Sa nga bé yôli'n 9 - Nyanmien nde Ufle

Saul i katyile

¹ Ke oh yôh so'n, wuun Saul te wla é Min'n i sonnzonfue'm bé sre ke oh kunh bé, i so'n ti, o oo Nyanmien nyrun dyranfue dan'n i wun lo,

² o sre i ke o men i Nyanmien sua nga bo bé ô Damas lo'n bé wun fluwa, nan se o tô swran wié lo'n, se yasua ô, bla ô, bo bé fa nde su'n oh tyih bé ba Jérusalem.

³ Ke oh koh b'o wa dyu Damas lo'n, kpekuun nyanmien'n kpadya piaa guee i su.

⁴ O toli, o tii swran kun nen, o sé i ke: ?Saul, Saul, nzu ti ye a klé n yale soo?

⁵ Ye o use i ke: ?Nannan, bé fle o se? Ye o sé ke: Min Jésus-o, min ye a klé n yale nion.

⁶ Sannge dyaô wlu klo'n nun, bé wa klé o liké nga a wa yô'n.

⁷ Bé bo bé ko i sunmanle'n, bé dyin le bé too amulé, bé tili nen so'n, sannge o wu'an asé. Bé tre i sa bé fe oo Damas lo.

⁸ Saul dyaôli, i nyin'n gua su, sannge o wu'an asé. Bé tre i sa bé fe oo Damas lo.

⁹ O dii lé nsan, o wu'an asé, o di'a liké, o no'an nzué.

¹⁰ Ke oh yôh so'n, Jésus i sonnzonfue kun ô Damas le, bé fle i Ananias. O wuun é Min'n aôlia nun, o flelii. Ananias séé ke: Nannan, man srô!

¹¹ Ye é Min'n sé i ke: Dyaô ko atin bo bé flee i Séiin'n su Judas awlô lo, kô nian Saul b'o fin Tarse'n i ôsu. O nin Nyanmien bé su kôkô yale.

¹² O wuun bian kun bo bé fle i Ananias'n aôlia nun, o wluu lo, o fe i sa fue i su nan o wun asé.

¹³ Ananias sé ke: Nannan, n tili tete kwlaa nga bian so'n yôô o swran mun Jérusalem lo'n, swran sunman bé nuan nun,

¹⁴ ye Nyanmien nyrun dyranfue dandan'm bé meen i atin ke, swran kwlaa b'o bô o dunman klo nga su wa'n, o tyii!

¹⁵ Sannge é Min'n sé i ke: Ko, afin bian so'n, man fe ke o di n dyunman, nan o bô n dunman'n nvlé wié'm bé nun, famien nin Israël mma'm bé nyrun,

¹⁶ ye m ma klé i nyrennen kwlaa ng'o wa wuin n dunman nun'n.

¹⁷ Ananias oli, ke o dyuu awlô lo'n, o fe i sa'n fuaa Saul su, o sé i ke: Min niaan Saul, ke ah bah'n, é Min Jésus b'o fitéé o nyrun atin'n nun lo'n o sunmaan min ke m ma tiké o nyin nan Nyanmien Wawe'n fa o katyi i lie mlonmlon.

¹⁸ I ôsu kunngba so'n nun liké wié ke dyué wun bui sa fin i nyin su toli, nan wa wun asé.

¹⁹ O dyaôli nan ba yô i baptême. Ke o dii liké'n, o nyaan wunmien ékun. O dii lé nnyon kun Jésus sonnzonfue'm bé wun Damas le,

Saul kaan Nyanmien nde'n Damas lo

²⁰ kpekuun o su kan Jésus nde Nyanmien sua'm bé nun, ke Jésus ti Nyanmien Wa.

²¹ Bé kwlaa nga bé ti i nde'n, o bôô bé nuan, bé sé ke: ?Nenh i ye o klé bé bo bé bô dunman so'n bé nyrennen Jérusalem lo nion? ?Wa baman wa ke o wa tyi bé ko Nyanmien nyrun dyranfue dandan'm bé dyasu?

²² Sannge nde kanle'n si Saul wun ye i nde'n kwla bé, ke oh kanh ke Jésus ti Christ'n (*f1*), b'oh yiyih nun klé Juif'm bo bé tran Damas lo'n, bé le'a nde fi ke'en kun.

Saul wanndii Juif mun

²³ Ke o dii lé nnyon kun'n, Juif'm bé tyityii ke béh kunh Saul,

²⁴ sannge Saul tii bé ndyityie so'n. Bé sese klo'n i anuan'm bé nun kongue nin wia nun ke béh kuinh.

²⁵ Sannge kongue i sonnzonfue'm bé fe wlaa gbôgbô kun nun dyre klo i wun nga bé sili'n i sin lo.

Sa nga Saul yôé Jérusalem'n

²⁶ Ke Saul dyuu Jérusalem lo'n, i waan oh feh i wun mantan Jésus sonnzonfue mun, sannge bé kwlaa bé srôé, bé lafi'a su ke wa yô Jésus sonnzonfue sakpa.

²⁷ Sannge Barnabas fe bé oo bé bo Jésus sunmaan bé'n bé wun lo, o kan kléé bé ke Saul wuun é Min'n atin'n nun, o nin i idyoli, o kan nde yakpa su Jésus dunman nun Damas lo.

²⁸ Ke o fin tyen so'n nun'n, o nin bé wlan Jérusalem klo'n nun, bé ko bé ba,

²⁹ ye o kan nde é Min'n dunman nun yakpa su. Ye o kan nde klé Juif'm bo bé idyo Grec'n, bé si akplôwa, bé sofue mun ye bé klô ke béh kuinh nion.

³⁰ Ke aniaan'm bé tii i so'n, bé fe oo Césarée, nan bé man wa o Tarse.

³¹ Asonunfue'm bo bé ô Judée, nin Galilée, nin Samarie men wunmuan'n nun lo'n, bé le aladyé, asonun'n ko i nyrun. Ke bo asonunfue'm bé srô é Min'n bo Nyanmien Wawe'n dyran bé sin'n, bé tre.

Énée i dyuédyué yôle

³² Ke Pierre wlanwlan lika kwlaa nun'n, lé kun o oo Nyanmien i swran bo bé ô Lydda lo'n bé wun lo wié.

³³ O tôô bian kun bo bé fle i Énée'n lo, o ti bubuwafue o le i be'n su, ke o bubuli'n wa di afue motyue.

³⁴ Pierre séé i ke: Énée, Jésus-Christ a yô o dyuédyué, dyaô se o be'n. Nan i ôsu kunngba'n nun wa dyaô.

³⁵ Ke Lydda nin Saron lofue'n kwlaa bé wunniin'n, bé fa bé wun maan é Min'n.

Dorcas i tyenle

³⁶ Jésus sonnzonfue bla kun ô Joppé lo, bé flee Tabitha, Grec nun yele Dorcas, bo i bô yele wannzannin. O ti klun ufuéfue kpa ye o yô yalefue'm bé yé.

³⁷ Ke Pierre ô Lydda lo'n, bla so'n too tukpatye, o wuli, bé wunnzinniin, bé le nglô sua ba kun nun.

³⁸ Lydda mantan Joppé. Ke Jésus sonnzonfue'm bé tii ke Pierre ô le'n, bé yi swran nnyon oo i sin ke bé kô sé i ke o bla trelele.

³⁹ Pierre a sisi'e i bô, o nin bé oli. Ke o dyuu lo'n, bé fe oo nglô sua'n nun lo. Angbôti mmla'm bé kwlaa bé bee i wun le, bé fa trale nin trale dandan nga Dorcas wuu bé ke i nyin te ô su'n, klélii, wuun bé sun.

⁴⁰ Pierre man swran'n kwlaa bé fitéli, o kôtôli, o kôkô kléé Nyanmien, nan wa kpe i nyin fuen'n i wun lo, o sé ke: Tabitha, dyaô! Ke o tiké i nyin b'o wuun Pierre'n, o dyaô traan asé.

⁴¹ O uti i sa'n meen i su. I sin o flee Nyanmien swran nin angbôti mmla mun, o fe kléé bé ke wa tyen.

⁴² Joppéfue'n kwlaa bé tii sa so'n, o man swran kpanngban bé lafii é Min'n su.

⁴³ Pierre dii lé nnyon kun Joppé lo Simon b'o ti kplô usufue'n i awlô lo.