Sa nglô yile 3 - Nyanmien nde Ufle

Nde nga Jésus kan kléé Sardes asonun'n

¹ Nian nde nga n klô ke a kle kô man Sardes asonun'n i ange'n ye: M bo n le Nyanmien i Wawe'n nsô'n, bo nzraama nsô'n wô n sa nun'n, n sé ke yiô: N si amun nyôlie'n, swran'm bé sé ke amun nyin ô su, sannge amuan wu.

² Anh tinngé, nan anh wla bé nga bé ka le bo bé su wa wu'n bé fanngan. Afin n wun ke sa nga an yô'n, min Nyanmien i nyrun an nian guegue i wié fi bô.

³ I so'n ti, anh bu nde nga bé kan kléé amun, bo an fa su'n i akunndan, anh fa su, anh katyi amun nzuen'n. Se amuan tinngéman'n, m ma fu amun nun ke awiéfue sa, an su si'a do nga mh bah'n.

⁴ Sannge an le swran wié mun Sardes wa ba yô'a bé trale'n fien. Béh wlah bé wun trale ufué, min nin bé éh sanh nun, afin se bé yô soo o ti su.

⁵ Swran ng'o kwla'n, ke oh wleh i wun trale ufué soo. N su nunnu'en i dunman'n nguan fluwa'n nun. Mh bôh i dunman klé n Si nin i ange mun.

⁶ Swran ng'o si fa sié'n, mon o tié nde nga Nyanmien Wawe'n kan klé asonun mun'n!

Nde nga Jésus kan kléé Philadephie asonun'n

⁷ Nian nde nga n klô ke a kle kô man Philadelphie asonun'n i ange'n ye: M bo n ti Nyanmien lie, bo n ti nanwlefue, bo David la clé'n wô n sa nun, bo n nyin anuaan swran kwla tikéman, ye se n tikéo swran kwla nyinman'n, n sé ke yiô:

⁸ N si amun nyôlie'n. Liké nga an kwle i yô'n, o ti kaan, sannge o nin i so'n ngba, amuan fa min nde'n su, amuan fia'a n dunman'n su. I so'n ti, man tiké anuan man man amun, swran fi kwla nyinman.

⁹ Anh nian, m man Satan (*f6*) i minnien atôfue'm bo bé ton bé wun suen ke bé ti Juif'n, bé wa kôtô amun bô, ye béh sih ke n klô amun.

¹⁰ An fa nde bo n kan kléé amun ke an tra amun awlen'n su. O man ke sa kéklé toh men wunmuan'n su swran'n kwlaa bé sa nianle'n ti'n, n kusu nh sasah amun.

¹¹ Mh bah ityra'n. Liké ng'o ô amun sa nun'n anh tre kéklé, nan swran wié a fa'a liké nga nh fah yô amun mô'n.

¹² Swran ng'o kwla'n, nh feh yô min Nyanmien sua'n i kuatren'n kun, bé su katyimen. Nh kleh min Nyanmien i dunman'n, nin min Nyanmien i klo Jérusalem ufle b'o fin i wun nyanmien su lo dyra'n i dunman'n, nin m bobo n dunman ufle'n i wun.

¹³ Swran ng'o si fa sié'n, mon o tié nde nga Nyanmien Wawe'n kan klé asonun mun'n!

Nde nga Jésus kan kléé Laodicée asonun'n

¹⁴ Nian nde nga n klô ke a kle kô man Laodicée asonun'n i ange'n ye: M bo bé fle min Mon-o-yô-so'n, bo n kan nde nanwle, bo bé kwla fa bé wla gua n su'n, bo min ye Nyanmien man n yii liké'n kwlaa'n, n sé ke yiô:

¹⁵ N si amun nyôlie'n. Se an ti ke nzué sa'n, wuun nh séh ke, an dyoman, kusu an lôman. N klô ke an dyo annze an lô!

¹⁶ Ke bo an dyoman, kusu an lôman, bo an ti mlenmlenmlen'n, m ma gua amun asé.

¹⁷ An sé ke an ti anyanbéunfue, amuan nyan amun wun, liké fi mia'an amun. An si'a ke an ti nyrennenfue, an yô annvo, an ti yalefue, an ti anyansifue, amun wun kplen.

¹⁸ I so'n ti, nh kanh klé amun ke anh tô sika okwle bo ba klôé'n n sa nun nan an yô anyanbéunfue. Ye anh tô trale ufué fa wla amun wun nan ba wu'an ke amun wun ti kplen, nan amun nyin a gua'a asé. Anh tô ayré fa kpe amun nyin su nan an wun asé.

¹⁹ Bé kwlaa nga n klô bé sa'n, n idyo bé, n tu bé fo. I so'n ti, anh yatyi amun nyrun kôuun yôle'n, anh katyi amun nzuen'n.

²⁰ Anh nian, n dyin anuan'n sin, m bôbô. Swran ng'o ti min nen'n nan o tiké'n, nh wluh i lika lo, min nin i éh dih liké.

²¹ Swran ng'o kwla'n, min nin i éh dih m bia'n, ke n kwlali, bo min nin n Si é di i bia'n sa.

²² Swran ng'o si fa sié'n, mon o tié nde nga Nyanmien Wawe'n kan klé asonun mun'n!