LUKAS 7 - Bahasa Manggarai New Testament

Mori Yésus Pandé Ina Mendi De Kepala Serdadu Kapérnaum 7:1-10

¹ Du Mori Yésus poli curup oné ranga de lawa don, itug kali ngo oné Kapérnaumn.

² Nitu manga cengata kepala serdadu, ata manga mendin hitut momang kéta liha. Mendi hitu rémé beti mésén, agu tiong te matay.

³ Lété kepala serdadu hitu dengé cai de Mori Yésus, hia jera pisa taus tu’ad ata Yahudi ngo oné Mori Yésus te tegi, kudut Hia maiy, agu pandé ina mendin.

⁴ Isé ngo oné Mori Yésus agu tegi kéta tu’ung lisé, campé Diha, mai taéd: “Laing patén kéta, hia te campé Litéy,

⁵ ai hia momang wa’u ditéy, agu onéy dé hia té heséd mbaru ngaji dami.”

⁶ Itu kali Mori Yésus ngo cama agu iséN. Du Hia toég tadang koén oné mai mbaru de kepala serdadu hitu, kepala de serdadu hitu wuats haé-reban te tombo agu Hias: “Mori, néka kamer bon weki, ai aku toé remog té tiba Ité oné mbaru daku;

⁷ ali hitu, aku doing kolé le weki rug, toé remog mai cé’é Ité. Maik taé kaut reweng ca gewekn, wiga ina muing mendi daku hitu.

⁸ Ai weki rug aku cengata ata be wa mai, agu be wa mai aku manga kolé serdadu. Émé taé kaut laku oné cengatan serdadu hitu: Ngoh! Ngo kaut hia; agu oné cengatan kolé: Mai!, mai kaut hia; ko agu mendig kolé: Pandé ho’o!, pandé kaut liha.”

⁹ Du poli dengén le Mori Yésus curup situ, lenget laing Liha, agu cang holés oné lawa do situt lut Hia, mai taén: “Aku curup agu méu, imbi mésé nenggo’o toé dé’it manga itan Laku, koném po oné mai ata Israél!”

¹⁰ Agu du kolé mbarud ata situt wuat, itag lisé mendi hitu polig géal-kolé wekin.

Mori Yésus Pandé Mosé Kolé Anak Reba Oné Béndar Nain 7:11-17

¹¹ Poli kaut hitu, Mori Yésus ngo oné ca béndary, ngasangn Nain. Ata nungkun ngo cama agu Hias, nenggitu kolé ata do holid lut Hia.

¹² Lété Hia ruis lewang béndar, manga rapu ata rakang nggere pé’angy, anak léca ata rona, endén luang gi; agu dod ata oné mai béndar hitu lut inéwai luang hitus.

¹³ Ita le Mori Yésus inéwai luang hitu, kembuk pucun le momang; itug kali tae de Mori Yésus agu hia: “Endé, emo rétang ga!”

¹⁴ Poli hitu Mori Yésus ngo ruis berotong agu cabi Liha rapu hitu. Og asis isét rakangn. Mai taé de Mori Yésus: “Aku curup agu hau; nana, to’oh ga!”

¹⁵ Og to’on kaut ata reba hitu, agu lonton, agu wangka kolég curupn, mai Mori Yésus téing kolé oné endén.

¹⁶ Sanggéd ata situ rantang da’ats, agu isé bong Mori Keraéngs, cang agu taéd: “Cengata nabi mésé poli mangan oné bahi-réha ité. Mori Keraéng mai ba te selamak ro’éngn.”

¹⁷ Og wéro-émbon keréba latang te Mori Yésus labok Yudéa, agu oné temun tana hitu.

Mori Yésus Agu Hi Yohanés Cebong 7:18-35

¹⁸ Lété hi Yohanés dengé réba latang te sanggéd apa situ oné mai sanggéd ata nungkun,

¹⁹ béntas liha sua taus oné mai isé agu jera ngo oné Mori Yésus, te réi: “Itéy hitut kudut mai, ko ami paka géréng kolé ata bana?”

²⁰ Du isét sua situ cai oné Mori Yésus, curup lisé: “Hi Yohanés Cebong susung ami te réi Ité: Itéy hitut kudut mai, ko ami paka géréng ata bana?”

²¹ Du hitu Mori Yésus pandé ina do ata hena le beti, le kélo agu le jing da’at; Hia kolé widang ita latang te sanggéd ata buta.

²² Agu Mori Yésus walé isé: “Kolém ga, agu tura oné hi Yohanés, sanggéd situt ita agu dengé le méu: Ata buta ita atas, ata péko lakos, ata boké ciri helis kolé wekid, ata nenteng ciri nilors, ata mata mosé kolés, agu oné isét lénggé tombo keréba di’a.

²³ Agu mosé di’a ata hitut toé doét Akuy.”

²⁴ Du poli koléd ata situt wuat di Yohanés, wangkag Mori Yésus tombo oné ata do situ latang te hi Yohanés: “Kudut co’o ngo de méu oné satar mambak? Kudut ngo lélo helung ata wi’u-wa’uk le buru?

²⁵ Ko kudut co’o weli ngo de méu? Kudut lélo ata hitut paké ceca silep? Ata hitut paké ceca silep agu mosé di’a, ka’éngn oné mbaru de raja.

²⁶ Jari, kudut co’o weli ngos ga? Lélo nabi? Tu’ung kéta, agu Aku taé agu méu: Ngot céwé mésé oné mai nabiy.

²⁷ Ai latang te hia manga tulis: Lélo damang, Aku te wuat atag, bolo mai Ité; hia te wé’ang salangd wa ranga Dité.

²⁸ Aku taé agu méu: Oné mai isé situt loas le inéwai, toé manga cengatan ata céwé mésén oné mai hi Yohanés; landing ata merik-kejikn oné Adak de Mori Keraéng, céwé mésé oné mai hia.”

²⁹ Sanggéd taung ata do situt dengé curup Diha, liup nitu kolé agu isét tiba béa, tiba molor de Mori Keraéng, ai isé poli sendo wekid te cebong li Yohanés.

³⁰ Maik sanggéd ata Parisi agu ata pecing Taurat doét nanéng de Mori Keraéng latang te isé, ai isé toé gorid te cebong li Yohanés.

³¹ Mai taé de Mori Yésus: “Agu apa kéta Laku tomingd, sanggéd ata uwa ho’o; agu le pai rapangn isé situ?

³² Isé situ rapang anak koé siot lonto oné amba, situt kepok taud: Ami tebang sunding te méu, maik méu toé saém, ami déré ngiwi-ngaésm, maik méu toé rétangm.

³³ Ai main hi Yohanés Cebong, toé hang rotiy agu toé inung anggory, maig taé de méu: hia hena le jing da’aty.

³⁴ Poli hitu, main Anak Manusia, hang agu inungy, maig taé de méu: Lélo dé, Hia ca ata ngomper agu ata languy, haé reba disét tegi béa agu ata ndékok.

³⁵ Maik nggalas de Mori Keraéng laing molorn, latang te sanggéd ata situt tiban.”

Mori Yésus Luma Wa’in Le Inéwai Ndékok 7:36-50

³⁶ Cengata ata Parisi siro Mori Yésus te hang oné mbarun. Mori Yésus ngo oné mbaru dihat Parisi hituy, agu lonto kudut hangn.

³⁷ Oné béndar hitu, manga cengata inéwai mbérong. Du dengén le inéwai hiu, te Mori Yésus rémé hangn oné mbaru data Parisi hitu, itug kali main ba ca kuntul watu ata manga mina bengén.

³⁸ Cang agu rétangn hia ngo hesé bemusi mai Mori Yésus ruis wa’in, pandé baca wa’i de Mori Yésus le lu’u matan agu koso le wukn, omo wa’in, poli hitu luma le mina bengé.

³⁹ Du ata Parisi hitut siro Mori Yésus, ita pandé de inéwai hitu, mai taén oné nain: “Damang émét nabi de Hia ho’o, pecing kéta muing Liha, céing péng, agu inéwai ata apa péng hitut omar Hia; pecing kéta Liha, te inéwai hitu, cengata ata ndékoky.”

⁴⁰ Mai taé de Mori Yésus ngong hia: “Simon, Aku kudut manga curupg agu hau.” Mai walé di Simon: “Wan kali lité gé, Tuang Guru.”

⁴¹ Mai taé de Mori Yésus: “Manga sua taus ata manga raungd agu cengata ata pandé beka séngn. Hia cengata, raungn lima ratus dinard, hiat cengata kolé limampulud.

⁴² Soho isé toég ngancéng bajard, itug kali laud kaut raung disét sua situ liha. Céing weli oné mai isét sua ata céwé momang hian?”

⁴³ Mai walé di Simon: “Bo laku, hia hitut céwé do kosod raungn.” Mai taé de Mori Yésus ngong hia: “Laing tu’ungn taé de hau hitu.”

⁴⁴ Cang agu holésn nggere oné inéwai hitun, Hia curup agu hi Simon: “Ita le hau inéwai ho’oh? Aku mai oné mbaru de hauk, maik hau toé téing Aku waé te waca wa’ig; ngot hia waca wa’i Daku, ali lu’u agu koso le wukn.

⁴⁵ Hau toé tiba Aku ali omo, maik pu’ung caig Aku, hia toé asiy omo wa’i Dakun.

⁴⁶ Hau toé luma le mina ulu Daku, maik hia luma wa’i Daku le mina bengé.

⁴⁷ Landing hitu, Aku curup agu hau: Ndékokn situt do, polig ampongd ai leng mésén momang diha. Maik ata hitut cekoéy kali ampongn, cekoé kolé momangn.”

⁴⁸ Itu kali mai taé Diha ngong inéwai hitu: “Ndékokm polig ampongn.”

⁴⁹ Agu isé ata lonto cama hang agu Hia, nuk wa naid: “Céing kéta péng Hia ho’o, wiga ngancéng ampong ndékok?”

⁵⁰ Maik Mori Yésus curup agu inéwai hitu: “Imbim hitu poli selamak laing haun, kolé di’a-di’ah ga!”