1 DLAŊ MULINARA 16 - Boy Lonana

¹ Asi kal Zandukka ay hin tiniɗ hu mbutluɓma David minim kaɗna hu dukka gayra. Asi hin li ɓivun ma ŋgalam ki ŋgalina u ɓivun ma heɓ dukka fok Lona.

² Hu li ma David daɓ ɓivun ma ŋgalam ki ŋgalina ki u ma heɓ dukka may ni, nam paɗ vunum ki kay suuna u sem Yawe.

³ Olo, nam hin ɓorow nus mappana may, komnjoɗi tumura may, komnjoɗi wana may maŋ suu Israelna halaŋ, njufiina ɗowba boyogina.

Suu Levina gi soolla geleɗ Bu Suunara

⁴ David tin suu Levina suu ɦiw fun Zandukka vi Yawera. Asi li sunda, li luuna, geleɗ Yawe Lona vi suu Israelna.

⁵ Azaf, sa ŋgol ma fokosina, Zakari ma kam a mbarana, olo Yaziyel, Semiramot, Yehiyel, Matitiya, Eliyab, Benaya u Obed-Edom, Yeyel bu diŋ ma zewem kalavandina u diffa deleɗ goora komu, Azaf bu tlena kolo eŋga may.

⁶ Suu li ɓivunna, Benaya u Yaziyel bu tokolomma fok Zandukka Galamba vi Lonara na gak gak.

⁷ Ni hu buu namma David ɦal voɗta maŋ Azaf u gorsemma a geleɗ Yawe a gigiŋga.

⁸ Geleɗegi Yawe, yam sem koloo, takam dlaamba nam laɗta ki duk suuna.

⁹ Gagi soolla mamu, geleɗegina, ɓakagi ki kay dlaamba mbuɗ mbuɗta.

¹⁰ Furyugi kay sem ma teteɗna, lagi furira agi suu halagi Yawena.

¹¹ Halagi Yawe u saɓak mamma, halagina tew tew.

¹² Humugi gagi kay dlara mbuɗ mbuɗta nam laɗta. Dlaamba mbuɗ mbuɗta u kaɓak ma kal ay ki funuma.

¹³ Agi suu Israel suu sunumma, agi goryoŋ Yakob suu nam managina.

¹⁴ Ni nam Yawe, Looygina, ma ti mulla kay ndaŋgara halaŋŋa.

¹⁵ Humugi gagi kay galam mamba, ni dlara daɗ kay njaf suuna buɓpa.

¹⁶ Ta nam vaɗ u Abrahamba, faɗaɗ vunun ki u suura nam suu kay Isaakka.

¹⁷ Ta nam miniɗ ki a gaɗta maŋ Yakobpa, galamba dindinda maŋ suu Israelna.

¹⁸ Hu li ma nam di ana, «An ɦaŋ ndaŋgara Kanaanda ki wa, ni ɓorow ma agi fam hu jonana.»

¹⁹ Na ɗaŋŋi asi hin ndumugiya, agi ay ni suu mbee ay hu duk kona dew daŋŋa.

²⁰ Asi tuɗa hoŋ ay duk njaf suunana cow cow, col ha hu mulla hiŋga tuɗ ki duk suu daŋŋa.

²¹ Na may nam hin sa ka a lasasiɗi. Nam cuk mulina daŋgayna kasiya.

²² «Tinigi kogi eg suu man suu teteɗnaɗi. Lagi dla co eg suu man suu jok vun Lonaɗi.»

²³ Gagi soolla maŋ Yawe ndaŋgara u ŋgoloɗ halaŋ, ɓakagi dla suɗ mamba ki hu buuna tew tew.

²⁴ Ɓakagi ki kay bibiŋil mamba duk njaf suuna, kay jivi mamba ki duk suuna halaŋ.

²⁵ Kay ana Yawe ŋgolo, ndaki a suuna geleɗemu, nam saɓak cocoo, ŋgol suu loogi suu daŋŋa halaŋ.

²⁶ Loogi suu vi suunana halaŋŋi ŋga tara. Yawe li huulonana ni namu.

²⁷ Ŋgolla u welera ni tlesuu fokomma. Saɓakŋa u mulla ni tlesuu hu liimmana.

²⁸ Ҥagi dee suuna maŋ Yawe, ɦagi bibiŋilla u saɓakŋa maŋ Yawe.

²⁹ Ҥagi bibiŋilla u sem Yawe. Mbaagi ɓivun magina aya, mbaagi ay fokomu. Goɓogi kaŋga fok Yawe hu li ma teteɗ mamba tak taɗ ki kiɗikŋa.

³⁰ Lagi ndaana fokomu, ndaŋgara u ŋgoloɗ halaŋ, gasi duliyara kaki saɓaki, ka ŋgeŋeɗɗi.

³¹ Ko huulona li furira, ko ndaŋgara li ayra, ɓakagi duk njaf suuna ana, «Yawe ni mulna.»

³² Ko mbo lum ma ŋgolna ŋgoɓ u bege mamba, ko ŋgoo bagira halaŋ li luuna,

³³ ko ŋgusugi suu duk gurana yi kolo u delesira furira fok Yawe ɗaŋ, kay ana nam ka mbay a ti mulla kay ndaŋgara.

³⁴ Geleɗegi Yawe, kay ana nam jiviya kay ana ɗegee mamba ni a fafaɗta.

³⁵ Dagi ana, «Suɗumi kiyo, Lona vi iiri mamira, tokomi eg tamiya, buɗumi ay ki duk njaf suuna a geleɗeŋ seŋ ma teteɗna, lami furira a geleɗeŋga.

³⁶ Gi deɓpa maŋ Yawe, Lona vi suu Israelna, ay jew day a fafaɗta, ni a fafaɗta.» Suu halaŋŋa di ana, «Amin,» hin, «Gagi deɓpa maŋ Yawe.»

³⁷ David hin Azaf u gorsemma kaŋga fok Zandukka Galamba vi Yawera a li sunda tew tew fok Zandukka ko gaɗta daɗ ki kay buuna tew tewra na.

³⁸ Suu juɓ vun zira ni Obed-Edom u gorsemma dok-karkiya yam kalavandi, Obed-Edom goŋ Yedutunna u Hosa.

Ɓivunna u geleɗta hu Gabaonda

³⁹ David hin mul ma li ɓivunna Sadok u gorsem suu li ɓivunna fun Ziŋ Yawera kolo kay li ma mbuy ma Gabaonna.

⁴⁰ A li ɓivun ma ŋgalam ki ŋgalina maŋ Yawe tew tew kolo kay givin ma togolla maɗii may, fiɗigi may a li dlara ki ɓiiri hu magaara gaɗta ta Yawe ɓiiriɗ ka maŋ suu Israelnara.

⁴¹ Suu u asina ni Heman u Yedutun u suu ŋgaɓasi yasi ki u sesi a geleɗ Yawena, «Kay ana ɗegee mamba ni a fafaɗta.»

⁴² Suu asina ni Heman u Yedutun. Asi u tokolomma kosiya, tlesuu bura kosi a tuɗ u soolla geleɗ Lonara. Goryoŋ Yedutunna hinisi ki ni a kak vun grekŋa.

⁴³ Suuna halaŋ gegelay tuɗ vo varamu. David hin hoŋ dagan a paɗ vunum ki kay ziimu.