1 DLAŊ MULINARA 22 - Boy Lonana

¹ David di ana, «Tani ni Ziŋ Yawe Lonara. Gola ni givin ma togolla ma vi suu Israelnana.»

David min tam a min Ziŋ Yawera

² David ɦal voɗta ana tok suu koyogi suu hu mbassa Israellana kiyo. Nam hin yow suu ceɗ gogoyra a min Ziŋ Yawera.

³ David min kawina ŋgol cocoo, pondina kaay vun goŋga. Kay tlesuu gaɓ kolona, nam yoo walakŋa ŋgol coco lay. Sa ndak ka tlam nekembi.

⁴ Gu sedrena sa ka wam ndumumbi kay ana Sidonna u suu Tirna mba gu sedrena ay maŋ David ŋgol cocoo.

⁵ David di ana, «Goronna, Salomon, goo tu lay, maŋi lay, zira a miniɗ maŋ Yawera dlaɗ hin li ni ŋgol coco hu mbassa halaŋ kay ŋgoloɗ lay kay bibiŋil maɗta lay. An hin minim tlena ka ki kaŋga ni mamu.» Ko ndaɗta na David min tlena ka ŋgol jew a nam miɗta.

David ɦal voɗta maŋ Salomon a nam min Ziŋ Lonara

⁶ Nam yi goromma, Salomon, ɦam voɗta a min zira maŋ Yawe, Lo ma vi suu Israelnana.

⁷ David di Salomon ana, «Goronna, an saara ay hurun tanda a min zira kay sem Yawe, Loonna.

⁸ Na may Yawe ɓakan boy mamma ko wanda na, Aŋ vo busuna ki kaŋga cocoo. Aŋ li duu ma ŋgolona ɦay. Aŋ ka hin min zi kay senɗi kay ana aŋ vo busuna ki kaŋga kay ndaŋgara fokon ɦay.

⁹ Gola, goona vuɗ ka varaŋu, nammi sa hin mba heɓpa. An him ɦam heɓpa duk tasi u suu babali mam suu ŋguy kamma halaŋ halaŋ, kay ana Salomonni semu. An hin ɦal heɓpa u kakka enda maŋ suu Israelna hu buu mamma.

¹⁰ Nammi sa hin min zira u senna. Nam hin li ni a goronna. An hin li ni a bum may. An hin kakam mul mamba saɓakŋa kay suu Israelna a fafaɗta.

¹¹ «Cecem wanda ɗaŋŋi ko Yawe li u aŋu, goronna, a aŋ min zira maŋ Yawe, Looŋŋa, u heɓpa ko nam ɓak ki kaŋga na.

¹² Na may ni ko Bu Suuna ɦaŋ saara ɓoroow ii dlara, ɦaŋ yalna hu li ma nam kakaŋ kay suu Israelna a gol u gaɗta vi Yawe, Looŋŋara.

¹³ Na ɗaŋŋi sun maŋga hin tuɗ foko lini aŋ gol u gaɗ ndaɗta a takaɗ ki kiɗiki, gaɗta u vun ma Yawe ɦam ka maŋ Moiz kay suu Israelnana. Li saɓaki, ɦiŋŋi, li ndaaɗi.

¹⁴ «Gola an haw lay ni, an min tlena ka kaŋga kay zira vi Yawera lorra kelew 3,000,000, doonora kelew 30,000,000. Walakka u kawina ni sa ka ndak a tlasi nekesiɗi. Asi ŋgol cocoo. An min guna lay, gogoyra lay, aŋ hin hal ka fun tuwa.

¹⁵ Suu li sunda ka ŋgol cocoo. Suu li sun guna u suu ceɗ gogoyra ka bolow coco lay. Njaf suu wi yal sunda lira halaŋ kaa.

¹⁶ Lorra, doonora, walakka u kawina sa ka wasi ndumusiɗi. Col kolo, liya, ko Yawe li u aŋu.»

¹⁷ David ɦal voɗta ka maŋ suu ŋgolo suu fok suu Israelna halaŋ ana asi njun goromma Salomon kaa.

¹⁸ «Na ni Yawe Loogina ka u agiɗi su? Na ni nam ɦagi heɓpa ki hu li ma keŋegina ka halaŋgi su? Gasi daŋ may ni nam ɦan suu hu mbas mayra hom ki u Yawe u suu mamsinara ki konu.

¹⁹ Cecem wanda ɦagi hurugiya, hinigi tagi a hal Yawe, Loogina. Cologi koloo, minigi Ziŋ Lonara vi Yawe, Lonana, a hoŋ Zandukka Galamba vi Yawera u tlesuu li ɓi vun suu vi Lonna ay hu zira miniɗ u sem Yawera.»