1 KORINTNA 9 - Boy Lonana

Voɗta sunda maŋ sa vovoɗta vi Lona

¹ An ka ki buɗiɗi su? An ni ka sa vovoɗta vi Lonaɗi su? An wi Yesu Bu Suuna may naɗi su? Agi ni vuɗ sun manda hu Bu Suunaɗi su?

² Lini suu daŋŋa ka wan ana an a sa vovoɗta vi Lonaɗi lay, agi ndak a wi ana an ni sa vovoɗta vi Lona. Kay taɓ magira u Bu Suunara, agi ni suu diki kan ana anni sa vovoɗta na.

³ An di boy namma na ni kay suu ka njaɗ u senna.

⁴ Ami ka u voɗta kay tina u cina kay sun mamiraɗi Su?

⁵ Voɗta ka kami a tay cara vira ay umi ko caamira na, ko suu vovoɗta gorseŋ Bu Suuna na u Piyer na layɗi su?

⁶ Ɗowba ami u Barnabas a li sunda a hal tina funumi ni ami hol su?

⁷ Agi wi ana asgaa ma ka li sunda ma warak tam kay tam ka su? Sa pi guna pi ka tam vuɗumbina ni gege? Sa ma taa mbutlina ka casi mbirisiɗina ni gege?

⁸ Tlesuu an ɓak kasi wanna ni ka u boyna vi suuna cecemi wanna ɦawaɗi, gaɗta vi Moiz lay ni di na.

⁹ Ɓiiri hu gaɗ ndaɗta anaba «Njun vun mbutlna ki hu li ma nam a to wanaɗi,» Lona saa ni kay mbutlina su?

¹⁰ Nam di dla ndaɗta ka ni kami amiɗi su? A gasira boy namma ay ɓiiri ni kamiya. Sa ma zum wana u sa ma to wanna daɓ sun masira kiyo, fi va ma asi loɓ kamma.

¹¹ Ami zaarami tlesuu ŋgussa hurugiya, lini ami feɗemi tlegeyegi suu hu duliyara tanna ni va ma ŋgol su?

¹² Lini suu daŋŋa ka u voɗta kay joɓ va egegiya ni ami joɓmi suusiɗi su? Ami lay hin li ka naɗi. Ami hoŋ siɓimi siɓi na ɗow kay ami min ɓeŋ voɗta vi Boy ma Ayra kay sem Kristu kiɗi.

¹³ Wagi ki kaki anaba suu li sunda hu Ziŋ Lonara fi tiisina ni hu Ziŋ Lonara may, suu li ɓivun ma ŋgalam ki ŋgalina fi tiisina ni hu givin ma togolla namma may.

¹⁴ Na may Bu Suuna di ana suu di Boy ma Ayra fi tiisina ni huwa.

¹⁵ An may ni manda ka naɗi, an ɓii magaara ni ka kay an a fi huwa naɗi, an min miɗ ni miɗi mariyaɗ ka a sa ŋgaan kay boy nammaɗi.

¹⁶ Boy ma Ayra ma an ka damma an ka ŋga tan kambi, li ni nanagelay ni an a li dla ndaɗta, lini an ka di Boy ma Ayraɗi ni yoora mba kanni ndaɗu.

¹⁷ An ŋgaɓ sun ndaɗta ni kay tanu ni an ndak a juɓ gin warak tuwa. Ni dlaanda daŋ may an vi nek manda tininda kanda wa.

¹⁸ Warak manna ni mege? Ni furira kay di Boy ma Ayra, dam ki maŋ suuna, ka joɓ va ana an sa di boyna ni warakan kayamiraɗi.

¹⁹ An ni ka mbaɓuna vi saɗi, an ki buɗiya, ni kay ndaɗta an mbuɗ tan mbaɓuna vi suuna kay a fasi ŋgol suwa.

²⁰ Hu li ma an li sunda duk suu Juifna ni an lini ko asi na may kay an mba fasi unu, an ka man hum u gaɗta vi Moizɗi lay ni an li sunda ko asi suu hum u gaɗtana na, kay an hin mba fasi unu.

²¹ Duk suu ka wi gaɗta vi Moizɗina, an lini ko asi na may, an ka tin yan kay gaɗtaɗi kay an a mba fasi unu. Ni ka ana an ka hum u gaɗta vi Lonaraɗi naɗi, an hum u gaɗta vi Kristu.

²² Hu li ma an ka duk suu maŋi hu vira an mbuɗ tan maŋi ko asi na may. Kay an a mba fasi unu, an li tlena ki zeɗ zeɗ halaŋ kay an a suɗ suu ki dukusi ɦiw.

²³ An li tlena ki halaŋ kay Boy ma Ayra kay an mba fi mansina dukusi may.

²⁴ Agi wi ana suuna cuk liŋŋa ni suuna cukŋi halaŋ, sa ma hin fi warakŋa hin lini dew.

²⁵ Agi wi ana suu njokoɗta doo tasi, kay tlena ŋgolo, asi li na ni kay a fi ni jumba maŋira ɦawaa, aygi li ni kay fi ni jumba mulla mayra didinda.

²⁶ Kay ndaɗta an liŋ irin ŋgarasi kay va ma an liŋ kamma, ni kay ndaɗta an ka ko sa ma ci gotopoŋga ɦawa ɦayna naɗi.

²⁷ An doo tan u saɓakŋa cocoo, kay an sa di boyna maŋ suuna, an tanda kaɗak kiɗi may.