WIDANG SI’ANG ONÉ HI YOHANÉS 5 - Bahasa Manggarai New Testament

Anak Jimbal Agu Surak Ata Palas Le Pitu Roku 5:1-14

¹ Itug kali ita laku ca surak ata ngai lulungn oné limé wanang Diha hitut lonto oné seriga. Surak hitu poli tulis bonén agu bepé’angn, agu palasy le pitu roku.

² Ita kolé laku cengata malekat ata gala kétay, agu télés kéta rewengn, “Céing ata patun te nggé’i sanggéd roku situ kudut surak hitu ngancéng céngkan?”

³ Maik éta Surga ko oné lino ko bewa-mai lino, toé kéta manga cengatan ata ngancéng céngkan surak hitu te lélo bonén.

⁴ Aku rétang’k ali wéong naig, ai toé kéta manga cengatan ata patun te céngkan surak hitu te lélo bonén.

⁵ Itug kali mai taé de cengata ata tu’a situ, “Néka rétang é! Lélo dé, singa oné-mai panga Yéhuda, ngong waé di Daud polig ontongn, wiga Hia ngancéng nggé’id pitu roku situ agu céngka surak hitu.”

⁶ Itug kali ita laku ca Anak Jimbal hesé oné bahi-réha seriga hitut léok le patd kaka agu sanggéd tu’a. Anak Jimbal hitu lélon laku néhot poli mbelén, pitud ranggan agu pitud kolé matan: Hitus pitud nai de Mori Keraéng ata poli wuat nggere-oné temu tana lino.

⁷ Itug kali main Anak Jimbal hitu te tiba surak hitu oné-mai limé wanang Diha hitut lonto éta seriga.

⁸ Du tiban Liha surak hitu, kaka pat situ agu suampulu pat tu’a suju olo-mai ranga Diha. Néténg-néténg isé, cau gici ca’d kecapi agu ca piala emas ata kembus le nus dupa: Hitu dé ngaji de sanggéd weki serani.

⁹ Étan lisé ca déré weru: “Ité patun te tiba surak hitu agu nggé’i sanggéd rokun; ai Ité poli mbeléd. Ali dara Dité, poli weli sanggéd manusia oné-mai néténg-néténg panga, curup, wa’u agu ro’éng do latang te Mori Keraéng.

¹⁰ Ité poli pandé isé ciri ca wa’u latang te imam kanang, te gori keturu latang te Mori Keraéng dité, agu isé te perénta ného rajas oné lino.”

¹¹ Itug kali ita agu dengéd laku reweng de malékat ata do kétas léok-mai seriga, pat kaka agu sanggéd tu’a-tu’a situ. Dod malékat situ toé ngancéng rékéngd,

¹² agu télés kéta déréd, “Anak Jimbal hitut poli mbelé patun te tiba kuasa, bora, nggalas, mberes, hiang, mengit, agu sanggéd naring!”

¹³ Itug kali dengé laku déré de sanggéd lawa Surga agu oné lino, bewa-mai lino, agu sanggéd taung situt manga bonén tacik, “Latang te Hia hitut lonto éta seriga agu latang te Anak Jimbal hitu, sanggéd naring, hiang, mengit agu kuasa dengkir lén!”

¹⁴ Walé de kaka pat situ, “Amén”, agu sanggéd taung tu’a situ kolé suju agu ios.