Tite 3 - Nyanmien nde Ufle

Sa kpa nga Christfue yô'n

¹ Kpen bé wla ke bé bu bé nga bé sié bé'n nin bé nga bé dyran bé dya nun'n bé swran, man bé nyin yi bé, sa kpa kwlaa nga bé sé bé ke bé yô'n, man bé yô.

² Nanh man bé kan swran wun nde, nanh man bé klô utré, man bé yatyi sa tye, man swran'n kwlaa bé wun ke bé ti weteefue.

³ Afin laa é kusu é ti sinnglinfue, é ti nyin kékléfue, bé laka é man é yatyi atin kpafue'n, é nyin b'o blô ninngé wafawafa'n kwlaa nin men dile'n su'n ti é katyii ke kanga sa, é ti klunwifue, é nyin tyi swran nin liké, é wun yô te, é kpo é wun.

⁴ Sannge ke é Défue Nyanmien'n yili i kpa yôle'n nin swran'm bé klôle'n nglô'n,

⁵ o déli é. Nanh ke é yôli sa kpa wié ti ye o déli yéo, sannge i bobo ye o sili é aunnvue soo. Ke o Wawe'n wuu é ufle wunnzinle b'o wunnziin yé'n ti, b'o man é katyi swran ufle'n, ye o déli yéo.

⁶ Afin é Défue Christ-Jésus ti Nyanmien fe i Wawe'n maan é i klun-ufué su

⁷ nan yé nga o yô yé'n ti, o bu é swran kpa, o man éh nyanh anannganman nguan nga i waan oh manh yé'n bo é wla ô su'n.

⁸ Nde nga n keen ye'n ti nanwle wéiin. N klô ke a dyran nde so'n su kpa nan bé nga bé lafi Nyanmien su'n, bé fa yé yôle'n katyi bé dyunman. I so yôle'n ti kpa, o yô swran'm bé wun sa yé.

⁹ Sannge nanh fo o wun wla sinnzin akplôwa sile'n, nin bé nannannannan'm bé ôsu finwle i kunndele'n, nin utré, nin mmla'n su akplôwa sile'n bé nun. Bé ti liké ngben b'o yô'a sa fi yé.

¹⁰ Swran ng'o fa ngbatyie wla afien'n, se a kan kléé kpe kun kpe nnyon b'o faman'n, yi o nyin i wun,

¹¹ afin a si ke i so swran lie'n wa satyi, ye sa ng'o yô'n klé ke o ti'a kpa.

Ngalie

¹² Se n sunman Artémas annze Tychique o wun lo'n, mion o nyin bla man é yia Nicopolis, afin le ye m bu i ke nh tranh ayre nuon.

¹³ Gua Zénas mmla sifue'n nin Apollos bé atin klaan, nan liké fi a mia'an bé.

¹⁴ Klé é minnien'm bé kusu ke bé di dyunman klaan nan ba nyan liké nga bé sa mien i wun'n, nanh man bé bubu bé sa nin bé dya tran su.

I nuan yrale

¹⁵ Bé kwlaa nga bé nin min ô wa'n, béh yôh o liké. Nh yôh é klôfue nga bé lafi Nyanmien su'n bé liké. Nh yrah n nuan ke amun kwlaa an nyan yé!