1 TESALONIKŊA 4 - Boy Lonana

Gaɗ suuna a poy teteɗ fok Lona

¹ Gorsenna ami gaɗagi hu Bu Suuna Yesu, ami haɗagi yal ma poy jivi ii Lonna, agi wam lay. Tuɗugi ha fok na ɗow ɗow.

² Agi wi haɗta vi Bu Suuna Yesu ta ami haɗagirara.

³ Lona minni ana agi li tagi ki teteɗ, agi doorogi tagi kay dla cora.

⁴ Dukugi ni gegelay mba haɗ yal ma ɗum cara a kak u ndaɗ teteɗ ɗegeena.

⁵ Nam mba hin saara cora su kambi, li ko suu bay wi Lonna naɗi.

⁶ Kay dla ndaɗta ni sa ma li ganyamba u dlara co eg wayambi, suu li dla cora ko ndaɗta nana Bu Suuna hin kaasi ɓakŋa kasiya, ami dagi boy namma ki jew lay.

⁷ Lona yaygi ka kay dlara njenjeraɗi, aygi kakŋi hu teteɗta.

⁸ Sa ma hum ka u boy namma ɗina, hum kaɗi ni vun saɗi, ni vun Lona ma ɦagi Musuk mambana.

⁹ Kay minda min gorsegina sa ka dagira di oloɗi, Lona haɗagi ki kay min mayra min tagira.

¹⁰ Agi ka li eg gorsegi suu hu Masedoinna ni na daŋ may, na may ami joɓogi ana agi li ha fok hu su olo.

¹¹ Soogi tagi a lakagi u heɓpa, saaragi kay dlaagira kay tagira, a gegelay li sun mamba ni u tamba ko ami haɗagira na.

¹² Ni agi li wa na ni suu ka viiɗina lay wi ki ana agi jiviya, ni agi ka tin nek magira kay saɗi.

Mbara vi Bu Suuna

¹³ Gorsenna ami ka min a agi lak bay wi u boyna kay suu miɗina kiɗi. Ka agi ɓalak hurugi ko suu ka wi Lonaɗina naɗi.

¹⁴ Lini ay vi ana Yesu miɗa hin paɗ ki kolo iiri lay ni, ay vi ana Lona hin paɗ suu may suu tin hurusi kay Yesuna ki kolo iiri may.

¹⁵ Gola ni dlara ami dagirara ko boyna vi Bu Suuna dira na. Kay mbara vi Bu Suuna ay suu iirina ka tuɗ jew suu miɗinaɗi.

¹⁶ Bu Suuna u tamba vaam ma tak kina kaa, del sa sunda huulona ma ŋgolna u del tokolomma vi Lona hin buwa, Bu Suuna u tamba hin mbay kaŋga hu ɗugulla, suu miɗ hu sem Kristuna hin paɗ ki kolo jew ni asiya.

¹⁷ Daganda ay suu hin iirina hin yow kolo hu ɗugulla u asi dew a ŋgaf vok Bu Suuna duk semeɗna, ay hin lak u Bu Suuna a fafatɗa.

¹⁸ Ɗiligi irigi duk tagi u boy namma.