Marc 16 - Bibla tu limba Rrãmãnã

Injearea al Isus

¹ Cum tricu Sãmbãta, Maria Magdalena shi Maria, muma al Iacovu, shi Salomea, acumpãrarã njurizmati s-nãdzea s-aundzea Isusul.

² Dimineatsa tu prota dzuã a stãmãnãljei, multu curund, eali vinirã la murmint, cãndu ma insha soarili.

³ Shi dzãtsea namisa di nãsi: “Cai va nã arucuteascã cheatra di la intrarea a murmintului?”

⁴ Ma cãndu scularã ocljilji, vidzurã cã cheatra eara arucutitã cu tutã cã eara multu mari.

⁵ Intrarã la murmintu shi vidzurã un tinir tsi eara apunat di nandreapta, nviscut cu albi, shi armasirã aspãrati.

⁶ Shi elu lã dzãsi a lor: “Nu v-aspãrats! Voi cãftats Isus Nazareul tsi eara crutsisitã, elu s-injie, nu easti aoa. Ia, loclu iu eara bãgatã.

⁷ Ma imnats s-lã-dzãtsets a ucenitsilor a lui shi a Petrul cã elu ma s-dutsi dininti tu Galile, aclo va lu videts ashi cum vã dzãsi.”

⁸ Shi eali inshirã trãoarã shi fudzirã dit murmint cã li acãtsã cutremburlu shi ciudia, shi nu lji-dzãsirã tsiva a nitsunã cãtse avea fricã.

Isus Injeat Vidzut di Niscãntsi

⁹ [Tora Isusul dupã tsi eara injat dimineatsa tu prota dzuã a stãmãnãljei, s-fãnipsi prota ali Marii Magdalena, di la cai avea aĝiunit shapti demonji.

¹⁰ Ea s-dusi shi lu spusi atsilor tsi eara deadun cu nãsã tsi vãita shi plãndzea.

¹¹ Ma aeshtsã cãndu avdzãrã cã eara yiu shi s-vidzu di ea nu lu pistipsirã.

¹² Dupã aesti lucri, s-fãnipsi tu unã altã formã a doilor di nãsh, tsi ma nãdzea tu hoarã.

¹³ Shi elji s-dusirã shi lu spusirã la alantsi, ma nitsi aeshti nu lu pistipsirã.

Isusul Injeat cu Ucenitsilji

¹⁴ Tu soni s-fãnipsi a unsprãdzatsilor cãndu eara la measã shi l-aurlã trã nipistipsirea a lor shi trã chitrisirea a inimãljei, cã nu avea pistipsitã la nãsh tsi lu avea vidzutã injiat.

¹⁵ Dapoea lã dzãsi a lor: “Nidzets tu tutã lumea shi predicats evanghelul a tutulor,

¹⁶ atselu tsi pistipseashti shi s-pãtidzãshti, va s-hibã ascãpat. Ma atselu tsi nu ari pistipsit va s-hibã giudicat.

¹⁷ Shi aesti sãntu semnili tsi va s-urmeadzã atselji tsi va s-pistipseascã: tu numa a mea elji va li aĝuneascã demonjilji shi va s-greascã limbi nali,

¹⁸ shi va li acatsã cu mãna nãpãrtsili, shi macã va s-bea tsiva ti muriri, nu va s-facã tsiva arãu, va s-bagã mãnjili pi lãndzitsilji shi aeshti va s-vindicã.”

Scularea al Isus tu Tser

¹⁹ Domnul Isus, dupã tsi lã gri, si sculã pi tser shi s-apunã di nandreapta a Dumnidzãului.

²⁰ Dapoea elji fudzirã shi predicarã iutsido, iarã Domnul lucra deadun cu nãshi shi lu confirma zborlu cu seamnili tsi li sotsãsea. Amen.]