1 DLAŊ MULINARA 23 - Boy Lonana

David ɓorow ii suu li ɓivunna kiyo

¹ David mbuɗ ki maara, buuna ndakam wa hu li ma nam tin goromma, Salomon, mulna kay suu Israelnana.

² Olo nam tok suu ŋgolo suu muli suu Israelna kaŋga halaŋ halaŋ, suu li ɓivunna u suu njun Levina.

³ Suu Levina suu basaɗasi su dok-hindina ndumusi kiyo. Ndumusi kay sanana gaŋ gaŋga ni suuna 38,000.

⁴ Dukusi ni suuna 24,000 a li sun Ziŋ Yawera. Suu ɓii magaara u suu kaɓakŋa ni 6,000 may.

⁵ Suu juɓ u vun zira 4,000 may. Suu geleɗ Yawe u tlesuu bura suu David di kasi ana, nam minisi a geleɗem u wanna.

⁶ David ɓorowosi irisi ki na cuɓ cuɓ kay cee goryoŋ Levina, Gerson, Kehat u Merari.

⁷ Suu vi Gersonna ni Ladan u Simey.

⁸ Goryoŋ Ladanna ni Yehiyel ma mulna, Zetam u Joel. Asi halaŋŋi hindi.

⁹ Goryoŋ Simeyna ni Selomit, Haziyel u Haran. Asi halaŋŋi hindi. Halaŋ ca ni suu fok suu hu deera vi Ladandana.

¹⁰ Goryoŋ Simeyna ni Yahat, Ziza, Yeuk u Beriya. Halaŋ fiɗi ca ni goryoŋ Simeyna.

¹¹ Yahat ni ma jewna. Ziza ni ma a mbarana. Na may Yeuk u Beriya vuɗ gorra ka bolow cocoɗi. Asi halaŋŋi taɓi hu deera dewra, ni kay dlara dewra lay.

¹² Goryoŋ Kehatna ni Amram, Isar, Hebron u Uziyel. Asi halaŋŋi fiɗi.

¹³ Goryoŋ Amramma ni Aaron u Moiz. Aaron hinim ki keŋ kay tam a li sunda hu li ma ki teteɗna. Nam u goryom a fafaɗta a tuɗ fok Yawe u mbul ma his jivina a sunum may, ɦal heɓpa u sem a fafaɗta.

¹⁴ Moiz ni sa vi Lonana. Goryom ki ndumi duk deera vi Levira.

¹⁵ Goryoŋ Moizna ni Gersom u Eliyezer.

¹⁶ Goŋ Gersomma ni Sebuel ma mulna.

¹⁷ Goŋ Eliyezerna ni Rehabiya ma mulna. Eleazar vuɗ gor suu daŋ ka oloɗi. May goryoŋ Rehabiyana zul bolow cocoo.

¹⁸ Goŋ Isarna ni Selomit ma mulna.

¹⁹ Goryoŋ Hebronna ni Yeriya ma jewna, Amariya ma a mbarana, Yaziyel ma a hindirana, Yekamam ma a fiɗirana.

²⁰ Goryoŋ Uziyelna ni Mika ma jewna u Isiya ma a mbarana.

²¹ Goryoŋ Merarina ni Mali u Musi. Goryoŋ Malina ni Elazar u Kis.

²² Elazar miɗ ki ni vuɗ go njuf kaɗi, ni gorɓiina. Goryoŋ Kis suu gorsesina yowosi ki boyogina.

²³ Goryoŋ Musina ni Mali, Eder u Yeremot. Asi halaŋŋi hindi.

²⁴ Goryoŋ Levina taɓ halaŋ u deeresi ni ko wanda na. Suu fok suu hu dee masirana u sun masira ko ndumusi ki u sesira na, asi li sun masira hu Ziŋ Yawera ni hu li ma basaɗasi tew ki su dok-mbara.

²⁵ David di gasi daŋ may ana, Yawe, Lona vi suu Israelna, ɦal koɗ tara maŋ suu mamsina. Nam ka kaki hu Yerusalem a fafaɗta.

²⁶ Na lay ni suu Levina hin ka tlam ziim kasi u tlesuu hinisi ki a lam sun mambana oloɗi.

²⁷ Na may u boy ma David dam daganna, goryoŋ Levina ndumusi ki ni ko wanda na col ha kay suu basaɗasi su dok-mbana.

²⁸ Asi col ni u gaɗta vi goryoŋ Aaronda a li sunda hu Ziŋ Yawera, hu taraŋga, hu ziginina, mbuɗ tlesuu hinisi ki a sundana ki teteɗ u sunda laɗ hu Ziŋ Lonara.

²⁹ Asi tasi ki ni kay mappa ma li ɓivunna, fuɗta li ɓivunna, komnjoɗi ma bay kuffa, komnjoɗi ma cufina, komnjoɗi ma tlumi u tlenana u tlesuu ŋga tlena u suu saɓakŋa.

³⁰ Asi li kaki maɗii tew tew a ŋga Yawe geleɗem may. Asi li fiɗigi ni na lay.

³¹ Ɓivun ma ŋgalam ki ŋgali ma ɦam maŋ Yawe kay buu ma vi Lonana, kay vun tilnana, kay luuna ko ndal ndumusi ma ki ɓiiri kaŋga a fafaɗta fok Yawena na.

³² Asi hin ɦasi sunda a gol u mbutluɓ ma li tokka, tlesuu hinisi ki a li ɓivunnana u goryoŋ Aaronna, gorsesina kay sunda hu Ziŋ Yawera.