1 PETRUS 2 - Bahasa Manggarai New Testament

Mori Yésus Ného Watu Landuk

¹ Landing hitu oké-koés sanggéd da’at, sanggéd nggapét, sanggéd pisik, jogot agu pocu.

² Jari koém ného anak wara hiot loas weru, hiot masa mtaung waé cucu ata nggélok, ngong reweng de Mori Keraéng, ali hitu uwa imbis agu haéng selamak.

³ Manga tulis oné Surak Nggeluk: “Poli mantén tu’ung le méu di’a de Morin.”

⁴ Ali hitu, mai ruis ga oné Hia, ai Hia hitu watu ata téing mosé. Watu hitu poli okén le manusia, maik pilé agu hiangy le Mori Keraéng.

⁵ Méu ondang wekis te papé laing ného watu mosé, te pandé ca mbaru nggeluk de Mori Keraéng. Ali hitu méu ciri ného imam ata gori latangt Mori Keraéng, agu létang hi Yésus Kristus podo takung ata henan oné nai de Mori Keraéng.

⁶ Ai manga tulisn oné Surak Nggeluk: “Lélo dé, Aku poli pésék ca watu oné béndar Sion, watu landuk ata poli nggalé agu wegitn, céing ata imbi oné Hia, toé manga ritak laingn.”

⁷ Watu hitu wegitn latang te méut imbi, maik latang te isét toé imbi: “Watu hitut poli okén le tukang, ciri watu landuky, poli kolé ciri watu pangga ata pandé timpok laing.”

⁸ Hia ciri watu te timpok isé, ai isé toé lorong reweng de Mori Keraéngs. Hitu muing wérétd isé le Mori Keraéng.

⁹ Maik méu dé wa’u ata poli pilés, imam ata gori keturu raja, wa’u nggeluk, ro’éng Run Mori Keraéng. Méu poli pilés te keréba sanggéd pandé lenget Diha, hitut poli bénta méu pé’ang oné-mai nendep nggere-oné gérakN hitut néra.

¹⁰ Danong méu toé ro’éng de Mori Keraéngm, maik te ho’on poli ciri ro’éng Dihas. Danong méu toé momangm le Mori Keraéng, maik te ho’on poli tiba momang Dihas.

Mendi De Mori Keraéng

¹¹ Asé-ka’é ata momang laku! Aku toing méu, ai méu ata long agu ata mbéot oné lino ho’o. Tadang koém oné-mai belek da’at hitut toé ké’ét dungkang wakar.

¹² Di’a koé ba wekis oné bahi-réha wa’u situt toé pecing Mori Keraéngs, kudut émé pocu méus te méu ata pandé da’at, ngancéng ita kin lisé sanggéd pandé di’a de méu agu bong Mori Keraéngs du leso mai Diha.

¹³ Lorong toming de Morin, junggu koém latang te sanggéd ata cau kuasa, pu’ung oné-mai Kaisér ata landongn kuasa,

¹⁴ dengkir agu gubernur ata téti le Kaisér latang te wahéng sanggéd ata pandé da’at agu hiang sanggéd ata pandé di’a.

¹⁵ Ai ho’oy ngoéng de Mori Keraéng: Ali pandé di’a, méu tadu mu’u data bodok.

¹⁶ Mosé koém ného ata toé mendi, maik néka papé mosé toé mendi hitu latang te tadu sanggéd da’at, maik mosé koém ného mendi de Mori Keraéng.

¹⁷ Hiang ga sanggén ata, momang koés sanggéd asé-ka’é ca imbi, hiang ga Mori Keraéng, hiang ga Kaisér!

Kélo Di Kristus Ného Ca Toming

¹⁸ Oé méu sanggés mendi! Junggu koém kamping moris ali hiang, toé hanang latang te isét di’a naid agu joél, maik latang te isét gutek kolé.

¹⁹ Émé méu ta’ong kélo hitut toé paka tanggong le méu landing noing ngoéng de Mori Keraéng, méu te tiba widangm.

²⁰ Ngancéng weli naring laing ko, émé méu ta’ong hena le ongga, ai méu pandé ndékokm? Émé méu ta’ong susa landing le pandé di’a, méu te tiba widang oné-mai Mori Keraéng.

²¹ Ali hitu tara béntas méu le Mori Keraéng, ai hi Kristus kolé poli ta’ong susa latang te méu agu poli reding tomingN, kudut méu lut lé’é Diham.

²² Hia toé manga dé’it pandé ndékokn, agu toé dé’it manga curup nggopétN.

²³ Du Hia tida wincar-winaky lata, Hia toé gorin te léko. Du ta’ong susaN, Hia toé manga ngetek atan, maik condo wekiN oné Mori Keraéng hitut agil beté-bicarN.

²⁴ Weki Run Mori Yésus poli pola panggol landing ndékok dité, kudut ité toé ngoéng te pandé ndékok kolé, maik mosé latang te pandé molor. Ali sanggéd réu Diha méu poli inas ga.

²⁵ Ai danong méu ného jimbal wéléngm, maik te ho’on poli émba kolé nggere-oné ata lami agu ata tinu wakars.