ROMA 9 - Bahasa Manggarai New Testament

Pilé Ata Israél

¹ Aku tombo ata molor agu toé nggopétk, ai aku mosé neki-ca agu hi Kristus. Ici naig lut téi saka-si lorong titong de Nai Nggeluk,

² te aku ngawa-ngaés agu wéong kéta naig.

³ Ngot aku ngoéng te mawang agu bégas oné mai hi Kristus, landing kaut le nuk asé-ka’ég, ata ca wa’u agu akus.

⁴ Isé ata Israél, ata poli tétid ciri anaks, agu poli tiba mengit, reké, ngaji agu wintuk Taurat.

⁵ Isé waé de empo ata loas Mésias. Hia béta-mai sanggéd cao-ca. Hia hitu Mori Keraéng ata patun te naring tédéng lén. Amén!

⁶ Maik reké de Mori Keraéng, toét-toé rapaky. Ai toé sanggén ata situt mai oné mai Israél ata pilé le Mori Keraéng.

⁷ Nenggitu kolé toé sanggén ata situt bilang waé di Abraham ngong anak di Abraham taungs, maik: “Hanang oné mai waé di Ishak te caro waé de hau.”

⁸ Betuan: Toé sanggéd anak lut weki situt caro sanggéd anak de Mori Keraéng, maik sanggéd anak landing le reké ata caro nenggitu.

⁹ Ai reké de Mori Keraéng nenggo’oy: “Du cekeng nenggo’o aku te mai, du hitu kole hi Sara mangag anak ata ronan.”

¹⁰ Maik toé hitu kanang. Céwé si’ang kolé hi Ribka, loas sua taus anak ata rona oné mai hi Ishak, empo dité.

¹¹ Ai du sanggéd anak situ toéd loas agu toéd pecing te pandé di’a ko da’at, kudut ngoéng de Mori Keraéng te wakéy latang te pilé Diha. Toé landing le pandé, maik landing le bénta Diha --

¹² ného hitut poli taé agu hi Ribka, “Anak ata ngaso te ciri mendi de anak-cucu,”

¹³ ného manga tulis oné Surak Nggeluk: “Momang Laku hi Yakob jogot Laku hi Esau.”

¹⁴ Émé nggitu gi, apa ata kudut curup lité? Asa, toé agiln Mori Keraéng ko? Toé ta!

¹⁵ Ai Hia curup agu hi Musa: “Aku momang ata siot ngoéng momangs Laku, agu séndé ata siot ngoéng séndés Laku.”

¹⁶ Jari, wérét situ toé lorong ngoéng ko rébok de manusia, maik lorong momang de Mori Keraéng.

¹⁷ Ai oné Surak Nggeluk Mori Keraéng taé oné hi Firaun, “Itu tara Aku téti hau, kudut Aku toto kuasag oné hau, agu kudut mésén ngasang Daku oné temu tana lino.”

¹⁸ Jari, Hia momang latang te céi kaut ata ngoéng Diha agu pandé kembe-lu’ak céi kaut ata ngoéng Diha.

¹⁹ Ho’o ga, méu te curup agu aku, “Émé nggitu gi, apan kolé ata salan Liha? Ai céi ata ngancéng dungkang ngoéng Diha?”

²⁰ Céing kéta néng méu, oé manusia, wiga méu ngancéng léwang Mori Keraéng? Ngancéng weli hiat dédék latay taé agu hiat dédékn, “Co’o tara nenggitu dédékg aku le hau?”

²¹ Asa weli ga, isét dung lewing toé weli nia-ngoéngd kudut te pandé gelo oné-mai tana liling situt camas? Ngancéng liha pandé can gelo ata di’an agu can kolé ata toé di’an.

²² Jari, émé Mori Keraéng kudut toto cumpeng agu kuasa’N, Hia toto lembak mesén latang te isét kudut wahéng Liha, ai isé ata poli pandé rabon Hia. Ai poli mengkekn Liha te pandé ampus.

²³ Mori Keraéng kolé ngoéng te toto bora mengit Diha, latang te sanggéd ata momang Diha ata poli mengkekd latang te mengit,

²⁴ ngong ité ata poli bénta Liha toé hanang oné mai ata Yahudi, maik oné mai wa’u bana kolé.

²⁵ Cama ného ata poli taéN Liha oné surak di Nabi Hoséa, “Ata toé ro’éng Daku, te caro ro’éngs Laku, agu wa’u ata toé momangs, ciri momangs Laku.”

²⁶ Agu oné osang nia te curup agu isé, “Méu toé ro’éng Daku.” Nitu kudut te curup agu isé, “Meu ho’o anak de Mori Keraéng ata mosé.”

²⁷ Agu hi nabi Yésaya curup latang te wa’u Israél, “Koném po nekid wa’u Israél cama ného laing sili tacik, maik hanang récid ata tiba selamak.

²⁸ Ai apa ata poli curup Liha, te pandé le Mori Keraéng oné lino, jepek agu gélang kéta.”

²⁹ Cama ného ata poli taé li nabi Yésaya bebolon, “Émé Mori Keraéng de lino ho’o, toé reding ité anak, ité poli ciri mempo cama ného béndar Sodom agu Gomora.”

Selamak Data Wa’u Bana Agu Wéléng de Wa’u Israél

³⁰ Émé nggitu gi, apa ata kudut tombo lité? Kali wa’u bana ata toé kawé selamak, poli tiba selamak, ngong selamak ali imbid.

³¹ Maik ata Israél, koném po dolong wintuk hitut kudut main selamak, toé laong caid oné wintuk hitu.

³² Co’o tara toén? Ai isét Israél dolong wintuk hitu toé landing le imbi, maik lorong pandéd. Isé do’ong oné watu ata pandé pangga,

³³ ného manga ata poli tulis: “Ata tu’ungn, Aku na’a oné Sion ca watu timpok te pandé pa’u ata, agu céing ata imbi oné Hia, toé manga majan Liha.”