1 MULINA 21 - Boy Lonana

Mulna Akab ci Nabot kiyo

¹ Gola ni dlara li dagan boy nammara. Sana ka hu ɦoŋzi ma Jizreelna dew, sem ana Nabot. Sene gugutlu mamma eg zi ma vi mul ma Samarina Akab na tok.

² Akab di Nabot ana, «Hinin sene gugutlu maŋŋa an a li hum tlesuu tira huwa, kay nam eg ziinna ni na tok daŋ. An hin ɦaŋ sene gugutlu ma jivi cocona kay balam maŋŋa. Lini aŋ min gursuna lay ni, an ndak a ɦaŋ gursuna kay gusum lay.»

³ Nabot hoŋ di Akab ana, «Yawe dooron kiya kay a ɦal sene ma vi somoyonna kira ni ka jiviɗi.»

⁴ Akab tuɗ vo wanni, hurum ki ɓeŋi coco kay boy ma Nabot ma Jizreelna damma ana, «An hin ka a ɦaŋ jo ma vi somoyonna kiɗi.» Nam buu kay lay mamma, pereɗ irim ha ki dogo na ɗow, ka min a ti vaɗi lay.

⁵ Caamba Jezabel mba famu, hin dam ana, «Aŋ ki ya yara na ka min a ti vaɗi lay ni nanage?»

⁶ Nam hoŋoɗ dira ana, «Ni kay an njaɗ ay u Nabot ma Jizreelna. An dam ana nam ɦan sene gugutlu mamma, an hin warakam gursura ɗowba ɦam sene ma daŋŋa balam mamma. Nam hoŋon dira ana, an ka min a ɦaŋ sene gugutlu mannaɗi.»

⁷ Caamba Jezabel hin dam ana, «Aŋ a mulna kay suu Israelna ni aŋ na ɗowɗi su? Col kolo, ti funa, heɓ huruŋ kiyo. An tanda hin ɦaŋ sene gugutlu ma vi Nabot ma Jizreelna kiyo.»

⁸ Ndaɗ ɓii magaara u sem Akab, ci tampoŋ ma vi Akabma kayam may. Ndaɗ sun magaa ndaɗta ki maŋ suu ŋgolona u suu kaɓakŋa hu ɦoŋzi ma vi Nabotna halaŋ halaŋ suu ka cuki zina dew u namma.

⁹ Ndaɗ ɓii hu magaa ndaɗta ana, «Lagi laara ki hu zina halaŋ. Kakagi Nabot ay hu li ma tokka fok suuna na tok.

¹⁰ Kakam suu ka wi dlaɗina ay fokom na mba' may. Asi di ki kam fok suuna ana, aŋŋi sa ma gam vunna kina. Lona ni mulna, kalagina ha kiyo, gikigina ki u gogoyra, cam kiyo.»

¹¹ Suu njufii suu u ɦoŋzi ma Jizreelna, suu ŋgolona u suu kaɓakŋa suu ka hu ɦoŋzi nammana li ko ndal Jezabel dira na may, ko ndaɗ ɓii ay hu magaara ndaɗ ɦasira ayra na dege dege may.

¹² Asi li laara, kak Nabot ha ni fun na tok hu li ma tokka may.

¹³ Suu may suu ka wi dlaɗi na mba' lak ay fokom na gay may. Suu ka wi dlaɗi asina gijaŋ a di dlara ki kay Nabot fok suuna di ana, «Nabot ŋgul Lona, ŋgul mulna may.» Asi kalam ki hu ɦoŋzina, tuɗum ha ki doŋ kaana gikim u gogoyra, cam kiyo.

¹⁴ Asi sun eg Jezabel dad ana, «Nabot asi gikim u gogoyra, cam kiwa.»

¹⁵ Hu li ma Jezabel hum ana Nabot asi gikim u gogoyra, cam ki wa ni, ndaɗ tuɗ di Akab ana, «Col koloo, tuɗ tli sene gugutlu ma Nabot min ka a gusuŋŋa ki koŋgi namma, kay cemi ni Nabot namma ka oloɗi. Asi gikim u gogoyra, cam kiwa.»

¹⁶ Hu li ma Akab hum ana Nabot ma Jizreelna miɗ ki wa ni, nam col kolo ɗiŋ ay ki kaŋga a tuɗ tli sene gugutlu ma vi Nabot ma Jizreelna kira.

Kaɓakŋa kay dlara gi Akab u Jezabel laɗta

¹⁷ Yawe di boyna ay maŋ sa ma jok vun Lona Eli ma Tisbena ana,

¹⁸ «Col kolo, tuɗ ga hu Samari, ŋgaf vok Akab, mul ma vi suu Israelnana. Nam ka hu sene gugutlu ma vi Nabotna. Nam mba ni a mbuɗum ki a mamma kay tamu.

¹⁹ Aŋ tuɗ ɓakammi ko ndal wandara na. Yawe di ana, hu li ma aŋ ci maɗna wa ni, mbuɗ vaŋ sa nammana ki a maŋŋa gaw su? Aŋ hin dam ki hu ana, li ma diginina tanaɗ busu Nabot huna, diginina hin tanaɗaŋ busuɗuŋŋi hu li namma may.»

²⁰ Akab di Eli ana, «Aŋ sa ma babali manna, fan wa daŋ su?» Nam hoŋom dira ana, «An faŋ wa kay aŋ gus taŋ ki ni u busu sana kay dla cora aŋ laɗ fok Yawe wanda.

²¹ An hin mbaraŋ dlara hahawra ay kaŋu. An hin bulumuŋ ki duk suuna. An hin ci gor njufii suu vi Akabma ki halaŋ halaŋ, mborɓiina u gor vuɗta suu hu mbassa Israella halaŋ.

²² An hin mbuɗuŋ ziiŋ ki ni ko ndal ziŋ Jeroboam ma goŋ Nebatna na. Ko ndal ziŋ Beasa ma goŋ Ahiyana na may. Kay ana aŋ ɓalakan hurun ki cocoo, aŋ zuɗ suu Israelna a li sulukŋa na bel bel.

²³ Yawe, hin ɓak kay dlara vi Jezabella ana, diginina hin kom tliw Jezabel ki duk sene ma Jizreelna.

²⁴ Suu vi Akab suu miɗ vo hu ɦoŋzinana halaŋ diginina hin komosi kiyo. Suu miɗ ha ki ŋgoo bagina layagi suu pii kolona hin komosi ni asi may.»

²⁵ Sa ma li dla cora ko ndal Akab lira na ni kaɗi. Nam li dlara ka ii Yawe jiviɗira. Caamba Jezabel kalam hu dlara cora ni ndaɗu.

²⁶ Nam li dla cora, goɓ fulina ko suu Amorna lira na. Ni suu may suu Yawe dikisi ay ki fok suu Israelnana.

Akab hom kay dlaamba cora

²⁷ Hu li ma Akab hum boy namma na ni, nam haa baraw mamma kiyo, cuk baraw bolna egemu, li laara may. Nam buu ni u baraw bolna egemu, tuɗ ni na suɗu suɗu ka tin sem kaŋga eŋgi lay.

²⁸ Yawe hin di sa ma jok vun Lona, Eli ma Tisbena, ana,

²⁹ «Akab hom yam ay ga fokonni aŋ wi su? Nam hoŋ yam ga fokonu ni an ka mbaaram hahawra kam hu li ma nam iirinaɗi. Hahawra hin mba ka kay suu mamsina ni hu li ma goromma hin varak kana tuwa.»