu namma mba kafagi ko sa ma kulna naɗi.

⁵ Agi halaŋŋi goryoŋ kiɗikkana, aygi ni ka suu hu njeŋgera u ndufundanaɗi.

⁶ Buuruygi senna ko suu hiŋŋa naɗi, lakaygi jek jekee, taygi miniya.

⁷ Suu buu senna buurummi njeŋgee, suu guruɗta guruɗ ni njeŋge may.

⁸ Aygi suu hu faalirana lakaygi taygi miniya, cukuygi koroŋ ma vira u minda taygiya, tinigi jumba mulla juɓpa ɗigilla vi suɗta kagiya.

⁹ Lona laygi ka a baaygi ki u yaambaɗi, a faygi ni suɗta u Bu Suuna mayna Yesu Kristu.

¹⁰ Ni ma miɗi kaygina a aygi lini iiri lay miɗi lay lakaygi ni u nam dew.

¹¹ Kay ndaɗta gagi hum tagi tew tew, haɗagi tagiya tagiya ko agi kaa day lira na lay.

Boy ma daɓ daganna u gi deɓpa

¹² Gorsenna ami joɓogiya, humugi u suu ŋgolo suu fokogina, suu Bu Suuna tinisi dukugi takagi voɗta, haɗagi layna.

¹³ Ŋgaasiya, kay sunda asi ka laɗ dukugira, lakagi u heɓpa duk tagiya.

¹⁴ Gorsenna ami gaɗagiya, neegi suu poy poyra cora, ɗiligi ii suu ka yoo tasina, njunugi u suu maŋina, lakagi ɗili u suuna halaŋ.

¹⁵ Gologi tagi jiviya, hin sa hoŋ cora u ndaraɗ coraɗi. Halagi a li ni jivira duk tagi na ɗow, lagi jivira eg suuna halaŋ lay.

¹⁶ Furiyugi tew tew.

¹⁷ Cenegi tew tew.

¹⁸ Gagi deɓ Lona hu dlara fagira halaŋ. Ni dlara Lona min ana agi laɗ hu iiri magira u Yesu Kristura.

¹⁹ Lagi dlara doo Musuk Lonara kiɗi.

²⁰ Boy ma suu jok vun Lona damma gologina lalasɗi.

²¹ Tukugi tlena halaŋ, lagi suu jivina.

²² Doorogi tagi kay dla cora halaŋ.

²³ Ko Lona malaŋ heɓpa mbuɗugi ki jivi teteɗ, u tagira suu warna, u ŋgus magira u iiri magira lay u mbalatagi may. Tle asina halaŋŋi gologisina, ŋgul li egesiɗi, a juɓ mbara vi Bu Suuna mayna Yesu Kristu.

²⁴ Nam ma yagi ay kina ni sa ma ɗegeena, nam hin lagi na may.

²⁵ Gorsenna cenegi ay kamiya.

²⁶ Gagi deɓ gorseygina halaŋ u furira.

²⁷ An kamagi kamiya, ndumugi magaa ndaɗta ki maŋ gorseygina halaŋ.

²⁸ Ko oora vi Bu Suuna mayna Yesu Kristu li u agi halaŋ.