1 TESALONIKŊA 1 - Boy Lonana

Gi deɓpa

¹ Ni an Pol u Silas U Timote ɓii maŋ suu vi Kristuna hu Tesalonik, suu vi Lona Buna u Bu Suuna Yesu Kristu. Ko oora u heɓpa kak u agiya.

Jivira vi Boy ma Ayra hu Tesalonik

² Ami gi deɓ Lona tew tew kagi halaŋ, ami ka yagi segi hu cen mamira tew tew.

³ Humumi gami fok Lona tew tew kay sun magira jivira hu vira, kay sunda hu min magira, u hurugi ma tini coco u juɓpa kay Bu Suuna maygina Yesu Kristu.

⁴ Gorsen suu Lona minigina, ami wi ana Lona managi ni namu.

⁵ Kay Boy mami ma Ayra tewegi ka ni u boyna ɦawaɗi, ni u saɓakŋa u Musuk Lonara u gasira ŋgolla. Agi wi lay ami ay dukugi vi tami ni kay boy magina.

⁶ Agi mbuɗ ni suu tlami dlaamira ura vi Bu Suunara, hu lassa coco lay ni agi vi Boy Lonana u ayra hu Musuk Lonara.

⁷ Agi mbuɗ ni a suu tak voɗta maŋ suu vina halaŋ hu Masedoin u Akay.

⁸ Kay boy ma vi Bu Suunana hum ay ki varagiya, ka ni hu Masedoin u Akay holɗi, hurugi ma tini kay Lonna tak ki hu lina halaŋ ka ami a ɓak kam ɓak ki oloɗi.

⁹ Asi ɓak kagi kay vira agi vami ami ay varagira, agi hin ɓivunna maŋ fulina, pereɗ irigi eg Lona ma iiri ma gasina a sunumba.

¹⁰ Agi ka juɓum goromma hin mbay kolo huulona ni goromma Yesu ma nam paɗam ki kolo iiri duk suu miɗinana, ma hin buɗuygi ki hu yara vi Lona ta hin mbay wan daŋga.