IBRANI 5 - Bahasa Manggarai New Testament

¹ Néténg Imam Mésé ata le pilé oné-mai bahi-réha manusia, wéréty latang te manusia oné woé-joé disé agu Mori Keraéng, kudut hia ba takung agu hélang landing ndékok.

² Imam mésé hitu paka ngancéng haéng-pa’él sanggéd ata toé pecing agu ata wéléng, ai weki run hia penong ali les.

³ Landing hitu, hia paka ba takung agu hélang latang te ampong ndékok, toé hanang latang te ndékok data imbi, maik latang te ndékok de weki run kolé.

⁴ Toé manga cengatan ata téti le weki run te ciri imam mésé, maik le bénta de Mori Keraéng cama ného hi Harun danong.

⁵ Nenggitu kolé hi Kristus, toé téti le weki run te ciri Imam Mésé, maik téti le Mori Keraéng. Ai nenggo’o taé de Mori Keraéng: “Hau hitu dé Anak Daku! Leso ho’o hau poli ciri Anak Dakum.”

⁶ Taé kolé le Mori Keraéng, “Hau Imam tédéng lén ného hi Mélkisédék.”

⁷ Oné moséN ného manusia, Mori Yésus ngajiy tegi ali rétang nenep agu lanar lu’u mata oné Mori Keraéng ata ngancéng selamak Hia oné-mai mata. Ali nggelukN, tegi Diha sendo le Mori Keraéng.

⁸ Koném po Mori Yésus Anak de Mori Keraéng, maik Hia poli nungku te junggu oné ta’ong susaN.

⁹ Ali hitu, Hia ciri ata sambé ata besik, agu ciri pu’un selamak tédéng lén latang te sanggéd atat junggu oné Hia.

¹⁰ Hia ciri Imam Mésé le Mori Keraéng ného hi Mélkisédék.

Langga Kudut Néka Ledong Imbi

¹¹ Latang te rang Imam Mésé de Mori Yésus, do kéta ata paka curup lami. Maik toé émongn latang te si’angn ai mandeng kéta méu te baé pa’él sanggéd cao-ca.

¹² Émé lélo oné-mai sokor, méu naun te ciri guru. Maik méu ngai sékék kis te tiba nungku oné-mai ata bana latang te raja pu’ud curup de Mori Keraéng. Méu ngai sékék kis te inung susu, toé hang cirang.

¹³ Ai néténg ata situt ruda kid inung susu, hia toé idep di’a toing molor, ai hia anak koé kin.

¹⁴ Maik hang cirang latang te sanggéd ata tu’a, siot ngancéng baé woléngd ata di’a oné-mai ata da’at, landing le paténg oné manté.