MATÉUS 7 - Bahasa Manggarai New Testament

Paté Bicar Ata 7:1-5

¹ “Méu néka bicar atam, kudut méu néka beté bicar le Mori Keraéng.

² Ai le tepo hitut papé de méu te tepo ata, méu te tepo latam. Agu wolo de méu hitut papé te wolo ata, te wolo laing méuy.

³ Co’o tara ngancéng itan le hau lopat oné mata de haé atam, wokot watang oné mata de rum toé baé le hau?

⁴ Co’o tara ngancéng taé agu haé atam: kong, laku cokét lopat oné mata de hau, kali manga kin léba oné mata rum.

⁵ Oé méut ata pisik, olong na’a pé’ang léba oné mai matam, wiga hau ngancéng ita cias, te na’a pé’ang lopat hitut oné mata de haém.”

Paté Ata Nggelukn Agu Manga Belarn 7:6

⁶ “Méu néka téing ceca ata nggelukn oné acu, agu néka wéwér tubis oné ela, boto wedi le wa’is lisé, poli hitu ngo cowit méuy.”

Paté Sendo Ngaji 7:7-11

⁷ “Tegi ga, manga kali téin agu méu, kawé ga, manga kali itan le méu, nontong ga, manga kali céngkan para latang te méu.

⁸ Ai néténg-néténg ata hitut tegi, manga tiban, agu néténg-néténg ata kawé, manga néng itan, agu atat nontong, céngka de para latang te hia.

⁹ Manga dé’it oné mai méu te téing watu latang te anakn, émé hia tegi hang?

¹⁰ Ko téing ulary, émé hia tegi ikang?

¹¹ Jari, émé méut da’at pecing téing apa ata di’an agu anakn, apan kolé Emas hitu éta Surga! Hia te téing ata di’an oné isét tegi agu Hia.”

Salang Ata Molorn 7:12-14

¹² “Sanggéd apa ata ngoéng laing le méu, te pandé lata agu méu, pandé ga nenggitu kolé latang te isé. Hituy icin sanggéd Adak Taurat agu toing de sanggéd nabi.

¹³ Ocok ga, lut para hitut kéot, ai mésén para agu ngénggan salang te pandé copél, agu dod atat lut oné salang hituy;

¹⁴ ai kéotn para agu salang nggeroné mosé agu cekoé kali atan te haéngn salang hitu.”

Paté Toing Atat Pandé Wéléng Laingy 7:15-23

¹⁵ “Jerék-jerék agu sanggéd nabi tangké, ata mai cé’é méu, biluk ného jimbals, kali cetu’ungn isé situ serigala da’ats.

¹⁶ Ali wuan le méu tara pecingd isé. Ngancéng weli pua wua anggor oné mai karot gulung, ko wua ara oné mai ndango-rang?

¹⁷ Nenggitu kolé néng, néténg-néténg haju di’a, wuan kolé di’a, agu pu’u haju da’at, wuan kolé da’at.

¹⁸ Toé ngancéng haju di’a, wuan toé di’a, ko haju da’at cir wua dias.

¹⁹ Agu néténg-néténg haju situt cir wua toé di’a, toét-toé wéséts agu oké longgo oné apiy.

²⁰ Jari, oné mai wuad, tara baéd isé le méu.

²¹ Toét sanggéd ata so’ot nggo’o taéd ngong Aku: Mori, Mori, te ngo nggeroné mbaru Surgas, maik hia hiot lut ngoéng de Ema Daku éta Surga.

²² Du leso cemol dod ata taé agu Aku: Mori, Mori, toé weli ami hiot ba pedé le ngasang Ditékm, agu mbér jing da’at le ngasang Ditékm, agu pandé dod tanda lengét le ngasang Dité kolé?

²³ Du hitu kéta di Aku te tombo si’ang agu isé: Toé kéta manga baé dé’its méu Laku! Ngom oné mai ranga Dakus, sanggés méu ata pandé da’at!”

Sua Tarad Lagang 7:24-27

²⁴ “Néténg-néténg atat dengé curup Daku so’o agu pandés, cama ného ata nggalas nai, hiot hesé mbarun lobo watu.

²⁵ Poli hitu cai usang agu tuan mbang, cain kolé buru warat te héur mbaru hitu, maik mbaru hitu toé rencoy, ai hesé lobo watuy.

²⁶ Maik néténg-néténg atat dengé curup Daku so’o agu toé pandés, hia cama ného ata bapay, hiot hesé mbarun éta lobo laingy.

²⁷ Poli hitu cai usang agu mbang, cain kolé buru warat te héur mbaru hitu wiga rencon agu le kéta rewutn.”

Pinga Disét Séngétn

²⁸ Du cemoln tombo ho’o de Mori Yésus, jenger taung ata do situt dengé toing Diha,

²⁹ ai toing Diha cama ného ata hiot manga kuasan, toé ného isét pecing Taurat disé.