IBRANI 13 - Bahasa Manggarai New Testament

Toing Agu Titong

¹ Bengkes daku, nahé méu momang-tau kis ného asé-ka’é ca imbi!

² Néka wengel méu te tiba meka oné mbarus, koném toé di pecing le méu meka hitu. Ai le pandé nenggitu, manga dé’it ata, ata toé noing liha, kali malékat meka hitut tiba diha.

³ Nuk koé ata siot oné bui, ai weki rus kolé méu néhot ata buim. Nuk kolé ata siot rendaks lata, ai weki rus méu kolé ngai mosé kis oné lino ho’o.

⁴ Poro sanggés taung méu hiang mosé ka’éng kilo, néka lagé locé toko, ai Mori Keraéng te beté-bicar sanggéd ata nelung agu ata mbérong.

⁵ Méu néka ciri mendi de séngm, maik nisang kaut nais ali apa ata manga oné méu. Ai Mori Keraéng poli taé, “Aku toé kéta ledong méu oné leso agu pencang oné wejang.”

⁶ Landing hitu ali imbi tu’ung, ité ngancéng taé nenggo’o, “Morin ata campé aku. Aku toé rantangk. Apa néng ata ngancéng pandé le manusia latang te aku?”

⁷ Nuk di’a-di’a latang te sanggéd tu’a de méu situt poli tombo rewéng de Mori Keraéng oné méu. Idep de-di’a du moséd agu du cemol moséd, tunti koé le méu imbi disé.

⁸ Mori Yésus Kristus hitu cama kéta kin, pu’ung du wangkan, te ho’on agu tédéng lén.

⁹ Néka lut le méu sanggéd toing situt melet, ata pandé wéléng méu. Ai ata di’an, nai de méu ndeng hanang le tabing de Mori Keraéng, toé le sanggéd wintuk latang te hang ata toé manga betuan oné isé situt lorongn.

¹⁰ Ité manga ca compang. Sanggéd isét keturu laing oné ndéi, toé ngancéng hang takung ata manga oné compang hitu.

¹¹ Dara de kaka situt takung luing hélang te ampong ndékok ba le Imam Mésé oné Lo’ang Nggeluk kéta, maik tobo de kaka situ tapa be pé’ang-mai ndéis.

¹² Itu dé tara Mori Yésus kolé, mata be pé’ang-mai lewang bendar kudut pandé nggeluk ro’éng Diha ali dara de weki Run.

¹³ Landing hitu, mait ga ité ngo be pé’ang-mai ndéi agu lut ciri bocik cama agu Hia.

¹⁴ Ai oné lino ho’o, toé manga osang ata makengn latang te ité. Ité kawé osang ata makengn te ka’éng du mosé nggere-olon.

¹⁵ Landing hitu, mait ga ité, ali létang-témba de Mori Yésus nukung tité naring Mori Keraéng agu bong ngasang Diha. Hituy takung nggeluk dité latang te wali di’a oné Mori Keraéng.

¹⁶ Néka hémong pandé di’a agu campé tau, ai hitus takung ata patun oné Mori Keraéng.

¹⁷ Lorong koés sanggéd wintuk data tu’a laing agu junggu koém oné isé. Ai isé rinding mtaung méu, agu isé te papong oné Mori Keraéng. Wiga isé keturu ali nisang naid, toé ali tilir ata toé ba ontong latang te méu.

¹⁸ Ngaji koé kis latang te ami, ai imbi tu’ung lami te ici nai dami nggélok kéta kin. Oné sanggéd cao-ca ami ngoéng te pandé di’a mtaung.

¹⁹ Petot tu’ung laku tegi oné méu, kudut ngaji latang te akum, wiga Mori Keraéng gélang dadé aku te kolé oné méu.

²⁰ Mori Keraéng poli pandé mosé kolén Mori Yésus oné-mai ata mata. Ali mataN hitu, ho’o ga Hia ciri Ata Lami Mésé sanggéd jimbalN. Le mataN hitu kolé, pandé petok reké de Mori Keraéng tédéng lén agu ité.

²¹ Nahé Mori Keraéng pandé jemut méu ali sanggéd ata di’an ata sékékn, te méu kudut lorong ngoéng Diha, lut hi Yésus Kristus. Latang te Hia dé, mengit tédéng lén! Amén.

²² Aku pedé méu asé-ka’én, kudut sanggéd toing so’o tiba le méu ali lilek de nais, koném po wokokn surak daku ho’o.

²³ Aku tombo kolé agu méu te asé-ka’é dité hi Timotéus, polig pé’angn oné-mai bui. Cepisa hia mai cumang akun, aku te dadé hiak ngo la’at méu.

²⁴ Caing koé le méu tabé dami, latang te sanggéd tu’a de méu agu sanggéd ro’éng ca imbi. Asé-ka’é ca imbi oné-mai Italia téing tabé kolé latang te méu.

²⁵ Nahé tabing de Morin loréng sanggés taung méu.