1 TESALONIKŊA 2 - Boy Lonana

Pol hu Tesalonik

¹ Gorsenna agi wi lay ana mbaamira ay dukugira li ka kagi ɦawaɗi.

² Hu li ma suuna lasami ay hu Filipi ŋgulumi lay ko agi wira na, Lona hin njunumi ɦami ɦiŋga a dagi Boy mamma Ayra duk ciwayra vi suuna.

³ Gaɗ mamira ami dagirara ni ka dlara coɗi, ka dlara njenjeɗi, ni ka dlara ganyambi lay.

⁴ Lona tukumi ki tukgi hin ɦami Boy ma Ayra ni na tuwa, ami ɓakŋi ka a jiv tami ii suuna ɦawaɗi, ni ii Lona ma gol huna kurufuna.

⁵ Agi wi lay ami ɓakŋi ka boy ma mbaɗ ii sa ɦawaɗi, ni ka boy ma hal bege ko saɗi lay, Lona wiya.

⁶ Ami hal ka ana suuna ŋgaamiya naɗi. Ka agiɗi lay ka suu hiŋŋaɗi lay. Lini ami mina ni ami ndak a li a suu ŋgolo magisina ko suu vovoɗta vi Kristu na.

⁷ Na may ami ay dukugi ni lagi ni u lalamba, ko cara gol goryoɗta na.

⁸ Kay minda ami minigira ami ɦagi ni ka Boy ma Ayra vi Lona holɗi, tami ki mini a ɦal iiri mamira ki kagiya.

⁹ Gorsenna agi wi lay sun mamira u las mamira ami laɗ njeŋge lay, faali lay, ka a tin nek mamira kay saɗi. Ami dagi ni Boy ma Ayra vi Lona.

¹⁰ Agi ni suu diki kamina, Lona lay ami poy dukugi ni poyra teteɗta u ɗegeera bay cora egegi agi suu vina.

¹¹ Agi wi lay ana ami ay egegi ni ko buna u goryomba na.

¹² Ami gaɗagiya, soogi hurugiya, ami cenegi ana poyogi jivi ko Lona minda na. Nam ma yagi ay hu mul mamba u bibiŋil mambana.

¹³ Kay ndaɗta ami gi deɓ Lona tew tew, kay agi vi boyna vi Lona ma ami daginana, ka ko boyna vi suuna naɗi, ni gasi ko nammi boyna vi Lona ma ka li sunda hurugi agi suu vina na.

¹⁴ Gorsenna agi mbuɗ ni suu tli dlaŋ suu vi Kristuna vi Lona hu Kristu Yesu suu ka Yudena. Agi fi lassa ko gorsegina ko suu Juifna lasasi ayra na may.

¹⁵ Asi ni suu ci Bu Suuna Yesu u suu jok vun Lona kina, ni suu lasamina, asi ka ii Lona jiviɗi, asi gonokka u suuna halaŋ.

¹⁶ Asi dooromi ana di boyna ki maŋ suu ka njaf suu Juifnaɗinaɗi. Kay a asi suɗ kiɗi, asi tuɗ fok u dla cora na ɗow yara vi Lona vasi wa.

Vi vunna vi Pol u sunda nam sun Timotera

¹⁷ Gorsenna ami may ni ɓorow u agi ni kay kak njok ɦawaa, ɓorow ka hu saaraɗi, kay ana agi ka wami oloɗira ɦawaa. Hurumi haɗ coco a wagi irigi u tamira may.

¹⁸ Ami min tew ki ta ta varagiya. An tanda Pol hal gin a tuɗ ha egegi sen bolowo, may Satanna dooromiya.

¹⁹ Suu ami ka u juɓpa kasina ni suurage, furi mamira u ŋgaamira u bibiŋil mamira ni agiɗi su, fok Bu Suuna mayna Yesu hu mbaamba layɗi su?

²⁰ Ҥaa, agi ni bibiŋil mamira u furi mamira.