2 TIMOTÉUS 2 - Bahasa Manggarai New Testament

Toing Te Ngaji De Weki Serani

¹ Laring cain kéta, aku toing méu: gesarm ga, ngaji latang te sékék data bana, ngaji tegi campé agu wali di’a latang te sanggén ata.

² Ngaji kolé latang te sanggéd raja agu sanggéd tuang mésé, kudut ité mosé metek agu temer kid, agu toton sundur dité te hiang Mori Keraéng.

³ Hituy ata di’an agu henan oné Mori Keraéng, Mori Sambé dité.

⁴ Ngoéng Diha, kudut sanggén ata tiba selamaks agu pecing nia ata molorn lorong toing de Mori Yésus.

⁵ Ai Mori Keraéng hitu cay kali agu cay kali létang témba kamping Mori Keraéng agu manusia, ngong hi Kristus Yésus.

⁶ Mori Yésus hitu poli condo wekiN kudut te sambé sanggén manusia: Hitu saka-si du leso hitut poli wérétn le Mori Keraéng.

⁷ Latang te saka-si hitu, Mori Keraéng poli wérét akun te ngo oné sanggén ata toé Yahudi kudut wéro oné isé Keréba Di’a latang te imbi ata molor oné hi Kristus Yésus. Tombo ho’o daku molorn, toé tombo nggopét.

Latang Te Ba Weki Data Rona Agu De Iné-wai né Ngaji De Weki Serani

⁸ Deming daku, kudut nia kaut wan ngajid ata rona, ngaji ga agu nggélok nai, toé ali rabo ko ali léwang tau.

⁹ Poro nenggitu kolés iné-wai. Isé sélék di’a-di’as agu jeper kaut agu papé ceca ata mongkis weki. Néka dolé sua wuk agu néka sélék emas, mutiara ko ceca ata wegitd.

¹⁰ Maik ata céwé naun, sanggéd iné-wai sélék wekid le pandé di’a, ného co’o kaut ata patun latang te iné-wai du ngaji.

¹¹ Iné-wai paka nungku te hema kaut, cang agu junggu te tiba toing.

¹² Toé sendong laku iné-wai te toing ata agu te perénta ata rona; co’om hema kauty,

¹³ ai hi Adam ata dédék laring cain, itu po hi Hawa.

¹⁴ Céwén kolé, toé hi Adam hitut hena le damang, maik iné-wai hitu ata hena le damang agu pa’u oné ndékoky.

¹⁵ Koném nenggitu, iné-wai te tiba selamaky ali loas anakn, tama hia meték kin imbin oné hi Kristus Yésus agu momang haé ata agu néka manga pandé cela oné mosén.