IBRANI 7 - Bahasa Manggarai New Testament

Hi Kristus Agu Hi Mélkisédék

¹ Hi Mélkisédék hitu raja béndar Salém agu Imam Mésé de Mori Keraéng Ata Langkas Kéta. Hia ngo curu agu berkak hi Abraham du kolé oné-mai rampas ata pandé koda sanggéd raja.

² Latangt hi Mélkisédék, téing li Abraham bati-laing cepulu oné-mai sanggéd taung paéngn. Ngasang Mélkisédék, betuan ngong raja agil; raja Salém, betuan ngong raja hambor-libur.

³ Hi Mélkisédék hitu toé manga endé-eman agu toé manga turuk empon. Leso diha toé manga pu’ungn agu mosé diha toé manga cemoln. Ai hia cama ného Anak de Mori Keraéngy, wiga ciri imam kin tédéng lén.

⁴ Jari, idep de-di’a, mésén kéta hi Mélkisédék ho’o, wiga hi Abraham, ema de empo dité téing bati laing-cepulu oné-mai sanggéd ceca rampas situt céwé di’ad.

⁵ Lorong Adak Taurat waé di Lewi kali situt rang imam ata tiba dis kudut paing bati-laing cepulu oné-mai wa’u Israél asé-ka’é disé, koném po isé so’o kolé waé di Abrahams.

⁶ Maik hi Mélkisédék, hitut toé waé di Léwi, tiba bati-laing cepulu oné-mai hi Abraham. Hia kolé berkak hi Abraham ata poli paéng reké de Mori Keraéng.

⁷ Bo tu’ung, ata téing berkak céwé mésé kuasan po ata tiba berkak.

⁸ Iwon kolé, sanggéd imam ata tiba bati-laing cepulu, isé situ manusia ata mosé dokong. Maik iwon kolé weli ga, lut Surak Nggeluk, hi Mélkisédék ata tiba bati-laing cepulu hitu, hia manusia ata mosé tédéngy.

⁹ Ngot ngancéng kolé taé nenggo’o: ali létang di Abraham poli tegi kolé bati-laing cepulu oné-mai panga di Léwi, atat manga hakn te tiba bati-laing cepulu.

¹⁰ Koném po toé di loas hi Léwi, maik rékéngn ga hia poli manga boné weki di Abraham empon, du hi Mélkisédék cumang agu hi Abrahamy.

Hi Kristus Hitu Imam Ata Céwé Méngit Oné-mai Hi Harun

¹¹ Ali imamat di Léwi wa’u Israél poli tiba Adak Tauratd. Émé imamat di Lewi hitu poli besikn, co’o tara ngai sékék kin wérét cengata ata bana ciri imam mésé ného hi Mélkisédék ata toé oné-mai wa’u di Harun?

¹² Ai émé célung imamat hitu, toét-toé Adak Taurat te célung koléy.

¹³ Hitut tombo laing lité ngong Mori dité: Hia oné-mai panga banan. Oné-mai panga Diha ho’o toé dé’it manga cengatan koé ata te ciri imam.

¹⁴ Ai poli pecing taung lata do te Mori dité oné-mai panga di Yéhuda. Latang te panga hitu hi Musa toé dé’it manga tombo cekoén latang te imam-imam.

¹⁵ Tombo hio éta bao céwé si’ang kolé émé poli tétin imam bana ného hi Mélkisédék.

¹⁶ Hia ciri imam toé landing wintuk de manusia, maik landing le moséN hitut kuasa agu toé ngancéng ampusy.

¹⁷ Ai latang te Hia manga saka-si oné Surak Nggeluk, “Hau muing Imam te tédéng lén ného hi Mélkisédék.”

¹⁸ Iwon kolé, adak hitut poli mangan danong koar gi, ai adak hitu toé manga mberesn agu toé manga betuan.

¹⁹ Ai Adak Taurat toé manga pandé besikn. Iwon kolé weli ga, Mori Keraéng poli toi bengkes ata céwé di’an, ata pandé ruis ité agu Mori Keraéng.

²⁰ Sanggéd taung situ poli jarid ali wada de Mori Keraéng. Bo tu’ung, mangas iwod poli ciri imam ata toé olong wadas le Mori Keraéng.

²¹ Maik Mori Yésus olong waday po ciri imam du Mori Keraéng curup oné Hia: “Mori poli wadan, agu Hia toé manga ngalang- ngalang bon: Hau muing imam tédéng lén.”

²² Itup tara Mori Yésus poli ciri pa’ar oné-mai reké ata céwé di’an.

²³ Imam-imam ce bana situ dod, ai isé te matas toe ngancéng ruda olo ciri imam.

²⁴ Maik, Mori Yésus mosé tédéng lén, wiga imamat Diha toé ngancéng hésing oné ata bana.

²⁵ Landing hitu, Hia ngancéng pandé selamak ali besik kéta sanggén ata situt létang laing Hia ngo oné Mori Keraéng. Ai Hia mosé mtaung kudut ciri Létang témba disé.

²⁶ Ai Imam Mésé nenggitu ata sékék laingn lité: ata nggeluk, toé manga salan, toé manga saki-nai, bécang oné-mai ata ndékokn, agu céwé mengit oné-mai sanggéd lawa Surga.

²⁷ Hia toé ného imam-imam mésé banay, siot lété leso paka ba takung hélang latang te koso ndékok de weki rud, agu poli hitu itu po latang te koso ndékok de ro’éng. Ai gori hitu poli pandén Liha cangkalin latang te tédéng lén, du Hia takung weki Run.

²⁸ Ai Adak Taurat poli téti ata siot toé besikd te ciri Imam Mésé. Maik du poli Adak Taurat, Mori Keraéng reké agu wada te téti AnakN ciri Imam Mésé ata besikn te tédéng lén.