LUKAS 2 - Bahasa Manggarai New Testament

Loasn Mori Yésus 2:1-7

¹ Du hitu Kaisér Agustus téi ca perénta, jera bilang taungs ata temu tana lino.

² Ho’o kéta bilang ata laring cain, du hi Kirénius ciri gubernur tana Siria.

³ Itu kali ngod taung ata tulis ngasangd néténg béndar rud.

⁴ Nenggitu kolé hi Yosép mai oné mai béndar Nasarétd, tana galiléa, nggerlau Yudéa, oné kota di Daud, ngasangn Bétléhém, - ai hia oné mai uku agu waé di Daud –

⁵ Kudut tulis cama agu hi Maria, nacan, ata rémé weki mendon.

⁶ Du hitu, rapak leson hi Maria te loas,

⁷ agu hia lada cengata anak ata rona, anak ngason; itu kali wéngko le lapon, agu rening oné galang, ai toé manga osang oné mbaru te toko disé.

Isét Lami Jimbal 2:8-20

⁸ Oné tana hitu manga isét lami jimbal, ata ka’éng oné satar lami paéngd le wié.

⁹ Rodo hesén cengata malékat de Mori Keraéng ruis isé, agu dirap de Mori, néray baling isé; agu isé rantang da’ats.

¹⁰ Mai taé de malékat hitu ngong isé: “Néka rantang, ai moron tu’ung, aku tombo agu méu, ata nisang kéta nai latang te sanggén ata.

¹¹ Leso ho’o loas tu’ung te méu ata sambé, ngong hi Kristus, Mori, oné béndar di Daud.

¹² Agu ho’o tandan te méu: Méu té ita cengata anak wara, wéngko le lapo, agu halas kin oné galang.”

¹³ Agu rodo itad cama laing agu malékat hitu lawa do éta Surga, ata naring Mori Keraéng, taéd:

¹⁴ “Bong kéta latang te Mori éta awang-ngkiang, agu hambor-meler oné lino latang te manusia situt henan agu Hia.”

¹⁵ Du sanggéd malékat situ ngos, kolé nggere-éta Surga, sanggéd taung isét lami jimbal situ taé cama taud: “Mai ga, ngo oné Bétléhém kudut lélo apa hitut manga nitu, ného hitut taé de Mori Keraéng agu ité.”

¹⁶ Itu kali isé gélang-gélang ngod, agu ita hi Maria agu hi Yosép, agu anak réak hitu, ata ngai halas kin oné galang.

¹⁷ Agu du itan lisé, isé tombo taung apa situt poli taé oné isé latang te Anak koé hitu.

¹⁸ Agu sanggéd isét dengé lengéts, landing apa situt taé disét lami jimbal agu isé.

¹⁹ Maik hi Maria na’a taung oné nain sanggéd tombo situ agu tenangs liha.

²⁰ Itug kali koléd taung isét lami jimbal ga, cang naring agu bong Mori Keraéngd, ai sanggéd taung situt dengé agu ita disé, laingd taung agu apa situt poli taé agu isé.

Sunat Agu Condon Mori Yésus – Hi Siméon Agu Hi Hana 2:21-40

²¹ Du rapak alo leson agu Hia paka sunaty, agu téing ngasang hi Yésusy, hituy ngasang hitut taé le malékat du toéd na’ang wekin Hia le endén.

²² Agu du rapak leso pandé nggélokn, lut adak Taurat di Musa, isé ba Hia oné Yérusalém, kudut condo Hia oné ranga Mori Keraéngy,

²³ ného ata poli tulis oné Adak de Mori Keraéng, “Sanggéd taung anak ata rona ata ngasod paka pandé nggeluks te Mori Keraéng,”

²⁴ agu kudut ba takung lorong apa ata taé oné Adak de Mori Keraéng, wina ronas tekur ko suan anak tekur jawa.

²⁵ Manga cengata oné Yérusalém, ngasangn hi Siméon. Hia cengata ata molor agu ata junggu, ata géréng kin Hiat lémbu nai latang té Israél. Nai Nggeluk manga lobo hiay,

²⁶ agu oné hia poli toi le Nai Nggeluk, te hia toé di matay émé toé di ita liha Mésias, ngong Hia hitut palas le Mori Keraéng.

²⁷ Hia ngo oné Mbaru de Mori Keraéngy le sur de Nai Nggeluk. Du hitu Mori Yésus, dadé nggere-oné lata tu’an, kudut pandé sanggéd adak Taurat,

²⁸ hia tiba Anak koé hitu agu kapun, cang agu naring Mori Keraéngn, mai taén:

²⁹ “Te ho’on Mori, ondang ngon mendim agu hambor meler, lorong agu taé Rum.

³⁰ Ai mata daku poli ita selamak hitut oné mai Ité,

³¹ hitut poli ambin Lité oné ranga de sanggéd ata,

³² ngong gérak hitut ciri si'ang latang té uku bana, agu ciri bong laing latang te ro’éngm Israél.”

³³ Eman agu endén lenget da’ats, landing sanggéd apa situt curup latang te Hia.

³⁴ Itu kali berkak isén hi Siméon, agu mai taén ngong hi Maria, endé de Anak koé hitu: “Tadan tu’ung, Anak koé ho’o poli cerepn te pa’u agu to’od do ata oné Israél, agu te ciri ca tanda te mangan raha,

³⁵ – agu ca sempilang te burut pucu de rum, - kudut nesad nuk nai data do.”

³⁶ Nitu mannga kolé hi Hana, cengata nabi inéwai, anak di Fanuél, oné mai panga di Asyér. Hia tu’a kéta gi. Du poli kawingn, pitu ntaung mosé agu ronan,

³⁷ te ho’on hia luang gi, agu ubu alompulupat ntaungy. Hia toé dé’it manga ledo Mbaru de Mori Keraéng, agu wié leson suju agu puasa agu ngaji.

³⁸ Agu du hitu kolé hia mai nituy agu wali di’a oné Morin, agu tombo latang te Anak koé hitu, oné sanggéd ata situt géréng kid loak langki latang té Yérusalém.

³⁹ Du poli pandéd taung situ, lut Adak de Mori Keraéng, itus kali koléd oné béndar baté ka’éngd, béndar Nasarét oné Galiléa.

⁴⁰ Anak koé hitu éta-éta uwan agu weger gi, nggalas kétay, agu momang de Mori Keraéng penong oné Hiay.

Mori Yésus Du Ubu Campulusua Ntaungn Manga Oné Mbaru de Mori Keraéngy 2:41-52

⁴¹ Néténg ntaung, ata tu’a do de Mori Yésus ngo oné Yérusalém, du leso ramé Paska.

⁴² Du ubu campulu sua ntaung Mori Yésus, itu ngod isé oné Yérusalém ného olo maid leso ramé hitu.

⁴³ Du polid leso ramé situ, lété koléd, Mori Yésus ka’éng kin oné Yérusalém, toé baé lata tu’an.

⁴⁴ Ai le nuk disé, am Hia manga oné ata situt cama lako, éma lako kid isé tédéng leso ca; itud po kawé Hia oné haé wa’ud agu haé pecingn.

⁴⁵ Lodok le toé ita Hia lisé, itu holés kolé nggere-oné Yérusalém cang agu kawé Hiad.

⁴⁶ Telu leso wa ga, ita lisé Hia oné Mbaru de Mori Keraéng; Hia lari lonto oné bahi-réha isét pecing Taurat, cang séngét isén, agu sinad Liha réi do oné isé.

⁴⁷ Sanggéd taung isét séngét curup Diha lenget laing cedekn, nenggitu kolé sanggéd walé Diha situ.

⁴⁸ Du itan Hia lata tu’an, lenget taung isé, mai taé de endén ngong Hia: “Nana, co’o tara pandé nenggo’om Hau agu ami? Lélo emam agu aku soang naigm kawé Hau?”

⁴⁹ Mai walé Diha ngong isé: “Co’o néng tara kawé Akus méu? Toé néng pecing le méu, te Aku paka manga oné Mbaru de Emag?”

⁵⁰ Maik toé ingutn lisé curup hitut taé Diha agu isé.

⁵¹ Itug kali kolén Hia cama laing agu isé nggere-oné Nasarét; agu Hia uwa oné isé kin. Endén na’a oné nai taungs curup situ.

⁵² Agu Mori Yésus éta-éta tu’an, agu tambang nggalas agu mésén, agu danga-danga momangn le Mori Keraéng agu manusia.