Sa nglô yile 2 - Nyanmien nde Ufle

Nde nga Jésus kan kléé Éphèse asonun'n

¹ Nian nde nga n klô ke a kle kô man Éphèse asonun'n i ange'n ye: M bo nzraama nsô'n wô n sa fama'n nun, bo n nantinanti sika okwle kannin nsô bo bé dyindyin le'n bé afien'n, n sé ke yiô:

² N si amun nyôlie'n, nin fele nga an feli'n, nin amun awlen bo an tre'n. N si ke amun nin swran tete mun sonman. An sa bé nga bé ton bé wun suen ke n sunmaan bé'n niannin, an wuun ke bé bua atô.

³ An le awlen kpa, n ti, an wunnin nyrennen, amun sa sin a bubu'a amun.

⁴ Sannge amun wun sa ô n klun, yele ke klôle nga an fa klô min laa'n, an klô'a n so kun.

⁵ Anh bu amun wafa nga an ti laa'n i akunndan, anh katyi amun nzuen'n, nan anh yô sa kunngba nga an yôli i bôbôle nun'n. Se amuan katyi'a amun nzuen'n, nh tôh amun lo, nh yih amun kannin'n le.

⁶ Sa nga an yô b'o ti kpa kan'n, yele ke an klô'a sa nga Nicolaïfue'm bé yô'n, bo n kusu n klô'a bé'n.

⁷ Swran ng'o si fa sié'n, mon o tié nde nga Nyanmien Wawe'n kan klé asonun mun'n. Swran ng'o kwla'n, m man oh dih waka b'o man nguan b'o ô Nyanmien fié'n su lo'n i mma.

Nde nga Jésus kan kléé Smyrne asonun'n

⁸ Nian nde nga n klô ke a kle kô man Smyrne asonun'n i ange'n ye: M bo n ti liké'n kwlaa i klikli nin i awiélie'n, bo n wuli, n tyennin'n, n sé ke yiô:

⁹ N si sa ng'o to amun su'n nin yale bo an di'n. Sannge an ti anyanbéunfue! N si amun wun nde nga bé nga bé waan bé ti Juif'n bé kan'n. Bé ti'a Juif, sannge bé ti Satan (*f6*) i minnien.

¹⁰ Nanh sre kun amun nyrennen nga an wa wuin'n ti. Anh nian, mmusu'm bé si Satan'n o wa wla amun nun wié'm bé bisua, oh sah amun nian. Amunh wunh nyrennen lé blu. Se kunle bobo ye béh kunh amun'n, anh tra amun awlen, ye liké nga nh fah yô amun mô'n yele nguan'n.

¹¹ Swran ng'o si fa sié'n, mon o tié nde nga Nyanmien Wawe'n kan klé asonun mun'n! Swran ng'o kwla'n, o su wu'a kpe nnyon wié.

Nde nga Jésus kan kléé Pergame asonun'n

¹² Nian nde nga n klô a kle kô man Pergame asonun'n i ange'n ye: M bo kaka nnana kpa'n wô n sa nun'n, n sé ke yiô:

¹³ N si amun tranwle'n, lo ye Satan (*f6*) i bia'n wôo. Sannge o nin i so'n ngba, an fa amun wun mantan n kpa. I nun nga bobo bo bé kuun Antipas b'o kan min nde'n tititi'n, amun wun lo lika nga Satan tran lo'n, amuan yi'a amun wla n su.

¹⁴ Sannge amun wun sa wié ô n klun, yele ke swran wié'm bé ô amun nun lo bé fa liké nga Balaam kléli'n su. I ye o klé Balak ye man o laka Israël mun ye bé yô sa te, bé di amuen su, bé fa bé wun wle téklé bôle'n nun nion.

¹⁵ I kunngba'n, ke bé fee i nde'n su'n, amun nun wié'm bé kusu bé fa liké nga Nicolaïfue'm bé klé'n su.

¹⁶ I so'n ti, anh katyi amun nzuen'n, se wa yô'a so'n, nh tôh amun lo ityra'n, nh fah kaka ng'o ô n nuan nun'n, min nin bé éh kunh.

¹⁷ Swran ng'o si fa sié'n, mon o tié nde nga Nyanmien Wawe'n kan klé asonun mun'n! Swran ng'o kwla'n, nh fah manne (*f29*) bo bé wunmen'n men. Ye nh fah yebue ufué kun bo bé klee dunman ufle kun su'n men. Swran fi si'a dunman so'n, san swran nga bé fa men'n ye o si io.

Nde nga Jésus kan kléé Thyatire asonun'n

¹⁸ Nian nde nga n klô ke a kle kô man Thyatire asonun'n i ange'n ye: M bo n ti Nyanmien Wa, bo n nyinma'n so ke sin sa, bo n dya'm bé ti ke aaba bo ba kpite i wun'n sa'n, n sé ke yiô:

¹⁹ N si amun nyôlie'n, nin klôle bo an fa klô min'n, nin n su bo an lafi'n, nin amun dyunman'n, nin awlen bo an le'n. N si ke sa nga an yô bé sien'n, bé kpa tra laa lie'n,

²⁰ sannge amun wun sa b'o ô n klun'n yele ke an man bla nga bé flee Jézabel, bo i waan o ti Nyanmien nuan idyofue'n, i atin man o klé n swran'm bé liké, o laka bé man bé wun wle téklé bôle'n nun, ye bé di amuen'm bé su.

²¹ N yatyii i le kaan ke o katyi i nzuen'n, sannge o yatyi'e i téklé bôle'n.

²² I so'n ti, se o nin i sôman'm ba katyi'a bé nzuen'n, nh fah bé yi be'n su, béh wunh nyrennen dan kpa.

²³ Nh kunh i mma mun, o man asonun'n kwlaa béh sih ke min ye n si swran'm bé akunndan'n nin sa ng'o ô bé klun lo nion. Liké nga an yôli'n, nh fah swran kun lie ng'o yôli'n i nuan liké men.

²⁴ Sannge amun Thyatire asonunfue nga mun bo amuan fa'a liké ng'o kléli'n su'n, bo an si'a liké nga swran wié'm bé flee Satan (*f6*) i bô nde'n, n sé amun ke yiô: N su fa'a tro ufle dyi'an amun ti su.

²⁵ Sannge liké ng'o ô amun sa nun'n, anh tre kéklé lélé mon o fa dyu m bale.

²⁶ Swran ng'o kwla, b'o yô n klun sa lélé gue i ti nin i bô'n, m man oh siéh nvlénvlé mun,

^27-28 ke n Si fa min siéé bé su'n sa. Oh fah blale kponman kankan bé, ye oh bôh bé ke bé bô se'n sa. Nh fah awue nzraama'n men.

²⁹ Swran ng'o si fa sié'n, mon o tié nde nga Nyanmien Wawe'n kan klé asonun mun'n!