MATÉUS 27 - Bahasa Manggarai New Testament

Mori Yésus Todang Oné Hi Pilatus -- Matan Hi Yudas 27:1-10

¹ Du tiongn gérak tana, sanggéd imam kepala agu taung tu’ad uku Yahudi, lonto camas bantang te ala Mori Yésus.

² Isé ranté Hia, itu kali todangn agu téing oné hi Pilatus, wakél de adak Roma itu.

³ Du hi Yudas, ata téing Hia, ita, te Mori Yésus poli letin te alay, og tesern. Itug kali téing koléd liha séng situt telumpulu ringgit pérak oné sanggéd imam kepala agu taung tu’ad,

⁴ agu mai taén: “Aku poli pandé ndékok ai téing dara data toé manga salan.” Landing mai walé disé: “Apay nipu dami hitu? Papong rum hau hitu!”

⁵ Itu kali pekéd liha séng pérak situ nggere-oné Mbaru Nggeluk, agu kolé nitu main, og wendu le run.

⁶ Imam-imam kepala emi séng pérak situ agu mai taéd: “Séng so’o néka ondang na’a oné peti takung, ai so’o ringgi dara.”

⁷ Du poli bantang camad, isé weli ali séng situ tana ata caron Tana Data Tukang Lewing latang te boa data long.

⁸ Itup tara dengkir leso ho’on caro lata Tana Dara.

⁹ Le hitu rapakg curup ata poli tombon le nabi Yérémia: “Isé tiba séng telumpulu ringgi pérak, hituy séng co’i ropo te cengata, lorong co’i hitut éta main disét Israél,

¹⁰ agu isé téing séng situ latang te jaji tana data tukang lewing, ného baté pedé de Mori agu aku.”

Mori Yésus Oné Ranga Di Pilatus 27:11-26

¹¹ Itu kali Mori Yésus dadé oné ranga di Pilatus. Wakél de Adak Roma hitu réi agu Hia: “Raja data Yahudi Hau ko?” Mai walé de Mori Yésus: “Weki rum hau ata taé nenggitu.”

¹² Maik le buang de imam-imam kepala agu de tu’a do latang te Hia, toé gorin te walé.

¹³ Mai taé di Pilatus agu Hia: “Toé dengés le Hau do kétas buang data sakasi-sakasi so’o latang te hau?”

¹⁴ Landing toé kéta walé cekoén Liha, wiga adak tana hitu lenget kétay.

¹⁵ Laséng olo main, hiat Paténg tana ngancéng ledo can ata bui du leso ramé le lir data do.

¹⁶ Agu du hitu manga oné bui cengata ata leng kéta bail da’atn, ngasangn hi Yésus Barabas.

¹⁷ Le poli impung taungd lé hitu, mai taé di Pilatus ngong isé: “Céing ngoéng de méu kudut lego laku latang te méu, Yésus Barabas ko Yésus hitut caron hi Kristus?”

¹⁸ Pecing muing liha, isé téing Mori Yésus le beti naid.

¹⁹ Du lari lonton hi Pilatus oné seriga beté-bicar, pedé le winan: “Néka oné hau bicar data molor hitu, ai landing Hia aku susa mésé du nipig oné wié.”

²⁰ Landing le sosok de imam-imam kepala agu taung ata tu’ad, lawa do situ buber kétas te tegi, kudut lego hi Barabas maik ala Mori Yésus.

²¹ Paténg tana hitu walé agu taé oné isé: “Céing oné mai isét sua so’o ata ngoéng le méu kudut lego laku latang te méu?” Mai taé disé “Hi Barabas.”

²² Mai taé di Pilatus ngong isé: “Émé nenggitu, co’oy kéta laku pandén Mori Yésus hitut béntan hi Kristus?” Sanggéd isé ciék kéta taungs: “Pépék Hia oné panggol!”

²³ Mai kolé taén: “Landing pandé da’at apa kéta ata poli pandé Diha?” Maik isé tambang kétas ciékd: “Pépék Hia oné panggol.”

²⁴ Woko lélo li Pilatus te oké bod sanggéd curup diha, ngot wangkag kolé te manga rihi-rahat, itu kali emi waén agu samo limén oné ranga data do agu mai taén: “Aku toé manga salag latang te dara data ho’o; aiks weki rus méu!”

²⁵ Agu sanggén ro’éng situ walé: “Kong damang dara Diha tanggong lami agu le anak-anak dami!”

²⁶ Itu kali ledon liha hi Barabas latang te isé, maik Mori Yésus lisé lucay, poli hitu condo liha kudut pépék oné panggoly.

Loér Mori Yésus 27:27-31

²⁷ Poli hitu serdadu-serdadu di Pilatus todang Mori Yésus nggere-oné mbaru di Pilatus, itu kali bénta taung lawa rentum baling mai Mori Yésus.

²⁸ Mai isé loak taung ceca pakéN agu onén lisé juba kentusy.

²⁹ Isé rojok ca songkok karot agu na’a oné sa’iN, poli hitu téing Hia lisé ca helung oné limé wanangN. Poli hitu isé tikul olo mai Hia agu loér lokét Hia lisé, mai taéd: “Tabé o, Raja data Yahudi!”

³⁰ Isopé lisé Hia, agu emi helung hitu agu ongga oné sa’in.

³¹ Poli taung loérn lisé Hia, agu paké kolés ceca Run. Poli hitu todang Hia nggere-pé’ang te pépék oné panggoly.

Mori Yésus Pépék Oné Panggol 27:32-44

³² Du isé lako nggerpé’ang béndar, isé cumang agu cengata oné mai Kiréné, ngasangn hi Simon. Dedek molé ata hitu lisé, te pola panggol de Mori Yésus.

³³ Itu kali caid isé oné ca osang ata ngasangn Golgota, ngong: “Osang Toko Longkor.”

³⁴ Itu kali isé téing Hia inung anggor ata halok le pesuy. Du poli cemekn Liha, toé gorin Hia te inung.

³⁵ Du poli pépékn Hia oné panggol, itus kali pati lisé ceca pakén le téka-nampo.

³⁶ Itu kali isé lonto nitud te lami Hia.

³⁷ Agu éta sa’in manga tulis, te tombo, co’o tara pépékn Hia oné panggol: Ho’oy hi Yésus Raja Data Yahudi.”

³⁸ Ata panggol cama-cama agu Hia, manga sua taus ata tako, cengata oné racap wanangN agu cengata oné racap léoN.

³⁹ Sanggén ata lako nitu loér Hia, cang agu ngéngur sa’id,

⁴⁰ mai taéd: “Oé Hau hitut kudut pandé renco Mbaru de Mori Keraéng agu hesé kolé le Hau oné telu leso, selamak damang weki ruM, émé Hau Anak de Mori Keraéngh, damang wa’uh de éta mai panggol hitu!”

⁴¹ Nenggitu kolé loér de imam-imam kepala agu ata pecing Taurat agu sanggéd tu’a-tu’a, mai taéd:

⁴² “Ata bana Liha ngancéng selamakd, maik weki ruN toé ngancéng selamakn, émé Hia raja data Israél, damang dé ‘Hia wa’uy éta mai panggol hitu kudut imbi lami Hia.

⁴³ Hia bengkes kéta tu’ung oné mai Mori Keraéng: Di’ab ga, Mori Keraéng te selamak Hiay, Mori Keraéng henan agu Hia. Ai Hia poli taé ruN: Aku dé Anak de Mori Keraéngk.”

⁴⁴ Ngot ata tako situt cama panggol agu Hia, mbécik kolé Hia nenggitu.

Mata De Mori Yésus 27:45-56

⁴⁵ Pu’ung ongga campulusua nendep tuil oné temu tana hitu dengkir ongga telu.

⁴⁶ Anggat ongga telu, ciék-idén Mori Yésus: “Eli, Eli, lama sabakhtani?” Ngong: Mori Daku, Mori Daku, co’o tara ledong Akud Ité?

⁴⁷ Dengé hitus, pisa taus ata hesé lupi nitu mai taéd: “Hia bénta hi Élia.”

⁴⁸ Og hidi-hada main cengata oné mai isé situ; hia emi bunga karangy, bembo oné anggor héo, itu kali tudukn le laro helung agu téing inung oné Mori Yésus.

⁴⁹ Landing taé data iwon: “Néka, damang lélon, ot mai hi Elia te campé Hia.”

⁵⁰ Mori Yésus ciék da’at koléy, agu beté nain.

⁵¹ Lélo damang, tabér rinding Mbaru de Mori Keraéng, rodo wirot kaut laing suay, pu’ung éta main haéng-wan, cain nupung mésé, agu golo-golo watu biké laing suas.

⁵² Sanggéd boa lénga kéta taungs agu dod ata nggeluk ata poli matad to’o kolés.

⁵³ Agu du poli to’on Mori Yésus, isé kolé ngo pé’ang oné mai boad, poli hitu ngo oné béndar nggeluks, agu toto wekid oné lawa do.

⁵⁴ Kepala de serdadu agu sanggéd serdadu ata lami Mori Yésus, cirik rantang kéta taungs du ita lisé nupung agu sanggéd situt ata polid, itug kali mai taéd: “Tu’ung-tu’ung kéta, Hia ho’o Anak de Mori Keraéngy.”

⁵⁵ Agu manga nitu do kolés inéwai ata lélo déu maid, isé inéwai siot lorong Mori Yésus oné mai Galiléa ata laséng gatang Hiad.

⁵⁶ Oné mai isé situ manga kolé hi Maria Magdaléna, agu hi Maria endé di Yakobus agu hi Yosép agu endé de anak-anak di Zébédéus.

Boakn Mori Yésus 27:57-61

⁵⁷ Redu kudut wiég tana, main cengata ata bora, ata Arimatéa, ngasangn hi Yosép agu hia kolé poli ciri ata nungku de Mori Yésus.

⁵⁸ Hia ngo cumang hi Pilatus agu tegi liha rapu de Mori Yésus. Jera li Pilatus te téing agu hia.

⁵⁹ Agu mai hi Yosép téti rapu hitu, wuwus le towé hemél ata bakok mbot,

⁶⁰ agu loling liha oné boa weru, ata poli cakén oné golo watu. Agu du poli nggolingn liha ca watu mésé oné para boa hitu, itug kali kolén.

⁶¹ Maik hi Maria Magdaléna agu hi Maria bana, ka’éng kid nitu lonto bolon para boa hitu.

Boa De Mori Yésus Lamiy 27:62-66

⁶² Ného diangn du leso poli mengkek, mais imam-imam kepala agu ata Parisi cama-cama ngos oné hi Pilatus,

⁶³ agu mai taéd: “Keraéng, nuk kin lami, te Hia hitut pandé calang ata du lari mosén, nenggo’o taén: Telu leso wa ga, Aku to’o kolék.

⁶⁴ Landing hitu, jér koé lité te lami boa hitu haéng leso te telun; émé toé, aram maikin rasul-rasuln te tako rapu Diha, poli hitu ga, mai taéd ngong ro’éng: Hia poli to’o kolén oné mai ata mata, wiga pandé calang ho’o ata céwé da’atn cemoln, oné mai hitut laring cain.”

⁶⁵ Mai taé di Pilatus ngong isé: “Ho’os ata lami situ latang te méu, ngom kali ga, agu lami di’a-di’a boa hitu.”

⁶⁶ Os kali ngod isé agu le campé disé situt lamin, cap lisé boa hitu agu lamiy.