LUKAS 10 - Bahasa Manggarai New Testament

Mori Yésus Wuat Pitumpulu Ata Nungkun 10:1-12

¹ Poli hitu Mori Yésus pilé pitumpulu ata nungku bana, og wuat lako olos, sua tau celako olo mai Hia, néténg béndar agu osang situt kudut ngo Diha.

² Mai taé Diha ngong isé: “Bo dani dod, maik ata akod cekoés kali. Itu tara tegi agu Keraéng hitut ngara ako, kudut Hia jera isét duat te ako hitu.

³ Ngo ga, tu’ung-tu’ung Aku wuat méu mana anak jimbal ngo oné bahi-réha acu cekel.

⁴ Néka ba kandi ko bokong, ko sendal, agu néka tabé céing kaut tédéng lari lakos.

⁵ Émé méu ngo oné ca mbaru olong taé di: Hambor-libur latang te mbaru ho’o.

⁶ Agu émé nitu manga ata patun te tiba hambor-libur, tabém hitu te ka’éng bétahiay. Maik émé toé kali, tabém hitu kolé oné rum.

⁷ Ka’éng oné mbaru hituh, hang agu inung apa kaut ata téing data agu hau, ai ca ata pala patun te tiba lahén. Néka dé caling-caling mbaru.

⁸ Agu émé méu ngo oné ca béndar, agu tibam nitu, hang kaut apa ata gatang latang te méu,

⁹ agu pandé ina isét beti ata manga nitu, agu taé ngong isé: Adak de Mori Keraéng ruis gi agu méu.

¹⁰ Maik émé méu ngo oné ca béndar, agu toé tibam nitu, ngo taung oné salang mésén béndar hitu, agu kepok nenggo’o:

¹¹ Kebok de béndar ho’o kolé, ata rapét oné wa’i damis, péntangs lami wa ranga de méus; maik pecing di’a ho’o: Adak de Mori Keraéng ruis gi.

¹² Aku taé agu méu: du leso hitu, mendo de béo Sodom daing géaln oné mai de béndar hitu.”

Mori Yésus Maja Pisad Béndar 10:13-16

¹³ “Calang hau Khorazim! Calang hau Bétsaida! Ai émé oné Tirus agu Sidon manga tanda lenget ného situt poli jarid oné bahi-réha méu, danongs isé teserd ga, agu walud.

¹⁴ Maik du cain leso bicar, mendo de Tirus agu Sidon, te daing géald oné mai mendo de méu.

¹⁵ Agu hau Kapérnaum, asa hau te téti nggere-éta awangh? Toé, hau te delep haéng lino disét matah wa!

¹⁶ Céing kaut ata séngét méun, hia séngét Akuy; agu céing kaut ata doét méun, hia doét Akuy; agu céing hitut doét Akuy, ata hitu doét Hia hitut susung Akuy.”

Koléd Pitumpulu Ata Nungku 10:17-20

¹⁷ Poli hitu, ata nungku situt pitumpulu, kolé agu nisang naid, mai taéd: “Mori, jing da’at kolé koda taungs lami le ngasang Dité.”

¹⁸ Mai taé de Mori Yésus ngong isé: “Aku ita jing da’at pa’u ného hilaty éta mai awang.

¹⁹ Moro matan, Aku poli téing kuasa agu méu te wedi ular agu letik, agu kuasa té ta’ang mberes data bali, wiga toé manga ata pandé calang laing méun.

²⁰ Landing néka ba’ang nenggitu, néka naka laing méséng jing situ kudus le méu, maik naka landing ngasangs manga tulisn éta Surga.”

Taé Wali Di’a Agu Cébo 10:21-24

²¹ Lété hitu kolé, nakay Mori Yésus oné Nai Nggeluk, mai taén: “Aku wali di’a agu Ité, Ema, Mori de awang agu lino, ai sanggéd situ cehas Lité latang te isét nggalas agu molor, maik tois Lité oné isét koé. Yo Ema, hitus ata henan Lité.

²² Sanggéd ménan poli téing oné Akud le Emag; agu toé cengatan ata pecingn céingy Anak, bom hi Ema, agu céingy hi Ema, bom hi Anak, agu oné ata hitut oné hia henan le Anak hitu, te toi molor hitu.”

²³ Poli hitu, holés Mori Yésus oné sanggéd ata nungkun situ, agu mai taéN: “Komés méu hitut ita sanggéd apa situt ita le méu.

²⁴ Ai Aku taé agu méu: Dod nabi agu raja ngoéng te lélo apa hitut lélo de méu, maik toé itay, agu nanang te séngét apa hitut dengé le méu, maik toé dengéy.”

Ata Samaria Hitut Gawas 10:25-37

²⁵ Manga cangkalin, heséy cengata ata pecing Taurat te kapa Mori Yésus, mai taén: “Tuang Guru, apa kétay pandé daku kudut haéng mosé tédéng lén?”

²⁶ Mai walé de Mori Yésus agu hia: “Apa néng ata tulis oné Taurat? Apay le hau bacang nitu?”

²⁷ Mai walé data hitu: “Momang ga Mori Keraéng, mai wa mai naim, agu sanggéd mberesm, agu sanggéd nukm, agu momang cama haé atam ného weki rum.”

²⁸ Mai walé de Mori Yésus ngong hia: “Laing tu’ungn walém hitu; pandé ga nenggitu, wiga hau moséh.”

²⁹ Maik kudut molor kaut le weki run, mai taé data hitu ngong Mori Yésus: “Agu céingy néng cama haé atag hitu?”

³⁰ Mai walé de Mori Yésus: “Manga cengata, mai éta mai Yérusalém ngo nggere-sili Yériko; hia palé kéta oné limé data rampoky, hitut toé hanang emi taungs cecan, maik ongga koléy hia, poli hitu ngod, ondang kaut hia boatn.

³¹ Ného cambun kéta manga cengata imam lako oné salang hituy wan; itay liha ata hitu, maik lécé salang bepé’angy.

³² Nenggitu kolé cangata ata Léwi liba nituy; du itan liha ata hitu, hia lécé cecupu mai salangy.

³³ Og cain cengata ata Samaria, ata rémé ngo lakon, cai nituy; agu du itan liha ata hitu, kendut kéta nain le momang.

³⁴ Hia ngo ruis ata hituy, agu roké taung réun du poli wecar le mina agu anggor liha. Poli hitu, hia téti lobo keledai ata léti de run, agu dadé oné mbaru datay agu gojingn liha.

³⁵ Ného diangn, hia téing sua dinar agu hiat ngara mbaru, mai taén: Gojing di’a-di’a hia, agu émé manga weli dancud oné mai doi so’o, aku te lékos, du kolég aku.”

³⁶ Mai taé de Mori Yésus: “Céing oné mai ata telu so’o, le nuk de hau, ata cama haé ata, latang te ata ho’ot pa’u lobo limé de perampoky?”

³⁷ Mai walé data hitu: “Ata hitut poli toto momangn agu hia.” Mai taé de Mori Yésus ngong hia: “Ngoh ga, agu pandé koé nenggituh!”

Hi Maria Agu Hi Marta 10:38-42

³⁸ Lété Mori Yésus agu sanggéd taung ata nungku du lakod, cai Hia oné ca béo. Cengata inéwai, ngasangn hi Marta, tiba Hia oné mbarun.

³⁹ Inéwai hitu manga asé ka’én, ngasangn hi Maria. Hi Maria ho’o lonto ruis wa’i de Mori Yésus, agu séngét curup Diha,

⁴⁰ alang hi Marta, hidu-hadut tiba Hia. Hia ngo ruis Mori Yésusy agu mai taén: “Mori, toé kéta ita Lité, asé-ka’é daku ondang kaut hanang koég aku hidu-hadutg? Jera koé hia campé akuy!”

⁴¹ Maik walé de Mori Yésus: “Marta, Marta, hau simpung agu pandé kélo weki rum le dod raja,

⁴² maik ca kanang ata sékékn; hi Maria pilé ata di’an kéta, hitut toé kéta ngancéng emin oné mai hia.”