PILIPI 3 - Bahasa Manggarai New Testament

Molor Ata Tu’ungn Kéta

¹ Asé-ka’é daku! Méu weli ga, paka nakam oné Mori Keraéng. Toé manga mendon laku te malék kolé tulis tombo ho’o oné méu, kudut irip méu.

² Jerék koém agu ata situt pandé da’at kanang gorid, ai isé situ patun te caro acus. Isé sutut kétas, te paka sunat taung sanggéd ata.

³ Maik, ité ho’o ata poli sunat tu’ung kéta; toé isé. Ai ité toé deming adak ata pandé de manusia. Ité suju Mori Keraéng le titong de Nai Nggeluk, agu wali di’a lité landing le nai ca anggit agu hi Kristus Yésus.

⁴ Bo kali tu’ungn, aku kolé manga tanjéng latang te adak ata pandé de manusia. Émé manga ata bana bombong-rak laing landing adak ata pandé de manusia, céwén kolé aku:

⁵ aku poli sunat oné leso te alon; aku ho’o ata ici tana kéta oné-mai wa’u Israél, oné-mai panga di Bényamin, ata Ibrani pu’u. Latang te cau adak Taurat, aku ho’o ata Farisik.

⁶ Le ndengn cau adak Taurat, wiga aku buber kéta te wahéng weki serani. Jari, émé rékéng latang te molor oné adak Taurat, aku toé manga celag.

⁷ Maik apa ata danong ciri ontong latang te aku, te ho’on ciri rowak landing hi Kristus.

⁸ Ngot sanggéd cao-ca rékéng laku toé manga betuad. Latang te aku, pecing hi Kristus Yésus Mori daku hitu céwé angos oné-mai sanggéd taung cao-ca. Landing ali Hia, aku poli ledo sanggéd taung situ ai rékéng laku sanggéd situ ného wéangs, kudut aku tiba hi Kristusk

⁹ agu ciri nai ca anggit oné Hia. Molor daku ho’o, toé ali molor de rug méséng lorong Adak Taurat, maik molor hitut widang de Mori Keraéng landing imbi oné hi Kristus.

¹⁰ Ca kaut ngoéng daku: pecing Hia agu manté kuasaN te to’o kolé, neki ca oné ta’ong susaN agu ce tara ného Hiak oné mataN.

¹¹ Cemoln ga, aku bengkes te to’o kolé oné-mai mata.

¹² Curup daku toét nenggo’o, jepek agu besik kétak aku ga, maik aku toé ké’ét mping te dolong koso nolak ata poli ambin li Kristus Yésus.

¹³ Asé-ka’én, ce tu’ungn weki rug aku toé noing te polig tiban koso nolak hitu. Ho’o ata pandé daku: hémongs laku ga apa situt polid, ai te ho’on ga aku mping te dolong situt manga bolo-mai.

¹⁴ Itu tara toé ké’étg aku mping kudut haéng ontong du turung cemoln, ngong mosé tédéng lén éta Surga; latang te hitup tara béntad ité le Mori Keraéng lorong hi Kristus Yésus.

¹⁵ Landing hitu, mait ga ité hitut tu’ag oné imbid, nenggitu koé idepd. Maik, émé manga oné-mai méu ata woléng nuk, weki Run Mori Keraéng dé ata pandé si’angn oné méu.

¹⁶ Ata di’an, co’om pandé ruda oloy lité idep hitu lorong wintuk hitut poli mangan dengkir te ho’on.

Toing Latang Te Weki Serani

¹⁷ Asé-ka’én, lorong koé toming dakum agu lut koé isé siot mosé cama ného ami ata ciri toming latang te méu.

¹⁸ Ai ného hitut dongkalin laku poli taé oné méu, agu ho’oy si’ang kolén laku cang agu rétang’g, dod ata da’at ba wekid ata pandé rowak betuan mata di Kristus oné panggol.

¹⁹ Cemold isé situ ampus taungs, ai tuka rud ciri Mori Keraéng disé, copél disé ciri angos disé, nukd hanang oné perkara de lino.

²⁰ Maik ité ho’o ro’éng de Surga. Nitu-main dé cain Raja Ata Sambé dité, Mori Yésus Kristus hitut géréng dité.

²¹ Hia kudut pandé caling weki dité ho’ot mericu, wiga ce tara agu weki angos Diha, lorong kuasaN hitut ngancéng pandé koda sanggéd cao-ca.